ರಾಯಪುರ( ಛತ್ತೀಸ್‌ಗಢ): ಬಹುತೇಕರು ತಮ್ಮ ಮದುವೆ ಸಮಾರಂಭವನ್ನು ಬಹಳ ಅದ್ಧೂರಿಯಾಗಿ ಪ್ರೀ ವೆಡ್ಡಿಂಗ್ ಫೋಟೋಶೂಟ್ , ಪಾರ್ಟಿ, ಹಾಡು, ಕುಣಿತ, ಪಟಾಕಿ ಸಿಡಿಸಿ, ಮೆರವಣಿಗೆ ಮಾಡುವ ಮೂಲಕ ಸಂಭ್ರಮಿಸುತ್ತಾರೆ. ಆದರೆ, ಇದಕ್ಕೆಲ್ಲ ಭಿನ್ನ ಎಂಬಂತೆ ಇಲ್ಲೊಂದು ಜೋಡಿ ತಮ್ಮ ವಿವಾಹ ಸಮಾರಂಭದಲ್ಲಿ ಸಾಮಾಜಿಕ ಜಾಗೃತಿ ಮೂಡಿಸುವ ಕೆಲಸ ಮಾಡುವ ಮೂಲಕ ಎಲ್ಲರ ಗಮನ ಸೆಳೆದಿದೆ.
ಹೌದು, ಛತ್ತೀಸ್‌ಗಢದ ಧಮ್ತಾರಿ ಜಿಲ್ಲೆಯ ಕಂಡೇಲ್ ಗ್ರಾಮದಲ್ಲಿ ಈ ವಿಶಿಷ್ಟ ವಿವಾಹ ಕಾರ್ಯಕ್ರಮ ನೆರವೇರಿದೆ. ಮದುವೆ ಸಮಾರಂಭದಲ್ಲಿ ರಕ್ತದಾನ ಶಿಬಿರ ಏರ್ಪಡಿಸಲಾಗಿತ್ತು. ರಕ್ತದಾನದ ಜೊತೆಗೆ, ಮದುವೆಯಲ್ಲಿ ಪಾಲ್ಗೊಳ್ಳಲು ಬಂದ ಕೆಲ ಆಹ್ವಾನಿತರು ತಮ್ಮ ಕಣ್ಣುಗಳು ಸೇರಿದಂತೆ ಇತರ ಅಂಗಗಳನ್ನು ದಾನ ಮಾಡಲು ಸಹ ಮುಂದೆ ಬಂದರು. ಹಾಗೆಯೇ, ಅತಿಥಿಗಳು, ಕುಟುಂಬ ಸದಸ್ಯರು ಹಾಗೂ ಗ್ರಾಮಸ್ಥರು ಉತ್ಸಾಹದಿಂದ ರಕ್ತದಾನ ಮಾಡಿದ ದೃಶ್ಯ ಮೆಚ್ಚುಗೆಗೆ ಪಾತ್ರವಾಗಿದೆ.
ಕಂಡೇಲ್ ಗ್ರಾಮದ ವಿಶೇಷತೆ: ಮಹಾತ್ಮ ಗಾಂಧಿ ಅವರು ಸತ್ಯಾಗ್ರಹ ಚಳವಳಿಯನ್ನು ಆರಂಭಿಸಿದಾಗ ಕಂಡೇಲ್ ಗ್ರಾಮವು ಜನಪ್ರಿಯವಾಯಿತು. ಈ ಗ್ರಾಮಕ್ಕೆ ಐತಿಹಾಸಿಕ ಮಹತ್ವವಿದೆ. ಧಮ್ತಾರಿಯಿಂದ ಸುಮಾರು 30 ಕಿ.ಮೀ ದೂರದಲ್ಲಿರುವ ಈ ಗ್ರಾಮದ ಜನರು 1920 ರಲ್ಲಿ ಪ್ರಾರಂಭವಾದ ಬಾಪು ಅವರ ಚಳವಳಿಯಲ್ಲಿ ಭಾಗವಹಿಸಿದ್ದರು. ಗಾಂಧೀಜಿಯವರು ಕಾಲುವೆ ಸತ್ಯಾಗ್ರಹವನ್ನು ಪ್ರಾರಂಭಿಸಲು ಈ ಗ್ರಾಮಕ್ಕೆ ಭೇಟಿ ನೀಡಿದ್ದರು. ಸ್ವಾತಂತ್ರ್ಯ ಚಳವಳಿಯ ಸಮಯದಲ್ಲಿ ಕಂಡೇಲ್ ಗ್ರಾಮವು ಪ್ರಾಮುಖ್ಯತೆ ಗಳಿಸಿತ್ತು.
