ಜನರ ಪರ ಹೋರಾಡುವವರಿಗೆ ಮಾತ್ರ ಚುನಾವಣಾ ಟಿಕೆಟ್ : ರಾಹುಲ್ ಗಾಂಧಿ

ಹೈದರಾಬಾದ್‌ನಲ್ಲಿ ಕುಳಿತರೆ ಟಿಕೆಟ್ ಸಿಗುವುದಿಲ್ಲ. ದೆಹಲಿಗೆ ಬರಬೇಡಿ. ನಿಮ್ಮ ಕ್ಷೇತ್ರಗಳಿಗೆ, ಗ್ರಾಮಗಳಿಗೆ ಹೋಗಿ, ಬೀದಿಗಿಳಿದು ಕೆಲಸ ಮಾಡಿ. ಹೈದರಾಬಾದ್‌ನಲ್ಲಿ ನಿಮಗೆ ಒಳ್ಳೆಯ ಬಿರಿಯಾನಿ ಮತ್ತು ಚಾಯ್ ಸಿಗುತ್ತದೆ ಎಂದು ನನಗೆ ತಿಳಿದಿದೆ. ಹೈದರಾಬಾದ್ ಬಿಟ್ಟು ಹಳ್ಳಿಗಳಿಗೆ ಹೋಗಿ ಜನರೊಂದಿಗೆ, ಜನರ ಪರವಾಗಿ ಇರಬೇಕು ಎಂದು ರಾಹುಲ್ ಗಾಂಧಿ ಅವರು ಪಕ್ಷದ ಮುಖಂಡರಿಗೆ ಸಲಹೆ ನೀಡಿದರು..

ಹೈದರಾಬಾದ್, ತೆಲಂಗಾಣ : ಜನರ ಮಧ್ಯೆ ಇದ್ದು ಅವರಿಗಾಗಿ ಹೋರಾಡುವವರಿಗೆ ಮಾತ್ರ ಮುಂದಿನ ವರ್ಷ ನಡೆಯಲಿರುವ ವಿಧಾನಸಭಾ ಚುನಾವಣೆಯಲ್ಲಿ ಟಿಕೆಟ್ ಸಿಗಲಿದೆ ಎಂದು ಕಾಂಗ್ರೆಸ್ ಅಧ್ಯಕ್ಷ ರಾಹುಲ್ ಗಾಂಧಿ ಎಚ್ಚರಿಕೆ ನೀಡಿದ್ದಾರೆ. ತೆಲಂಗಾಣದಲ್ಲಿ ಎರಡನೇ ದಿನದ ಪ್ರವಾಸದಲ್ಲಿರುವ ರಾಹುಲ್ ಗಾಂಧಿ, ಮಾಧ್ಯಮಗಳ ಮುಂದೆ ಪಕ್ಷದ ಮುಖಂಡರು ತಮ್ಮ ಕೊರತೆಗಳನ್ನು ಹೇಳಿಕೊಳ್ಳಬಾರದು ಎಂದು ಸೂಚನೆ ನೀಡಿದ್ದಷ್ಟೇ ಅಲ್ಲ, ಆಯಾ ಕ್ಷೇತ್ರಗಳಿಗೆ ಹೋಗಿ ಕೆಲಸ ಮಾಡುವಂತೆ ಪಕ್ಷದ ಮುಖಂಡರನ್ನು ಒತ್ತಾಯಿಸಿದ್ದಾರೆ.

