ರಾಯಪುರ(ಛತ್ತೀಸ್ಗಢ): ವಿಷಪೂರಿತ ಹಾವೊಂದು ಪ್ರತಿದಿನ ಮನೆಯೊಳಗೆ ಬರುತ್ತಿದ್ದರಿಂದ ರೋಸಿ ಹೋಗಿದ್ದ ಇಬ್ಬರು, ಕುಡಿದ ನಶೆಯಲ್ಲಿ ಅದನ್ನು ಕಚ್ಚಿ ತಿಂದಿರುವ ವಿಚಿತ್ರ ಘಟನೆ ಛತ್ತೀಸ್ಗಢದ ಇಂದಿರಾ ನಗರ ಪ್ರದೇಶದಲ್ಲಿ ನಡೆದಿದೆ. ಈ ಘಟನೆ ನಂತರ ಅವರ ಆರೋಗ್ಯದಲ್ಲಿ ಏರುಪೇರು ಕಂಡು ಬಂದಿರುವ ಕಾರಣ ಆಸ್ಪತ್ರೆಗೆ ದಾಖಲಿಸಲಾಗಿದೆ.
ಕುಡಿದ ನಶೆಯಲ್ಲಿ ವಿಷಪೂರಿತ ಹಾವು ತಿಂದಿರುವ ಕಾರಣ ಆರೋಗ್ಯ ಹದಗೆಟ್ಟಿದ್ದು, ಆಸ್ಪತ್ರೆಗೆ ದಾಖಲು ಮಾಡಿ ಚಿಕಿತ್ಸೆ ನೀಡಲಾಗುತ್ತಿದೆ. ಇದೀಗ ಅವರ ಆರೋಗ್ಯದಲ್ಲಿ ಸ್ವಲ್ಪಮಟ್ಟದ ಚೇತರಿಕೆ ಕಂಡುಬಂದಿದೆ ಎಂದು ವೈದ್ಯರು ತಿಳಿಸಿದ್ದಾರೆ. ಮನೆಯಲ್ಲಿ ಮದ್ಯ ಸೇವನೆ ಮಾಡುತ್ತ ಕುಳಿತಿದ್ದ ಸಂದರ್ಭದಲ್ಲಿ ಹಾವು ಪ್ರವೇಶಿಸಿತ್ತು. ಈ ವೇಳೆ ಆಕ್ರೋಶಗೊಂಡಿರುವ ಇಬ್ಬರು ಅದನ್ನು ಹಿಡಿದು, ಅರ್ಧ ದೇಹ ಸುಟ್ಟು ತಿಂದು ಹಾಕಿದ್ದಾರೆ.
ಇದನ್ನೂ ಓದಿ: ಮುಂದಿನ 48 ಗಂಟೆಯಲ್ಲಿ T-20 ವಿಶ್ವಕಪ್ಗೆ ಕೊಹ್ಲಿ ಪಡೆ ಪ್ರಕಟ.. ಈ ಮುಖಗಳಿಗೆ ಸ್ಥಾನ ಬಹುತೇಕ ಖಚಿತ..
ಕಳೆದ ಕೆಲ ದಿನಗಳಿಂದ ಗ್ರಾಮಸ್ಥರ ನಿದ್ದೆಗೆಡಿಸಿದ್ದ ಈ ಹಾವು ಅನೇಕ ಜನರಿಗೆ ಕಚ್ಚಿದೆ ಎನ್ನಲಾಗಿದೆ. ಇದರಿಂದ ಗ್ರಾಮದ ಜನರು ರೋಸಿ ಹೋಗಿದ್ದರು. ಇದರ ಬೆನ್ನಲ್ಲೇ ರಾಜು ಹಾಗೂ ಹಿತೇಂದ್ರ ಈ ರೀತಿಯಾಗಿ ನಡೆದುಕೊಂಡಿದ್ದಾರೆ. ಹಾವು ತಿಂದ ಬಳಿಕ ವಾಂತಿ ಮಾಡಿಕೊಳ್ಳಲು ಆರಂಭಿಸಿದ್ದು, ಆಸ್ಪತ್ರೆಗೆ ದಾಖಲು ಮಾಡಲಾಗಿದೆ ಎಂದು ಗ್ರಾಮಸ್ಥರು ಮಾಹಿತಿ ಹಂಚಿಕೊಂಡಿದ್ದಾರೆ.