ಇದನ್ನೂ ಓದಿ : ಹಣವಿಲ್ಲದಿದ್ದರೇನು ವಿಡಿಯೋ ಕಾನ್ಪರೆನ್ಸ್ ಇದೆಯೆಲ್ಲ; ಆನ್ಲೈನ್ನಲ್ಲೇ ನಿಕಾಹ್ ಓದಿ ಭಾರತದ ಹೊಸ್ತಿಲು ತುಳಿದ ವಧು!
ಇನ್ನು ಮದುವೆ ಸಮಾರಂಭದಲ್ಲಿ ವಧುವರರು ಸೇರಿದಂತೆ ಎಲ್ಲ ಅತಿಥಿಗಳು ರಕ್ತದಾನದಲ್ಲಿ ಭಾಗವಹಿಸಿದರು. ಜತೆಗೆ, ಏಳು ಮಂದಿ ದೇಹದಾನ ಮಾಡುವ ಪ್ರತಿಜ್ಞೆ ಸ್ವೀಕರಿಸಿದರು. ಈ ಮೂಲಕ ಹಿಂದಿನ ಸಂಪ್ರದಾಯದಂತೆ ಸಾಮಾಜಿಕ ಜಾಗೃತಿ ಮೂಡಿಸುವ ಮದುವೆ ನಡೆದಿದ್ದು, ಇಡೀ ಗ್ರಾಮವೇ ಮಾದರಿಯಾಗಿದೆ.
"ವರ ಮುಖೇಶ್ ಕುಮಾರ್ ಮತ್ತು ವಧು ನೇಹಾ ಸಾಹು ದಾಂಪತ್ಯ ಜೀವನಕ್ಕೆ ಕಾಲಿಟ್ಟ ಕ್ಷಣ ವಿಶೇಷತೆಯಿಂದ ಕೂಡಿದೆ . ವರನ ಕಿರಿಯ ಸಹೋದರ ಶಾರದಾಮಣಿ ಸಾಹು ಮತ್ತು ಆಂಬ್ಯುಲೆನ್ಸ್ ಗ್ರೂಪ್‌ನ ಸ್ವಯಂಸೇವಕರು ಕಾರ್ಯಕ್ರಮವನ್ನು ಯಶಸ್ವಿಗೊಳಿಸಲು ಕಾರಣರಾದರು. ಈ ಮದುವೆ ಸಮಾರಂಭವು ಸಮಾಜಕ್ಕೆ ಏನಾದರೂ ವಿಶೇಷವಾದದ್ದನ್ನು ಕೊಡುವ ಪಯತ್ನ ಎಂದು" ಮದುವೆಯಲ್ಲಿ ಭಾಗವಹಿಸಿದ ಕೆಲವರು ಅಭಿಪ್ರಾಯ ವ್ಯಕ್ತಪಡಿಸಿದರು.
ಇದನ್ನೂ ಓದಿ : ವಧುವಿನ ತಂದೆಯ ವಿಲಕ್ಷಣ ಷರತ್ತು.. ಮುರಿದು ಬಿದ್ದ ಮದುವೆ: ಆ ಷರತ್ತುಗಳ ಗಮ್ಮತ್ತೇನು ಗೊತ್ತಾ?
ರಕ್ತ ದಾನ ಮಹಾದಾನ : ಇನ್ನು ವಿವಾಹ ಆಮಂತ್ರಣ ಪತ್ರಿಕೆಗಳಲ್ಲಿ ಸಹ 'ರಕ್ತ ದಾನ ಮಹಾದಾನ' ಎಂಬ ಘೋಷಣೆಗಳನ್ನು ಹಾಕಲಾಗಿತ್ತು. ಜತೆಗೆ, ಅಂಗಾಂಗ ದಾನದ ಮಹತ್ವವನ್ನು ಜನರಿಗೆ ಮನವರಿಕೆ ಮಾಡಿ ಕೊಡಲಾಗಿತ್ತು. ಮದುವೆ ಸಮಾರಂಭದಲ್ಲಿ ಪಾಲ್ಗೊಳ್ಳಲು ಬಂದ ಅತಿಥಿಗಳಿಗೆ ಇದು ಸ್ಪೂರ್ತಿದಾಯಕವಾಗಿತ್ತು.
