ನವದೆಹಲಿ: ಕೊರೊನಾ ವೈರಸ್ನ ರೂಪಾಂತರಿ ತಳಿಯಾದ B.1.617 ಇದನ್ನು ಹಲವಾರು ಮಾಧ್ಯಮಗಳು 'ಭಾರತೀಯ ರೂಪಾಂತರ ವೈರಸ್' ಎಂದು ಉಲ್ಲೇಖಿಸಿದ ಹಿನ್ನೆಲೆಯಲ್ಲಿ ರೂಪಾಂತರಿ ವೈರಸ್ ಹೆಸರುಗಳ ಕುರಿತಾಗಿ ವಿಶ್ವ ಆರೋಗ್ಯ ಸಂಸ್ಥೆಯು ಕೆಲ ಮಾರ್ಗಸೂಚಿಗಳನ್ನು ಹೊರಡಿಸಿದೆ.
ಯಾವುದೇ ಒಂದು ದೇಶದಲ್ಲಿ ರೂಪಾಂತರಿ ವೈರಸ್ ತಳಿಯೊಂದು ಪ್ರಥಮ ಬಾರಿಗೆ ಕಾಣಿಸಿಕೊಂಡಾಗ ಆ ತಳಿಯನ್ನು ಆ ದೇಶದ ಹೆಸರಿನಿಂದ ತಾನು ಗುರುತಿಸುವುದಿಲ್ಲ ಎಂದು ಡಬ್ಲ್ಯೂಎಚ್ಓ ಸ್ಪಷ್ಟಪಡಿಸಿದೆ. ವೈರಸ್ ತಳಿಗಳನ್ನು ಅವುಗಳ ವೈಜ್ಞಾನಿಕ ಹೆಸರುಗಳಿಂದಲೇ ಗುರುತಿಸಬೇಕೆಂದು ಡಬ್ಲ್ಯೂಎಚ್ಓ ತಿಳಿಸಿದೆ.
ಬಾರತದಲ್ಲಿ ಕಂಡು ಬಂದ ರೂಪಾಂತರಿ ವೈರಸ್ ತಳಿಯಾದ B.1.617 ಇದನ್ನು ಡಬ್ಲ್ಯೂಎಚ್ಓ ಭಾರತ ದೇಶದ ಹೆಸರಿನಿಂದ ಗುರುತಿಸಿಲ್ಲ ಎಂದು ಭಾರತ ಸರ್ಕಾರದ ಸಾಪ್ತಾಹಿಕ ಕೋವಿಡ್ ಬುಲೆಟಿನ್ನಲ್ಲಿ ಹೇಳಲಾಗಿತ್ತು. ಇದಾದ ನಂತರ ಡಬ್ಲ್ಯೂಎಚ್ಓ ಕೂಡ ಈ ಬಗ್ಗೆ ಸ್ಪಷ್ಟನೆ ನೀಡಿದ್ದು, ವೈರಸ್ ತಳಿಗಳನ್ನು ವೈಜ್ಞಾನಿಕ ಹೆಸರುಗಳಿಂದ ಉಲ್ಲೇಖಿಸಬೇಕೆ ಹೊರತು ದೇಶದ ಹೆಸರಿನಿಂದಲ್ಲ ಎಂದು ಹೇಳಿದೆ.
