ಕೊಲ್ಹಾಪುರ(ಮಹಾರಾಷ್ಟ್ರ): ತಾವು ಇಷ್ಟಪಡುವ ಪ್ರಿಯತಮೆಗೆ ರಿಂಗ್, ಗುಲಾಬಿ ಸೇರಿ ವಿವಿಧ ವಸ್ತು ನೀಡಿ ಲವ್ ಪ್ರಪೋಸ್ ಮಾಡುವುದು ಸರ್ವೆ ಸಾಮಾನ್ಯ. ಆದರೆ, ಕೊಲ್ಹಾಪುರದ ಯುವಕನೊಬ್ಬ ತಾನು ಪ್ರೀತಿಸುತ್ತಿದ್ದ ಯುವತಿಗೆ ಎಲ್ಲರಿಗಿಂತಲೂ ವಿಭಿನ್ನವಾಗಿ ಪ್ರಪೋಸ್ ಮಾಡಿದ್ದಾನೆ. ಈ ಮೂಲಕ ಅನೇಕರ ಮನಗೆದ್ದಿದ್ದಾನೆ. ಬೃಹತ್ ಆಕಾರದ ಹೋರ್ಡಿಂಗ್ವೊಂದರಲ್ಲಿ 'ಮ್ಯಾರಿ ಮೀ ಉತ್ಕರ್ಷ' ಎಂದು ದಪ್ಪ ಅಕ್ಷರಗಳಲ್ಲಿ ಬರೆಯಿಸಿ, ಮದುವೆ ಪ್ರಸ್ತಾಪ ಮಾಡಿದ್ದಾನೆ. ಇದಕ್ಕೆ ಯುವತಿ ಸಹ ಒಪ್ಪಿಕೊಂಡಿದ್ದಾಳಂತೆ.
ಏನಿದು ಲವ್ ಕಹಾನಿ?: 2017ರಿಂದಲೂ ಒಂದೇ ಕಾಲೇಜ್ನಲ್ಲಿ ಸೌರಭ್ ಮತ್ತು ಉತ್ಕರ್ಷ್ ಇಂಜಿನಿಯರಿಂಗ್ ವ್ಯಾಸಂಗ ಮಾಡಿದ್ದಾರೆ. ಸಾಂಗ್ಲಿಯ ವಸಂತವಾಡ ಪಾಟೀಲ್ ಇನ್ಸ್ಟಿಟ್ಯೂಟ್ ಆಫ್ ಟೆಕ್ನಾಲಜಿಯ ಸಿವಿಲ್ ವಿಭಾಗದಲ್ಲಿ ಇವರಿಬ್ಬರು ಓದಿದ್ದಾರೆ. ಇವರ ವ್ಯಾಸಂಗ ಮುಕ್ತಾಯದವರೆಗೂ ಉತ್ಕರ್ಷ್-ಸೌರಭ್ ಒಬ್ಬರಿಗೊಬ್ಬರು ಪರಿಚಯವಿರಲಿಲ್ಲ.
ಆದರೆ, ಇಂಜಿನಿಯರಿಂಗ್ ಮುಗಿಯುತ್ತಿದ್ದಂತೆ ಸೌರಭ್ ಮನೆಯಲ್ಲಿ ಮದುವೆ ಪ್ರಸ್ತಾಪ ಮಾಡಿದ್ದಾರೆ. ಈ ವೇಳೆ, ಕಾಲೇಜ್ನಲ್ಲಿ ಯಾರಾದರೂ ಇದ್ದರೆ ಹೇಳು, ನಾವು ಅವರ ಮುಂದೆ ಮದುವೆ ಪ್ರಸ್ತಾಪ ಇಡುತ್ತೇವೆಂದು ಕೇಳಿದ್ದಾರೆ.
ಇದನ್ನೂ ಓದಿ: 75 ವರ್ಷಗಳ ಬಳಿಕ ಭಾರತದಲ್ಲಿರುವ ಕುಟುಂಬ ಸೇರಿಕೊಂಡ ಪಾಕ್ ಮಹಿಳೆ
ತಕ್ಷಣವೇ, ಕಾಲೇಜ್ನಲ್ಲಿ ಉತ್ಕರ್ಷ್ ಎಂಬ ಹುಡುಗಿ ಇದ್ದಾಳೆ ಎಂದು ಸೌರಭ್ ತಿಳಿಸಿದ್ದಾನೆ. ಹುಡುಗಿಯ ಮನೆಯವರ ಬಳಿ ಸೌರಭ್ ತಂದೆ ಮದುವೆ ಪ್ರಸ್ತಾಪ ಇಟ್ಟಿದ್ದಾರೆ. ಕೆಲ ದಿನಗಳವರೆಗೆ ಮಾತುಕತೆ ಮುಂದುವರೆದಿದ್ದು, ಕೊನೆಯದಾಗಿ ಹುಡುಗಿ ಮನೆಯಿಂದ ಒಪ್ಪಿಗೆ ಬಂದಿದೆ.
ಆದರೆ, ಸೌರಭ್ ಮಾತ್ರ ವಿಶಿಷ್ಟ ರೀತಿಯಲ್ಲಿ ಲವ್ ಪ್ರಪೋಸ್ ಮಾಡಲು ಮುಂದಾಗಿದ್ದಾನೆ. ಅದರಂತೆ ಸಾಂಗ್ಲಿ-ಕೊಲ್ಹಾಪುರ ಹೆದ್ದಾರಿಯಲ್ಲಿ ಬೃಹತ್ ಹೋರ್ಡಿಂಗ್ಸ್ನಲ್ಲಿ 'MARRY ME UTKARSH' ಎಂದು ಬರೆಯಿಸಿ, ಲವ್ ಪ್ರಸ್ತಾಪ ಮಾಡಿದ್ದಾನೆ. ಇದಕ್ಕೆ ಹುಡುಗಿ ಸಹ ಒಪ್ಪಿಗೆ ಸೂಚಿಸಿದ್ದಾಳೆ. ಇಬ್ಬರು ಹೋರ್ಡಿಂಗ್ ಮುಂದೆ ನಿಂತು ಒಟ್ಟಿಗೆ ಫೋಟೋ ಕೂಡ ತೆಗೆಸಿಕೊಂಡಿದ್ದಾರೆ. ಈ ವಿಭಿನ್ನ ಪ್ರೇಮಕಥೆ ಇದೀಗ ಜಿಲ್ಲೆಯಾದ್ಯಂತ ಚರ್ಚೆಯಾಗ್ತಿದೆ.
ಉತ್ಕರ್ಷ್-ಸೌರಭ್ ಮೇ. 27ರಂದು ಸಪ್ತಪದಿ ತುಳಿಯಲು ಮುಂದಾಗಿದ್ದು, ಎರಡು ಕುಟುಂಬ ಖುದ್ದಾಗಿ ಮುಂದೆ ನಿಂತು ಇವರ ಮದುವೆ ಮಾಡಿಸುತ್ತಿದೆ.
