ಡೆಹ್ರಾಡೂನ್: ಪ್ರಸಿದ್ಧ ಉತ್ತರಾಖಂಡದ ಚಾರ್ಧಾಮ್ ಯಾತ್ರೆ ಪ್ರತೀ ಬಾರಿ ಅಕ್ಷಯ ತೃತೀಯದಿಂದ ಪ್ರಾರಂಭವಾಗುತ್ತದೆ. ಹಿಂದೂಗಳ 'ಮೋಕ್ಷಧಾಮ'ಗಳೆಂದೇ ಪರಿಗಣಿಸಿರುವ ಗಂಗೋತ್ರಿ, ಯಮುನೋತ್ರಿ, ಬದ್ರಿನಾಥ್, ಕೇದಾರನಾಥ್ ಸೇರಿದಂತೆ ಪ್ರಮುಖ ಸ್ಥಳಗಳಿಗೆ ಯಾತ್ರಿಕರು ಯಾತ್ರೆ ಕೈಗೊಳ್ಳುತ್ತಾರೆ. 2013ರಲ್ಲಿ ಭಾರಿ ಪ್ರವಾಹದ ಚೇತರಿಕೆಯ ಬಳಿಕ ಯಾತ್ರೆ ಕೈಗೊಳ್ಳುವವರ ಸಂಖ್ಯೆ ಕೂಡ ಹೆಚ್ಚಾಗಿದೆ. ಅದರಲ್ಲೂ ಈ ಬಾರಿ ಅಂದರೆ, 2023ರ 20 ದಿನಗಳ ನೋಂದಣಿ ಮುಗಿದಿದ್ದು, ದಾಖಲೆ ಮೀರಿದ ಸಂಖ್ಯೆಯಲ್ಲಿ ಯಾತ್ರಿಕರು ರಿಜಿಸ್ಟರ್ ಮಾಡಿದ್ದಾರೆ. ಈಗಾಗಲೇ ಎರಡೂವರೆ ಲಕ್ಷ ಯಾತ್ರಿಕರು ದಾಖಲಾತಿ ನಡೆಸಿದ್ದು, ಅತಿ ಹೆಚ್ಚು ಮಂದಿ ಬದ್ರಿನಾಥ್ ಮತ್ತು ಕೇದಾರನಾಥ್ಗೆ ಹೆಸರು ನೋಂದಣಿ ಮಾಡಿಸಿದ್ದಾರೆ.
ಚಾರ್ಧಾಮ್ ಯಾತ್ರೆಗೆ ಇನ್ನೂ ಒಂದೂವರೆ ತಿಂಗಳು ಅವಕಾಶ ಇದ್ದರೂ, ಯಾತ್ರಿಕರ ದಾಖಲಾತಿ ವೇಳೆ ಯಾವುದೇ ಸಮಸ್ಯೆ, ವ್ಯವಸ್ಥೆಯಲ್ಲಿ ತೊಡಕಾಗದಂತೆ ಮುನ್ನೆಚ್ಚರಿಕೆ ಕ್ರಮ ಕೈಗೊಳ್ಳಲಾಗಿದೆ. ಅನೇಕ ಬಾರಿ ಚಾರ್ಧಾಮ್ ಯಾತ್ರೆಯ ವೇಳೆ ಹೆದ್ದಾರಿಯಲ್ಲಿ ಬೆಟ್ಟ ಕುಸಿತ ಸೇರಿದಂತೆ ಅನೇಕ ಸಮಸ್ಯೆಗಳು ಉದ್ಭವಿಸಿದ್ದವು. ಹಾಗಾಗಿ, ಯಾವುದೇ ಸಮಸ್ಯೆಗಳನ್ನು ಯಾತ್ರಿಕರು ಎದುರಿಸದಂತೆ ಲೋಕೋಪಯೋಗಿ ಇಲಾಖೆ ಜೆಸಿಬಿಗಳನ್ನು ರಸ್ತೆಗಳಲ್ಲಿ ನಿಯೋಜಿಸಿದ್ದು, ತಕ್ಷಣಕ್ಕೆ ರಸ್ತೆ ತೆರವು ಕಾರ್ಯದಲ್ಲಿ ಬಳಸಿಕೊಳ್ಳಲಾಗುತ್ತದೆ. ಇದರ ಜೊತೆಗೆ ಎನ್ಡಿಆರ್ಎಫ್ ಮತ್ತು ಎಸ್ಡಿಎಆರ್ಎಫ್ ಸಿಬ್ಬಂದಿಯನ್ನೂ ಕೂಡ ನೇಮಿಸಲಾಗಿದೆ.
