ಥಾಣೆ (ಮಹಾರಾಷ್ಟ್ರ): 2018ರ ರಸ್ತೆ ಅಪಘಾತ ಪ್ರಕರಣವೊಂದರಲ್ಲಿ ಮೃತಪಟ್ಟ ವ್ಯಕ್ತಿಯ ಕುಟುಂಬಕ್ಕೆ 47 ಲಕ್ಷ ರೂ. ಗೂ ಹೆಚ್ಚು ಪರಿಹಾರ ನೀಡಿ ಮಹಾರಾಷ್ಟ್ರದ ಥಾಣೆ ಜಿಲ್ಲೆಯ ಮೋಟಾರು ಅಪಘಾತಗಳ ಹಕ್ಕುಗಳ ನ್ಯಾಯಮಂಡಳಿ (Motor Accident Claims Tribunal - MACT) ಆದೇಶಿಸಿದೆ. ಎರಡು ತಿಂಗಳೊಳಗೆ ಪ್ರತಿ ವರ್ಷಕ್ಕೆ ಶೇ.7ರಷ್ಟು ಬಡ್ಡಿಯೊಂದಿಗೆ ಹಕ್ಕುದಾರರಿಗೆ ಹಣ ಪಾವತಿಸುವಂತೆ ಅಪರಾಧಿ ವಾಹನದ ಮಾಲೀಕರು ಮತ್ತು ಅದರ ವಿಮಾದಾರರಿಗೆ ಸೂಚಿಸಿದೆ.
2018ರ ಸೆಪ್ಟೆಂಬರ್ 9ರಂದು ಬಶೀರ್ ಶೇಖ್ (39) ಎಂಬುವರು ರಸ್ತೆ ಅಪಘಾತ ಪ್ರಕರಣದಲ್ಲಿ ಸಾವನ್ನಪ್ಪಿದ್ದರು. ಆಟೋ ಬಿಡಿಭಾಗಗಳ ವ್ಯಾಪಾರದಲ್ಲಿ ತೊಡಗಿದ್ದ ಇವರು ವಾಹನ ರಿಪೇರಿ ಗ್ಯಾರೇಜ್ ನಡೆಸುತ್ತಿದ್ದರು. ತಿಂಗಳಿಗೆ ಸುಮಾರು 30 ಸಾವಿರ ರೂಪಾಯಿ ಗಳಿಸುತ್ತಿದ್ದರು. ಆ ವರ್ಷದ ಸೆ. 8ರಂದು ಬಶೀರ್ ಶೇಖ್ ತಮ್ಮ ಸೋದರ ಮಾವ ಮತ್ತು ಸ್ನೇಹಿತರೊಂದಿಗೆ ಮುಂಬೈ-ನಾಸಿಕ್ ಹೆದ್ದಾರಿಯಲ್ಲಿರುವ ರಸ್ತೆ ಬದಿಯ ಉಪಾಹಾರ ಗೃಹಕ್ಕೆ ಕಾರಿನಲ್ಲಿ ಊಟಕ್ಕೆ ಹೋಗಿದ್ದರು. ಸೆ.9ರಂದು ಬೆಳಗಿನ ಜಾವ 2.30ರ ಸುಮಾರಿಗೆ ಮನೆಗೆ ವಾಪಸಾಗುತ್ತಿದ್ದಾಗ ಧಾರಾಕಾರ ಮಳೆಯಾಗುತ್ತಿದ್ದರಿಂದ ರಸ್ತೆ ಬದಿ ವಾಹನ ನಿಲ್ಲಿಸಿದ್ದರು.
