'ಹೆಣ್ಣು ಮಕ್ಕಳು ನೇಗಿಲು ಮುಟ್ಟಿದರೆ ಮಳೆ ಆಗಲ್ಲ': ಮಹಿಳೆಯನ್ನು ಪಂಚಾಯಿತಿಗೆ ಎಳೆದುತಂದ ಗ್ರಾಮಸ್ಥರು!

ಉತ್ತರ ಪ್ರದೇಶದ ಸೋನಭದ್ರ ಜಿಲ್ಲೆಯಲ್ಲಿ ಮಹಿಳೆ ನೇಗಿಲು ಮುಟ್ಟಿದ ಕಾರಣಕ್ಕೆ ಮಳೆ ಆಗಿಲ್ಲ ಎಂದು ಗ್ರಾಮಸ್ಥರು ಆಕೆಯನ್ನು ಪಂಚಾಯಿತಿಗೆ ಕರೆತಂದು ಶಿಕ್ಷೆ ವಿಧಿಸಲು ಮುಂದಾಗಿದ್ದ ಘಟನೆ ವರದಿಯಾಗಿದೆ.

ಸೋನಭದ್ರ (ಉತ್ತರ ಪ್ರದೇಶ): ಮಳೆಗಾಗಿ ಗ್ರಾಮೀಣ ಭಾಗ ಜನರು ಅನೇಕ ರೀತಿಯ ಪದ್ಧತಿಗಳನ್ನು ಆಚರಿಸುವ ವಾಡಿಕೆ ಇದೆ. ವರುಣನಿಗಾಗಿ ದೇವರ ಮೊರೆ ಹೋಗುವುದು, ಹರಕೆ ಹೊತ್ತುಕೊಳ್ಳುವುದು ಸಾಮಾನ್ಯ. ಜೊತೆಗೆ ನಾಯಿ, ಕಪ್ಪೆಗಳ ಮದುವೆ ಮಾಡಿಸುವ ಪದ್ಧತಿ ಸಹ ಅನೇಕ ಕಡೆಗಳಲ್ಲಿ ಇದೆ. ಇದರೊಂದಿಗೆ ಮಳೆ ಬಾರದೇ ಇರುವುದಕ್ಕೂ ಕೆಲ ಅಪನಂಬಿಕೆಗಳು ಹಳ್ಳಿ ಜನರಲ್ಲಿ ಇವೆ. ಇಂತಹದ್ದೊಂದು ಪ್ರಕರಣದಲ್ಲಿ ಓರ್ವ ಮಹಿಳೆಯನ್ನು ಪಂಚಾಯಿತಿ​ಗೆ ಎಳೆದುತಂದ ಘಟನೆ ಉತ್ತರ ಪ್ರದೇಶದ ಸೋನಭದ್ರ ಜಿಲ್ಲೆಯಲ್ಲಿ ಬೆಳಕಿಗೆ ಬಂದಿದೆ.

ಇಲ್ಲಿನ ಮಯೋರ್‌ಪುರ ಪೊಲೀಸ್ ಠಾಣೆ ವ್ಯಾಪ್ತಿಯ ರಾಸ್ ಪಹಾರಿ ಗ್ರಾಮದಲ್ಲಿ ಮಹಿಳೆಯೊಬ್ಬರು ನೇಗಿಲು ಮುಟ್ಟಿದ ಕಾರಣಕ್ಕೆ ಆಕೆಯನ್ನು ಗ್ರಾಮಸ್ಥರು ಪಂಚಾಯಿತಿ​ಗೆ ಕರೆದುಕೊಂಡು ಬಂದು ಶಿಕ್ಷಿಸಲು ಮುಂದಾಗಿದ್ದ ಘಟನೆ ವರದಿಯಾಗಿದೆ. ಆ ಮಹಿಳೆ ಕೆಲ ದಿನಗಳ ಹಿಂದೆ ತಮ್ಮ ಜಮೀನಿಗೆ ಹೋಗಿದ್ದರು. ಆಗ ಹೊಲದಲ್ಲಿ ನೇಗಿಲು ಬಿಡಲಾಗಿತ್ತು. ಹೊಲದಲ್ಲೇ ಇದ್ದರೆ ಕಳ್ಳತನವಾಗಬಹುದೆಂದು ಆತಂಕಗೊಂಡು ಆ ನೇಗಿಲನ್ನು ಆಕೆಯೇ ಮನೆಗೆ ಹೊತ್ತುಕೊಂಡು ಬಂದಿದ್ದರು. ಇದನ್ನು ನೆರೆಹೊರೆಯವರು ನೋಡಿದ್ದಾರೆ.