ಏಪ್ರಿಲ್ 22ರಿಂದ ಯಾತ್ರೆ ಆರಂಭ: ಏಪ್ರಿಲ್ 22ರಂದು ಅಕ್ಷಯ ತೃತೀಯ ದಿನದಂದು ಚಾರ್ಧಾಮ್ ಯಾತ್ರೆಯ ಗಂಗೋತ್ರಿ ಮತ್ತು ಯಮುನೋತ್ರಿ ಧಾಮದ ಬಾಗಿಲು ತೆರೆಯಲಿದೆ. ಕೇದಾರನಾಥ್ ಧಾಮ್ ಬಾಗಿಲು ಏಪ್ರಿಲ್ 25 ರಂದು ತೆರೆದರೆ ಬದ್ರಿನಾಥ್ ಧಾಮ ದ್ವಾರ ಏಪ್ರಿಲ್ 27ರಂದು ತೆರೆಯಲಿದೆ. ಈ ಬಾರಿ ಅತಿ ಹೆಚ್ಚು ನೋಂದಣಿ ಆಗಿರುವ ಹಿನ್ನೆಲೆಯಲ್ಲಿ ಸರ್ಕಾರ ಮತ್ತು ವ್ಯಾಪಾರಿಗಳು ಸಂತಸವಾಗಿದ್ದಾರೆ. ಪ್ರಸ್ತುತ ವರ್ಷ ಕೇದಾರನಾಥ್ಗೆ 1.14 ಲಕ್ಷ ಜನರು ಮತ್ತು ಬದ್ರಿನಾಥ್ಗೆ 1.39 ಲಕ್ಷ ಜನರು ನೋಂದಣಿ ಮಾಡಿಸಿದ್ದು, ಜನಜಂಗುಳಿ ಉಂಟಾಗುವ ಸಾಧ್ಯತೆ ಇದೆ.
ಸರ್ಕಾರಕ್ಕೆ ಸವಾಲು: ಕೇದಾರನಾಥ್ ಧಾಮದ ಪ್ರಯಾಣ ಸರಳವಲ್ಲ. ಇಲ್ಲಿಗೆ ಸಾಗಲು ಯಾತ್ರಿಕರು ಕಡಿದಾದ ಬೆಟ್ಟದ ಸಾಲಿನಲ್ಲಿ 16 ಕಿ.ಮೀ ಸಾಗಬೇಕು. ಈ ವೇಳೆ ಆಮ್ಲಜನಕ ವ್ಯತ್ಯಯದಿಂದ ಹೃದಯಾಘಾತವಾಗುವ ಸಾಧ್ಯತೆಯೂ ಇರುತ್ತದೆ. ಕಳೆದ ವರ್ಷ ಅನೇಕ ಯಾತ್ರಿಕರು ಸಾವನ್ನಪ್ಪಿದ್ದರು. ಇದನ್ನು ಗಮನದಲ್ಲಿ ಇಟ್ಟುಕೊಂಡಿರುವ ಸರ್ಕಾರ ಈ ಬಾರಿ ಹಲವು ರೀತಿಯ ಮುನ್ನೆಚ್ಚರಿಕೆ ಕ್ರಮ ಕೈಗೊಂಡಿದೆ ಸಿದ್ಧತೆ ನಡೆಸಿದೆ. ಈ ಬಾರಿ 15 ಲಕ್ಷ ಭಕ್ತರು ಕೇದರ್ನಾಥ್ನ ದರ್ಶನ ಪಡೆಬಹುದು ಎಂದು ಸರ್ಕಾರ ಅಂದಾಜು ಮಾಡಿದೆ.