ಹೈದರಾಬಾದ್‌ನಲ್ಲಿರುವ ಕಾಂಗ್ರೆಸ್​ ಪಕ್ಷದ ಪ್ರಧಾನ ಕಚೇರಿಯಾದ ಗಾಂಧಿ ಭವನದಲ್ಲಿ ತೆಲಂಗಾಣ ಪ್ರದೇಶ ಕಾಂಗ್ರೆಸ್ ಸಮಿತಿಯ (ಟಿಪಿಸಿಸಿ) ಸಭೆಯನ್ನು ಉದ್ದೇಶಿಸಿ ಮಾತನಾಡಿದ ರಾಹುಲ್ ಗಾಂಧಿ, ಮುಂಬರುವ ಚುನಾವಣೆಯು ಟಿಆರ್‌ಎಸ್ ಮತ್ತು ಕಾಂಗ್ರೆಸ್ ನಡುವೆ ನೇರ ಹಣಾಹಣಿಯಾಗಲಿದೆ ಎಂದು ಪುನರುಚ್ಚರಿಸಿದರು. ಅಷ್ಟೇ ಅಲ್ಲ, ಅರ್ಹತೆಯ ಆಧಾರದ ಮೇಲೆ ಮಾತ್ರ ಟಿಕೆಟ್ ನೀಡಲಾಗುವುದು ಎಂದು ಸ್ಪಷ್ಟಪಡಿಸಿದರು.

'ಕೆಲಸಕ್ಕೆ ತಕ್ಕ ಪ್ರತಿಫಲ ಸಿಗುತ್ತದೆ': ಯಾರೂ ಯಾವುದೇ ಭ್ರಮೆಗೆ ಒಳಗಾಗಬಾರದು. ಜನರ ಮಧ್ಯೆ ಕೆಲಸ ಮಾಡುವವರು, ರೈತರು, ಕಾರ್ಮಿಕರು, ಸಣ್ಣ ವ್ಯಾಪಾರಿಗಳು, ಯುವಕರ ಪರ ಹೋರಾಟ ಮಾಡುವವರಿಗೆ ಅರ್ಹತೆಯ ಆಧಾರದ ಮೇಲೆ ಟಿಕೆಟ್ ಸಿಗುತ್ತದೆ. ನಮ್ಮ ಪಕ್ಷ ಒಂದು ಕುಟುಂಬ. ತಾರತಮ್ಯ ಮಾಡಲಾಗುತ್ತಿದೆ ಎಂಬ ಭಾವನೆ ಬೇಡ. ಮಾಡಿದ ಕೆಲಸಕ್ಕೆ ತಕ್ಕ ಪ್ರತಿಫಲ ಸಿಗುತ್ತದೆ. ಎಷ್ಟೇ ಹಿರಿಯ ನಾಯಕರಾಗಿದ್ದರೂ ಪಕ್ಷದಲ್ಲಿ ಎಷ್ಟು ವರ್ಷ ಕಳೆದರೂ ಪರವಾಗಿಲ್ಲ. ಕೆಲಸ ಮಾಡುವುದಿಲ್ಲವೆಂದರೆ, ನಿಮಗೆ ಟಿಕೆಟ್ ಸಿಗುವುದಿಲ್ಲ. ಜನರ ಪ್ರತಿಕ್ರಿಯೆ ತೆಗೆದುಕೊಂಡ ನಂತರ ಅರ್ಹ ಅಭ್ಯರ್ಥಿಗೆ ಟಿಕೆಟ್ ನೀಡಲಾಗುತ್ತದೆ ಎಂದು ರಾಹುಲ್ ಹೇಳಿದ್ದಾರೆ.

'ಹೈದರಾಬಾದ್ ಬಿಟ್ಟು ಹೋಗಿ' : ಹೈದರಾಬಾದ್‌ನಲ್ಲಿ ಕುಳಿತರೆ ಟಿಕೆಟ್ ಸಿಗುವುದಿಲ್ಲ. ದೆಹಲಿಗೆ ಬರಬೇಡಿ. ನಿಮ್ಮ ಕ್ಷೇತ್ರಗಳಿಗೆ, ಗ್ರಾಮಗಳಿಗೆ ಹೋಗಿ, ಬೀದಿಗಿಳಿದು ಕೆಲಸ ಮಾಡಿ. ಹೈದರಾಬಾದ್‌ನಲ್ಲಿ ನಿಮಗೆ ಒಳ್ಳೆಯ ಬಿರಿಯಾನಿ ಮತ್ತು ಚಾಯ್ ಸಿಗುತ್ತದೆ ಎಂದು ನನಗೆ ತಿಳಿದಿದೆ. ಹೈದರಾಬಾದ್ ಬಿಟ್ಟು ಹಳ್ಳಿಗಳಿಗೆ ಹೋಗಿ ಜನರೊಂದಿಗೆ, ಜನರ ಪರವಾಗಿ ಇರಬೇಕು ಎಂದು ರಾಹುಲ್ ಗಾಂಧಿ ಅವರು ಪಕ್ಷದ ಮುಖಂಡರಿಗೆ ಸಲಹೆ ನೀಡಿದರು.