ಇದನ್ನೂ ಓದಿ: ನಿಂತಿದ್ದ ಲಾರಿಗೆ ಕಾರು ಡಿಕ್ಕಿ: 5 ಮಂದಿ ಸಾವು, 7 ಮಂದಿಗೆ ಗಂಭೀರ ಗಾಯ
ಈ ಸಮಯದಲ್ಲಿ ಬಶೀರ್ ಶೇಖ್ ರಸ್ತೆ ದಾಟಲು ಯತ್ನಿಸುತ್ತಿದ್ದಾಗ ವೇಗವಾಗಿ ಬಂದ ಕಾರು ಡಿಕ್ಕಿ ಹೊಡೆದಿತ್ತು. ಇದರಿಂದ ಗಂಭೀರ ಗಾಯಗೊಂಡಿದ್ದ ಬಶೀರ್ ಶೇಖ್ ಆಸ್ಪತ್ರೆಗೆ ಕರೆದೊಯ್ಯುವಾಗ ಮೃತಪಟ್ಟಿದ್ದರು. ಈ ಪ್ರಕರಣ ನ್ಯಾಯಮಂಡಳಿಯ ಮೆಟ್ಟಿಲೇರಿತ್ತು. ಇತ್ತೀಚೆಗೆ ನ್ಯಾಯಮಂಡಳಿಯ ಸದಸ್ಯ ಎಂಎಂ ವಲಿಮೊಹಮ್ಮದ್ ಈ ಪ್ರಕರಣದ ತೀರ್ಪು ಹೊರಡಿಸಿದ್ದಾರೆ.
ಬಶೀರ್ ಶೇಖ್ ಸಾವಿಗೆ ಕಾರಣವಾದ ಕಾರಿನ ಮಾಲೀಕತ್ವದ ಸಯಾಲಿ ಟೂರ್ಸ್ ಮತ್ತು ಟ್ರಾವೆಲ್ಸ್‌ ಮತ್ತು ಇನ್ಶುರೆನ್ಸ್ ಕಂಪನಿಯಾದ ನ್ಯೂ ಇಂಡಿಯಾ ಅಶ್ಯೂರೆನ್ಸ್ ಕೋ ಲಿಮಿಟೆಡ್ಗೆ 33.30 ಲಕ್ಷ ರೂಪಾಯಿ ಹಾಗೂ ಭವಿಷ್ಯ ನಿಧಿಯಾಗಿ 13.32 ಲಕ್ಷ ರೂಪಾಯಿ ಸೇರಿ ಒಟ್ಟು 46.62 ಲಕ್ಷ ರೂಪಾಯಿ ಪರಿಹಾರವನ್ನು ಪಾವತಿಸಲು ಆದೇಶಿಸಿದೆ. ಇದಲ್ಲದೆ ಅಂತ್ಯಕ್ರಿಯೆ ಸೇರಿ ಇತರ ವೆಚ್ಚಗಳಿಗೆ 60 ಸಾವಿರ ರೂಪಾಯಿ ಪಾವತಿಸುವಂತೆ ನ್ಯಾಯಮಂಡಳಿ ಸೂಚಿಸಿದೆ. ಇದರಲ್ಲಿ ಮಕ್ಕಳಿಗೆ ಠೇವಣಿಯಾಗಿ 3 ಲಕ್ಷ ರೂಪಾಯಿ, ಮೃತನ ತಾಯಿಗೆ 2 ಲಕ್ಷ ರೂಪಾಯಿ ಮತ್ತು ಉಳಿದ ಮೊತ್ತವನ್ನು ವಿಧವೆ ಪತ್ನಿಗೆ ನೀಡಬೇಕೆಂದು ನ್ಯಾಯಮಂಡಳಿ ತನ್ನ ಆದೇಶದಲ್ಲಿ ತಿಳಿಸಿದೆ.
ಇದನ್ನೂ ಓದಿ: ತಪ್ಪಾಗಿ ಪಿಂಚಣಿ ನಿಗದಿ: 5 ಲಕ್ಷ 63 ಸಾವಿರ ಬಡ್ಡಿ ಪರಿಹಾರ ನೀಡುವಂತೆ ಪಿಎಫ್ ಇಲಾಖೆ ಗ್ರಾಹಕರ ಆಯೋಗದ ಆದೇಶ