ಈ ಹಿನ್ನಲೆಯಲ್ಲಿ ಕೇದಾರನಾಥ್ ಧಾಮ್ನಲ್ಲಿ 50 ಹಾಸಿಗೆಯ ಆಸ್ಪತ್ರೆ ಸಜ್ಜುಗೊಳಿಸಲಾಗಿದೆ. ಇದರ ಹೊರತಾಗಿ ವೈದ್ಯರ ತಂಡವನ್ನು ಯಾತ್ರೆ ನಡೆಸುವ ಮಾರ್ಗಮಧ್ಯೆ ನಿಯೋಜಿಸಲಾಗಿದೆ ಎಂದು ಮುಖ್ಯ ಮಂತ್ರಿ ಪುಷ್ಕರ್ ಸಿಂಗ್ ಧಾಮಿ ಮಾಹಿತಿ ನೀಡಿದ್ದಾರೆ. ಚಾರ್ಧಾಮ್ಗೆ ಸೌಲಭ್ಯ ಹೆಚ್ಚಿಸುವ ಸಂಬಂಧ ಕೇಂದ್ರ ಸರ್ಕಾರ ಸಲಹೆ ಪಡೆದ ಅವರು, ಇದೇ ವೇಳೆ ಅನೇಕ ಸಚಿವರನ್ನು ಯಾತ್ರೆಗೆ ಆಹ್ವಾನಿಸಿದ್ದಾರೆ.
ರಿಜಿಸ್ಟರ್ ಪ್ರಕ್ರಿಯೆ ಹೇಗೆ?: ಕೇದಾರನಾಥ್ ಬಾಗಿಲು ತೆಗೆಯುವ ಸಂದರ್ಭದಲ್ಲಿ ಯಾತ್ರಿಕರು ಸಣ್ಣ ಮಂಜಿನ ಮಳೆಗೂ ಸಾಕ್ಷಿಯಾಗಬಹುದು. ಇಲ್ಲಿ ಯಾತ್ರಿಕರಿಗೆ ಧ್ಯಾನಕ್ಕಾಗಿ ಗುಹೆಗಳನ್ನು ನಿರ್ಮಿಸಲಾಗಿದೆ. ಈ ಯಾತ್ರೆಗೂ ಮುನ್ನ ರಾಜ್ಯ ಸರ್ಕಾರದ ಚಾರ್ಧಾಮ್ ಯಾತ್ರೆ 2023ಗೆ ನೋಂದಣಿ ಮಾಡುವುದು ಅವಶ್ಯ. ಉತ್ತರಾಖಂಡ ಸರ್ಕಾರದ ಅಧಿಕೃತ ಜಾಲತಾಣ https://registrationandtouristcare.uk.gov.in/ ದಲ್ಲಿ ನೋಂದಣಿ ಮಾಡಬಹುದು. ಇದರ ಹೊರತಾಗಿ 8394833833ಗೆ ವಾಟ್ಸಾಪ್ ನಂಬರ್ ಮೂಲಕವೂ ರಿಜಿಸ್ಟರ್ ಮಾಡಿಕೊಳ್ಳಬಹುದು. ಈ ದಾಖಲಾತಿ ವೇಳೆ ಆಧಾರ್, ಆರೋಗ್ಯ ಮಾಹಿತಿ ಸೇರಿದಂತೆ ಕೆಲವು ದಾಖಲೆಗಳನ್ನು ನೀಡಬೇಕು. ದಾಖಲಾತಿ ಬಳಿಕ ಸರ್ಟಿಫಿಕೇಟ್ ಅನ್ನು ಕಡ್ಡಾಯವಾಗಿ ಡೌನ್ಲೋಡ್ ಮಾಡಿ ಪ್ರಿಂಟ್ ಪಡೆಯಿತು. ಯಾತ್ರೆ ವೇಳೆ ಈ ಸರ್ಟಿಫಿಕೇಟ್ ತೋರಿಸುವುದು ಅತ್ಯವಶ್ಯಕ. ದಾಖಲಾತಿ ಇಲ್ಲದವರಿಗೆ ಈ ಯಾತ್ರೆ ಕೈಗೊಳ್ಳುವ ಅವಕಾಶ ಇಲ್ಲ.
ಇದನ್ನೂ ಓದಿ: 'ದ ಎಲಿಫೆಂಟ್‌ ವಿಸ್ಪರರ್ಸ್‌' ಅತ್ಯುತ್ತಮ ಕಿರು ಸಾಕ್ಷ್ಯಚಿತ್ರ: ಒಲಿದು ಬಂತು ಆಸ್ಕರ್‌ ಪ್ರಶಸ್ತಿ!.. ಬೆಳ್ಳಿ ಹೇಳಿದ್ದೇನು?