'ಮಗುವನ್ನು ಕೇಳಿದರೂ ಹೇಳಬೇಕು': ಶುಕ್ರವಾರದ ಸಾರ್ವಜನಿಕ ಸಭೆಯಲ್ಲಿ ಭಾಗವಹಿಸಿದ್ದ ರಾಹುಲ್ ಗಾಂಧಿ ಕೆಲವೊಂದು ಘೋಷಣೆಗಳನ್ನು ಮಾಡಿದರು. ಇದನ್ನು ವಾರಂಗಲ್ ಘೋಷಣೆ ಎಂದು ಕರೆಯಲಾಗಿದೆ. ವಾರಂಗಲ್ ಘೋಷಣೆಯು ಅತ್ಯಂತ ಮುಖ್ಯ ಎಂದಿರುವ ರಾಹುಲ್ ಗಾಂಧಿ, ವಾರಂಗಲ್ ಘೋಷಣೆಯ ಬಗ್ಗೆ ರಾಜ್ಯದ ಪ್ರತಿಯೊಬ್ಬ ನಾಗರಿಕರಿಗೆ ಮತ್ತು ಪ್ರತಿಯೊಬ್ಬ ರೈತರಿಗೆ ತಿಳಿಸುವುದು ಪಕ್ಷದ ಮುಖಂಡರ ಮೊದಲ ಕೆಲಸವಾಗಿದೆ. ಇದು ಬರೀ ಘೋಷಣೆಯಲ್ಲ, ಕಾಂಗ್ರೆಸ್ ಪಕ್ಷ ಮತ್ತು ತೆಲಂಗಾಣ ರೈತರ ಪಾಲುದಾರಿಕೆ ಹಾಗೂ ಕಾಂಗ್ರೆಸ್ ಪಕ್ಷದ ಗ್ಯಾರಂಟಿ ಎಂದು ಭರವಸೆ ವ್ಯಕ್ತಪಡಿಸಿದರು.

ಮುಂದಿನ ಒಂದು ತಿಂಗಳಲ್ಲಿ ಎಲ್ಲಾ ಕಾಂಗ್ರೆಸ್ ನಾಯಕರು ತಮ್ಮ ತಮ್ಮ ಕ್ಷೇತ್ರಗಳು ಮತ್ತು ಪ್ರದೇಶಗಳಲ್ಲಿ ವಾರಂಗಲ್ ಘೋಷಣೆಯ ಬಗ್ಗೆ ಪ್ರತಿಯೊಬ್ಬ ವ್ಯಕ್ತಿಗೆ ವಿವರವಾಗಿ ವಿವರಿಸಬೇಕು. ನಾನು 12 ವರ್ಷದ ಮಗುವನ್ನು ಕೇಳಿದರೂ, ಆ ಮಗು ನನಗೆ ವಾರಂಗಲ್ ಘೋಷಣೆಯ ಎಲ್ಲಾ ಅಂಶಗಳನ್ನು ಹೇಳಲೇಬೇಕು ಎಂದು ರಾಹುಲ್ ಹೇಳಿದ್ದಾರೆ.

ಇದನ್ನೂ ಓದಿ: ಎಲ್​ಪಿಜಿ, ಇಂಧನ ಬೆಲೆ ಏರಿಕೆ: ಚಿಂತೆ ಪಡುವ ಅಗತ್ಯವಿಲ್ಲ ಎಂದ ಗೋವಾ ಸಿಎಂ ಪತ್ನಿ