ನವದೆಹಲಿ: ದೇಶಾದ್ಯಂತ ಟೊಮೆಟೊ ಬೆಲೆ ದಿನದಿಂದ ದಿನಕ್ಕೆ ಹೆಚ್ಚಾಗುತ್ತಿದೆ. ಹೌದು, ದೇಶದ ಕೆಲವು ರಾಜ್ಯಗಳಲ್ಲಂತೂ ಟೊಮೆಟೊ ಬೆಲೆ 150ರಿಂದ 200 ರೂ. ಗಡಿ ಮುಟ್ಟಿದೆ. ಇದರ ಪರಿಣಾಮ ಹೋಟೆಲ್, ರೆಸ್ಟೋರೆಂಟ್ ಮತ್ತು ಢಾಬಾಗಳಿಗೆ ಜೋರಾಗಿಯೇ ತಟ್ಟಿದೆ. ಎಲ್ಲಾ ಹೋಟೆಲ್ಗಳಲ್ಲಿ ಆಹಾರದಿಂದ ಟೊಮೆಟೊಗಳು ಕಣ್ಮರೆಯಾಗುತ್ತವೆ. ಅಡುಗೆ ಭಟ್ಟರು ಲೆಕ್ಕಾಹಾಕಿ ಟೊಮೆಟೊಗಳನ್ನು ಆಹಾರಕ್ಕಾಗಿ ಬಳಕೆ ಮಾಡುತ್ತಿದ್ದಾರೆ.
"ನಾವು ಮೊದಲು 20ರಿಂದ 25 ಕೆಜಿ ಟೊಮೆಟೊ ಬಳಸುತ್ತಿದ್ದೆವು. ಆದರೆ, ಈಗ ನಾವು 5ರಿಂದ 7 ಕೆಜಿ ಟೊಮೆಟೊ ಮಾತ್ರ ಬಳಕೆ ಮಾಡುತ್ತಿದ್ದೇವೆ. ಟೊಮೆಟೊ ತುಂಬಾ ದುಬಾರಿಯಾಗಿದೆ. ನಾವು ನಮ್ಮ ಢಾಬಾದಲ್ಲಿ ಬೆಲೆಗಳನ್ನು ಹೆಚ್ಚಿಸಲು ಸಾಧ್ಯವಿಲ್ಲ. ಭಕ್ಷ್ಯಗಳು ಇಲ್ಲದಿದ್ದರೆ ನಾವು ಗ್ರಾಹಕರನ್ನು ಕಳೆದುಕೊಳ್ಳುತ್ತೇವೆ. ನಾವು ಈಗ ಟೊಮೆಟೊ ಬದಲಿಗೆ ಈರುಳ್ಳಿಯನ್ನು ಬಳಸುತ್ತಿದ್ದೇವೆ. ಇದರಿಂದ ರುಚಿಯಲ್ಲಿ ಸ್ವಲ್ಪ ವ್ಯತ್ಯಾಸವಿದೆ" ಹೇಳುತ್ತಾರೆ ಎಂದು ದೆಹಲಿಯ ಗೌತಮ್ ನಗರದ ಮಾಮಾ ಢಾಬಾದ ಬಾಣಸಿಗ ಸುನಿಲ್ ಕುಮಾರ್ ಯಾದವ್.
ಪೆಟ್ರೋಲಿಗಿಂತಲೂ ದುಬಾರಿಯಾದ ಟೊಮೆಟೊ: ದೇಶದೆಲ್ಲೆಡೆ ಟೊಮೆಟೊ ಬೆಲೆ ಗಗಮುಖಿಯಾಗುತ್ತಿದೆ. ಪೆಟ್ರೋಲ್ ದರಕ್ಕಿಂತಲೂ ಟೊಮೆಟೊ ಬಲು ದುಬಾರಿಯಾಗಿದೆ. ಮಾರುಕಟ್ಟೆಗೆ ಟೊಮೆಟೊ ಆವಕ ತೀರಾ ಇಳಿಕೆಯಾಗಿದೆ. ಮಾರುಕಟ್ಟೆಗಳಲ್ಲಿ ಲಭ್ಯವಾಗುವ ಎಲ್ಲ ತರಕಾರಿಗಳಲ್ಲೇ ಟೊಮೆಟೊ ದರ ಉತ್ತುಂಗಕ್ಕೆ ಏರಿಕೆಯಾಗಿದೆ. ಇದರ ಬೆಲೆ ಏರಿಕೆಯಿಂದ ಟೊಮೆಟೊ ಪ್ರಿಯರಿಗೆ ತೀವ್ರ ನಿರಾಶೆ ಉಂಟಾಗಿದೆ. ಮೇ ತಿಂಗಳ ಆರಂಭದಲ್ಲಿ 15 ರೂಪಾಯಿ ಇದ್ದ ಟೊಮೆಟೊ ಸದ್ಯ 150ರಿಂದ 200 ರೂಪಾಯಿವರಿಗೆ ಇದೆ.