ಅಂತೆಯೇ, ನೇಗಿಲು ಹೊತ್ತುಕೊಂಡ ಕಾರಣಕ್ಕೆ ಮಹಿಳೆಯ ವಿರುದ್ಧ ಗ್ರಾಮಸ್ಥರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಬುಡಕಟ್ಟು ಸಮಾಜದಲ್ಲಿ ಕೆಲ ನಂಬಿಕೆ, ಸಂಪ್ರದಾಯಗಳಿವೆ. ಇದರಲ್ಲಿ ಮಹಿಳೆ ನೇಗಿಲು ಮುಟ್ಟಿದರೆ ಮಳೆ ಬರುವುದಿಲ್ಲ ಎಂಬ ನಂಬಿಕೆಯೂ ಇದೆ. ನಮ್ಮ ಪೂರ್ವಜರೂ ಇದನ್ನು ಅನುಸರಿಸಿಕೊಂಡು ಬಂದಿದ್ದಾರೆ. ಮಹಿಳೆ ಈ ರೀತಿ ಮಾಡಿದ್ದರಿಂದ ಅಂದಿನಿಂದ ಗ್ರಾಮದಲ್ಲಿ ಮಳೆ ಬಂದಿಲ್ಲ. ಹೀಗಾಗಿ ಇದೇ ಬುಧವಾರ ಮಹಿಳೆಗೆ ಶಿಕ್ಷೆ ವಿಧಿಸಬೇಕೆಂದು ಪಂಚಾಯಿತಿ ಸೇರಿದ್ದಾರೆ.

ಗ್ರಾಮದ ಯಾವ ಹೆಂಗಸರೂ ಮುಂದೆ ಇಂತಹ ತಪ್ಪು ಮಾಡಬಾರದು ಎಂಬ ನಿರ್ಧಾರವನ್ನು ಪಂಚಾಯಿತಿಯಲ್ಲಿ ತೆಗೆದುಕೊಳ್ಳಲಾಗಿದೆ. ಇನ್ನೇನು ಮಹಿಳೆಗೆ ಶಿಕ್ಷೆ ಪ್ರಕಟಿಸಬೇಕೆಂಬ ಸಮಯಕ್ಕೆ ಪೊಲೀಸರು ಸ್ಥಳಕ್ಕೆ ಆಗಮಿಸಿದ್ದಾರೆ. ಆಗ ಪೊಲೀಸರ ಸಮ್ಮುಖದಲ್ಲಿ ಹಲವು ಗಂಟೆಗಳ ಕಾಲ ಚರ್ಚೆ ನಡೆಸಲಾಗಿದೆ. ಆದಿವಾಸಿಗಳಾದ ನಾವು ಹಿಂದಿನಿಂದಲೂ ನಂಬಿಕೆ, ಸಂಪ್ರದಾಯಗಳನ್ನು ಪಾಲಿಸಿಕೊಂಡು ಬಂದಿದ್ದೇವೆ. ಇಡೀ ಗ್ರಾಮದ ಯಾವ ಜನರಿಂದಲೂ ಸರಿದೂಗಿಸಲು ಸಾಧ್ಯವಾಗದಂತಹ ತಪ್ಪನ್ನು ಮಹಿಳೆ ಮಾಡಿದ್ದಾಳೆ ಎಂದು ಗ್ರಾಮಸ್ಥರು ಪಟ್ಟು ಹಿಡಿದಿದ್ದಾರೆ.

ಆಗ ಪೊಲೀಸರು ಎಲ್ಲರನ್ನೂ ಠಾಣೆಗೆ ಕರೆದುಕೊಂಡು ಬಂದಿದ್ದಾರೆ. ಗ್ರಾಮಸ್ಥರಿಗೆ ಮನವರಿಕೆ ಮಾಡಿ ಮನವೊಲಿಸಿ ಸಮಾಧಾನಪಡಿಸಲಾಗಿದೆ. ಮಹಿಳೆ ನೇಗಿಲು ಮುಟ್ಟಿದ ಕಾರಣಕ್ಕೆ ಗ್ರಾಮದಲ್ಲಿ ಮಳೆ ಆಗಿಲ್ಲ ಎಂಬುವುದು ಸರಿಯಲ್ಲ. ಪಕ್ಕದ ಹಲವು ಗ್ರಾಮಗಳಲ್ಲಿಯೂ ಮಳೆಯಾಗುತ್ತಿಲ್ಲ ಎಂದು ಪೊಲೀಸರು ತಿಳಿಹೇಳಿದ್ದಾರೆ. ಮತ್ತೊಂದೆಡೆ, ಗ್ರಾಮಸ್ಥರ ನಂಬಿಕೆ ಧಕ್ಕೆ ಉಂಟಾಗಬಾರದು ಎಂಬ ಕಾರಣಕ್ಕೆ ಮಹಿಳೆ ಕ್ಷಮೆಯಾಚಿಸಿದ್ದಾರೆ. ಈ ಬಗ್ಗೆ ಯಾವುದೇ ದೂರ ನೀಡದ ಕಾರಣ ಪ್ರಕರಣ ದಾಖಲಿಸಿಕೊಂಡಿಲ್ಲ ಎಂದು ಪೊಲೀಸರು ತಿಳಿಸಿದ್ದಾರೆ.

ಇದನ್ನೂ ಓದಿ: ಮಳೆಗಾಗಿ ಪ್ರಾರ್ಥಿಸಿ ನೇಗಿಲು ಹಿಡಿದ ಮಹಿಳೆಯರು: 85 ವರ್ಷದ ವೃದ್ಧೆಯೂ ಭಾಗಿ