ನವದೆಹಲಿ: ಭಾರತದ ಪ್ರಖ್ಯಾತ ಕುಸ್ತಿಪಟು ಬಜರಂಗ್ ಪೂನಿಯಾಗೆ ಅಮೇರಿಕಾದ ಪ್ರಸಿದ್ಧ ಮ್ಯಾಡಿಸನ್ ಸ್ಕ್ವೇರ್ ಗಾರ್ಡನ್ನಲ್ಲಿ ಕುಸ್ತಿಯಲ್ಲಿ ಪಾಲ್ಗೊಳ್ಳುವ ಅವಕಾಶ ದೊರೆತಿದೆ.
ವಿಶ್ವಪ್ರಖ್ಯಾತ ಮ್ಯಾಡಿಸನ್ ಸ್ಕ್ವೇರ್ ಗಾರ್ಡನ್ನಲ್ಲಿ ನಡೆಯುವ ಕುಸ್ತಿ ಪಂದ್ಯದಲ್ಲಿ ಪಾಲ್ಗೊಳ್ಳಲು ಅಮೇರಿಕಾ ರೆಸ್ಟ್ಲಿಂಗ್ ಫೆಡರೇಷನ್ ಮೇ 6ರಂದು ಆಯೋಜಿಸಿರುವ "ಗ್ರಾಫೆಲ್ ಅಟ್ದಿ ಗಾರ್ಡನ್-ಬೀಟ್ ದಿ ಸ್ಟ್ರೀಟ್" ಫೈಟ್ನೈಟ್ಗೆ ಬಜರಂಗ್ ಅವರನ್ನು ಅಹ್ವಾನಿಸಿದೆ.
ಕಳೆದ 9 ಕುಸ್ತಿ ಟೂರ್ನಿಗಳಲ್ಲಿ 8 ಚಿನ್ನದ ಪದ ಗೆದ್ದಿರುವ 65 ಕೆಜಿ ವಿಭಾಗದ ನಂಬರ್ 1 ಕುಸ್ತಿಪಟುವಾದ ಬಜರಂಗ್, ಅಂದು ನಡೆಯುವ ಪಂದ್ಯದಲ್ಲಿ ಸತತ 47 ಪಂದ್ಯಗಳಲ್ಲಿ ಸೋಲನ್ನೆ ಕಾಣದ ಯಿನ್ನಿ ಡಿಯಾಕೊಮಿಹಲಿಸ್ ಅವರನ್ನು ಎದುರಿಸಲಿದ್ದಾರೆ.
ಸಣ್ಣ ಹಳ್ಳಿಯಿಂದ ಬಂದು ಕುಸ್ತಿಯಲ್ಲಿ ಭಾರತವನ್ನು ಪ್ರತಿನಿಧಿಸಿ ದೇಶಕ್ಕೆ ಕೀರ್ತಿ ತಂದಿರುವ ಬಜರಂಗ್ ಪೂನಿಯಾ ವಿಶ್ವವಿಖ್ಯಾತ 'ಮ್ಯಾಡಿಸನ್ ಸ್ಕ್ವೇರ್' ಗಾರ್ಡನ್ನಲ್ಲಿ ತಮ್ಮ ತಾಕತ್ತನ್ನು ಪ್ರದರ್ಶಿಸುವ ಅವಕಾಶ ದೊರೆತಿರುವುದು ದೇಶಕ್ಕೆ ಹೆಮ್ಮಪಡುವ ವಿಚಾರವಾಗಿದೆ. ಅಲ್ಲದೆ ಈ ಅವಕಾಶ ಪಡೆದಿರುವ ಭಾರತದ ಮೊದಲ ಕ್ರೀಡಾಪಟು ಎಂಬ ಹೆಗ್ಗಳಿಕೆಯೂ ಬಜರಂಗ್ ಸಲ್ಲುತ್ತಿದೆ.
ಈ ಕುರಿತು ಪ್ರತಿಕ್ರಿಯಿಸಿರುವ ಬಜರಂಗ್ ' ಚಿಕ್ಕ ಹಳ್ಳಿಯಿಂದ ಬಂದ ನನಗೆ ಅಂತಹ ದೊಡ್ಡ ಸ್ಟೇಜ್ನಲ್ಲಿ ಕುಸ್ತಿ ಆಡುವ ಅವಕಾಶ ದೊರೆತಿರುವುದಕ್ಕೆ ನಿಜಕ್ಕೂ ನಂಬಲಾಗುತ್ತಿಲ್ಲ, ಇದು ನನಗೆ ಉತ್ತಮ ಅನುಭವ ನೀಡಲಿದೆ ಎಂದಿರುವ ಅವರು ಅವಕಾಶ ಸಿಕ್ಕಿರುವುದಕ್ಕೆ ಖುಷಿಯ ಜೊತೆಗೆ ನರ್ವಸ್ ಕೂಡ ಆಗಿದ್ದೇನೆ ಎಂದಿದ್ದಾರೆ.
ಮ್ಯಾಡಿಸನ್ ಸ್ಕ್ವೇರ್ ಗಾರ್ಡನ್ನಲ್ಲಿ ಈ ಹಿಂದೆ ವಿಶ್ವಶ್ರೇಷ್ಠ ಬಾಕ್ಸರ್ಗಳಾದ ಮೊಹಮ್ಮದ್ ಅಲಿ ಮತ್ತು ಜೋ ಫ್ರಾಜಿರ್ ನಡುವೆ 1971 ರಲ್ಲಿ ಬಾಕ್ಸಿಂಗ್ ನಡೆದಿತ್ತು. ಇದು ಫೈಟ್ ಆಫ್ ದಿ ಸೆಂಚುರಿ ಎಂಬ ಗೌರವ ಪಡೆದಿತ್ತು. 1986 ರಲ್ಲಿ ಮೈಕ್ ಟೈಸನ್ ಹಾಗೂ ಮಿಚ್ ಗ್ರೀನ್ ನಡುವೆ ,1999ರಲ್ಲಿ ಎವಾಂಡರ್ ಹೋಲಿಫೈಲ್ಡ್ ಹಾಗೂ ಲೆನೆಕ್ಸ್ ಲೇವಿಸ್ ನಡುವೆ, 2015ರಲ್ಲಿ ಪ್ಲೋಯ್ಡ್ ಮೇವೇದರ್ ಹಾಗೂ ಮ್ಯಾನ್ನಿ ಪ್ಯಾಕ್ವಿಯೊ ನಡುವೆ ಬಾಕ್ಸಿಂಗ್ ಪಂದ್ಯಗಳು ನಡೆದಿದ್ದವು.
ಇಂತಹ ಮಹಾನ್ ಪ್ರತಿಭೆಗಳ ಪ್ರದರ್ಶನಕ್ಕೆ ವೇಧಿಕೆಯಾಗಿದ್ದ ಮ್ಯಾಡಿಸನ್ ಸ್ಕ್ವೇರ್ ಗಾರ್ಡನ್ನಲ್ಲಿ ಭಾರತದ 25 ವರ್ಷದ ಯುವ ಕುಸ್ತಿಪಟು ತಮ್ಮ ಶಕ್ತಿ ಪ್ರದರ್ಶನ ತೋರಿಸಲಿದ್ದಾರೆಂದರೆ ಅದು ಇಡೀ ದೇಶಕ್ಕೆ ಹೆಮ್ಮೆಯ ವಿಷಯವಾಗಿದೆ.