ಮೆಕ್ಡೊನಾಲ್ಡ್ನಲ್ಲಿ ಟೊಮೆಟೊ ಬಳಕೆ ಕಡಿಮೆ: ಸದ್ಯದ ಸರದಿ ಮೆಕ್ಡೊನಾಲ್ಡ್ ಪ್ರಿಯರಿಗೂ ಆಗಿದೆ. ಟೊಮೆಟೊ ಲಭ್ಯತೆ ಕೊರತೆಯಾಗಿರುವುದರಿಂದ ದೆಹಲಿ ಸೇರಿದಂತೆ ವಿವಿಧ ರಾಜ್ಯಗಳ ಮೆಕ್ಡೊನಾಲ್ಡ್ ಕೇಂದ್ರದಲ್ಲಿ ಟೊಮೆಟೊವನ್ನು ತಮ್ಮ ತಿನಿಸುಗಳಿಗೆ ಬಳಸಲಾಗುತ್ತಿಲ್ಲ. ಇದಕ್ಕೆ ಗ್ರಾಹಕರು ಸಹಕರಿಸಬೇಕು ಎಂದು ಮೆಕ್ಡೊನಾಲ್ಡ್ ಕೇಂದ್ರಗಳು ನೋಟಿಸ್ಗಳನ್ನು ಕೂಡಾ ಅಂಗಡಿ ಎದುರು ಅಂಟಿಸಿವೆ.
ಪ್ರಿಯ ಗ್ರಾಹಕರೆ, ನಾವು ನಿಮಗೆ ಉತ್ತಮ ಸೇವೆ ಹಾಗೂ ಉತ್ತಮ ಆಹಾರ ಸಾಮಗ್ರಿಗಳ ನೀಡುವ ಬದ್ಧತೆ ನಮಗಿದೆ. ನಮ್ಮ ವಿಶ್ವ ದರ್ಜೆಯ ಗುಣಮಟ್ಟದ ತಪಾಸಣೆಗೆ ಒಳಗಾಗಿರುವ ಸಾಕಷ್ಟು ಪ್ರಮಾಣದ ಟೊಮೆಟೊಗಳನ್ನು ಪಡೆಯಲು ನಮಗೆ ಆಗುತ್ತಿಲ್ಲ. ಇದರಿಂದ ನಾವು ಟೊಮೆಟೊ ಇಲ್ಲದೇ ಆಹಾರವನ್ನು ನೀಡಬೇಕಾಗಿದೆ. ಟೊಮೆಟೊ ಪೂರೈಕೆ ಪೂರೈಕೆಗೆ ನಾವು ಪ್ರಯತ್ನ ಮಾಡುತ್ತಿದ್ದೇವೆ.
ಪ್ರಸ್ತುತ ಇದು ತಾತ್ಕಾಲಿಕ ಸಮಸ್ಯೆ ಆಗಿದೆ. ಶೀಘ್ರದಲ್ಲೇ ನಮ್ಮ ಮೆನುಗೆ ಟೊಮೆಟೊ ಅನ್ನು ಸೇರ್ಪಡೆ ಮಾಡುತ್ತೇವೆ. ಈಗಾಗಲೇ ನಿಮಗೆ ಆಗಿರುವ ಅನಾನುಕೂಲತೆಗೆ ವಿಷಾದಿಸುತ್ತೇವೆ ಎಂದು ದೆಹಲಿಯ ಮೆಕ್ಡೊನಾಲ್ಡ್ ಅಂಗಡಿ ಮುಂದೆ ಸೂಚನಾ ಪತ್ರವನ್ನು ಅಂಟಿಸಿರುವುದು ಕಂಡುಬಂದಿದೆ.
ಸದ್ಯ ಈ ಸೂಚನಾ ಪತ್ರವು ಸಾಮಾಜಿಕ ಜಾಲತಾಣದಲ್ಲಿ ಅತಿ ಹೆಚ್ಚು ಬಾರಿ ಟ್ವೀಟ್ ಆಗಿದೆ. ಎಲ್ಲೆಡೆ ಭಾರಿ ವೈರಲ್ ಆಗುತ್ತಿದೆ. ದೆಹಲಿಯ ಮೆಕ್ಡೊನಾಲ್ಡ್ಗಳಲ್ಲಿ ಟೊಮೆಟೊ ಬಳಕೆ ಅಭಾವ ಕಂಡು ಬಂದಿದೆ. ಪಂಜಾಬ್ ಸೇರಿದಂತೆ ಹಲವೆಡೆ ಟೊಮೆಟೊ ಉಪಯೋಗಿಸುವುದಾಗಿ ಫಾಸ್ಟ್ ಫುಡ್ ಸಂಸ್ಥೆ ಹೇಳಿದೆ. ಟೊಮೆಟೊ ಬೆಲೆ ಹೆಚ್ಚಳಕ್ಕೆ ಅನೇಕ ಕಾರಣಗಳಿದ್ದು, ಶಾಖದ ಅಲೆ ಹಾಗೂ ಅತಿಯಾದ ಮಳೆ ಆಗುತ್ತಿರುವುದು ಕೂಡ ಟೊಮೆಟೊ ಬೆಳೆಯುವ ಪ್ರದೇಶದ ಮೇಲೆ ಪರಿಣಾಮ ಉಂಟಾಗಿದೆ. ಹೀಗಾಗಿ ಟೊಮೆಟೊ ಪೂರೈಕೆ ಮೇಲೆ ಇದು ಪರಿಣಾಮವಾಗಿದ್ದು, ಉತ್ಪಾದನೆ ಇಳಿಕೆಯಾಗಿದೆ. ಮಾರುಕಟ್ಟೆಯಲ್ಲೂ ಟೊಮೆಟೊ ಅಭಾವ ಹೆಚ್ಚಾಗಿದೆ.
ಇದನ್ನೂ ಓದಿ: Tomato: ತಮಿಳುನಾಡು ಪಡಿತರ ಅಂಗಡಿಗಳಲ್ಲಿ ಧಾನ್ಯಗಳ ಜೊತೆಗೆ ₹60ಗೆ ಕೆಜಿ ಟೊಮೆಟೊ ಮಾರಾಟ
