ಪಿಲಿಭಿತ್ (ಉತ್ತರಪ್ರದೇಶ) : ಹುಲಿಯೊಂದು ಉತ್ತರ ಪ್ರದೇಶದ ಹಳ್ಳಿಯ ಜನರನ್ನು ರಾತ್ರಿಯಿಡೀ ಎಚ್ಚರವಾಗಿರುವಂತೆ ಮಾಡಿದೆ. ರಾತ್ರಿ ವೇಳೆ ಗ್ರಾಮಕ್ಕೆ ನುಗ್ಗಿದ ವ್ಯಾಘ್ರ ಮನೆಯೊಂದರ ಗೋಡೆಯ ಮೇಲೆ ಹತ್ತಿ ಮಲಗಿದೆ. ಬೆಳಗ್ಗೆವರೆಗೂ ಅಲ್ಲಿಯೇ ಮಲಗಿದೆ. ಇದನ್ನು ಕಂಡ ಜನರು ಅರಣ್ಯ ಇಲಾಖೆಗೆ ಮಾಹಿತಿ ನೀಡಿದ್ದು, ಸಿಬ್ಬಂದಿ ಅದನ್ನು ಹಿಡಿದು ರಕ್ಷಿಸಿದ್ದಾರೆ. ಇದರ ವಿಡಿಯೋಗಳು ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿವೆ.
ಹುಲಿ ರಕ್ಷಿತಾರಣ್ಯವಾಗಿರುವ ಪಿಲಿಭಿತ್ ಪ್ರದೇಶದಲ್ಲಿ ಹುಲಿಗಳ ಓಡಾಟ ಸಹಜವಾಗಿದೆ. ಈಗಾಗಲೇ ಹಲವು ಜನರ ಮೇಲೆ ದಾಳಿ ಮಾಡಿದ ಪ್ರಕರಣಗಳೂ ನಡೆದಿವೆ. ಮಂಗಳವಾರ ಮಧ್ಯರಾತ್ರಿಯಲ್ಲಿ ವ್ಯಾಘ್ರವೊಂದು ಗ್ರಾಮಕ್ಕೆ ಬಂದು ರೈತನ ಮನೆಯೊಂದರ ಗೋಡೆಯ ಮೇಲೆ ಮಲಗಿದೆ. ಇದನ್ನು ಕಂಡ ನಾಯಿಗಳು ಬೊಗಳಲಾರಂಭಿಸಿವೆ. ರೈತ ಹೊರಬಂದು ನೋಡಿದಾಗ ಹುಲಿ ಕಂಡು ಬೆದರಿದ್ದಾನೆ. ತಕ್ಷಣವೇ ಈ ಸುದ್ದಿ ಗ್ರಾಮದ ತುಂಬೆಲ್ಲಾ ಹರಡಿದೆ.
ರಾತ್ರಿಪೂರ್ತಿ ಗೋಡೆಯ ಮೇಲೆ ಮಲಗಿದ ವ್ಯಾಘ್ರ: ಹುಲಿಯನ್ನು ಓಡಿಸಲು ಜನರು ಟಾರ್ಚ್ನ ಬೆಳಕನ್ನು ಹುಲಿಯ ಕಡೆಗೆ ಬಿಟ್ಟಿದ್ದಾರೆ. ಜೋರಾದ ಸದ್ದು ಕೂಡ ಮಾಡಿದ್ದಾರೆ. ಏನೇ ಮಾಡಿದರೂ ಹುಲಿ ಮಾತ್ರ ಅಲ್ಲಿಂದ ಕದಲಲಿಲ್ಲ. ಇದರಿಂದ ಸುಸ್ತಾದ ಜನರು ಅರಣ್ಯ ಇಲಾಖೆ ಸಿಬ್ಬಂದಿಗೆ ಮಾಹಿತಿ ನೀಡಿದ್ದಾರೆ. ಸೂರ್ಯೋದಯವಾದರೂ, ಎದ್ದೇಳದ ಹುಲಿ ಗೋಡೆಯ ಮೇಲೆ ಹಾಗೆಯೇ ಮಲಗಿತ್ತು. ಜನರ ಇದನ್ನು ನೋಡಲು ಸುತ್ತುವರಿದಿದ್ದರು. ಬಳಿಕ ಅದು ಎದ್ದು ನಿಂತು ಸುತ್ತಲೂ ನೋಡಿ ಮತ್ತೆ ಅದೇ ಜಾಗದಲ್ಲಿ ಮಲಗಿದೆ.
ಜನರು ಸುತ್ತಲೂ ನೆರೆದಿದ್ದರೂ ದಾಳಿ ಮಾಡದೇ ಶಾಂತವಾಗಿ ಮಲಗಿತ್ತು. ಬಳಿಕ ಸ್ಥಳಕ್ಕೆ ಬಂದ ಅರಣ್ಯ ಸಿಬ್ಬಂದಿ ಬಲೆ ಬೀಸಿ ಹಿಡಿದು ರಕ್ಷಿಸಿದ್ದಾರೆ. ಹುಲಿ ಒಂದೇ ಸ್ಥಳದಲ್ಲಿ ರಾತ್ರಿಯಿಂದ ಮಲಗಿದ್ದು ಗ್ರಾಮಸ್ಥರಿಗೆ ಅಚ್ಚರಿ ಮೂಡಿಸಿದೆ. ವ್ಯಾಘ್ರ ಗಾಯಗೊಂಡಿತ್ತಾ ಅಥವಾ ಬಳಲಿತ್ತಾ ಎಂಬ ಬಗ್ಗೆ ಮಾಹಿತಿ ಸಿಕ್ಕಿಲ್ಲ. ಹುಲಿ ಶಾಂತವಾಗಿ ಮಲಗಿದ ವಿಡಿಯೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿವೆ.
ಇನ್ನು, ಪಿಲಿಭಿತ್ ಹುಲಿ ಸಂರಕ್ಷಿತ ಪ್ರದೇಶವಾಗಿದ್ದರಿಂದ ಜಿಲ್ಲೆಯಲ್ಲಿ ನಾಲ್ಕು ತಿಂಗಳಲ್ಲಿ ಹುಲಿ ದಾಳಿಗೆ 5 ಮಂದಿ ಸಾವಿಗೀಡಾಗಿದ್ದಾರೆ. 2015 ರಲ್ಲಿ ಹುಲಿ ಸಂರಕ್ಷಿತ ಪ್ರದೇಶವೆಂದು ಘೋಷಿಸಿದಾಗಿನಿಂದ ಕನಿಷ್ಠ 40 ಹೆಚ್ಚು ಹುಲಿ ದಾಳಿ ಘಟನೆಗಳು ವರದಿಯಾಗಿವೆ. ಅಧಿಕಾರಿಗಳು ಗ್ರಾಮಗಳತ್ತ ಓಡಾಡುವ ಹುಲಿಗಳನ್ನು ಹಿಡಿದು ಕಾಡಿಗೆ ಬಿಡಲು ನಿರ್ಲಕ್ಷ್ಯ ತೋರುತ್ತಿದ್ದಾರೆ ಎಂದು ಇಲ್ಲಿನ ಜನರು ಆರೋಪಿಸುತ್ತಾರೆ.
ಇದನ್ನೂ ಓದಿ: 5 ವರ್ಷಗಳಲ್ಲಿ ಹುಲಿ ದಾಳಿಗೆ 293, ಆನೆ ದಾಳಿಗೆ 2,657 ಜನ ಸಾವು: 3 ವರ್ಷದಲ್ಲಿ 400 ಸಿಂಹಗಳ ಮರಣ!
