ಮಾರುಕಟ್ಟೆಗೆ ಹೋಗಲು ಅನುಮತಿ ನೀಡದ ಗಂಡ: ಇಟ್ಟಿಗೆಯಿಂದ ಹೊಡೆದ ಕೊಲೆ ಮಾಡಿದ ಹೆಂಡತಿ

ಇಟ್ಟಿಗೆಯಿಂದ ಹೊಡೆದು ಪತಿ ಕೊಂದ ಪತ್ನಿ. ಮಾರುಕಟ್ಟೆಗೆ ಕಳಿಸಲು ನಿರಾಕರಿಸಿದ್ದಕ್ಕೆ ಕೊಲೆ ಮಾಡಿದ ಪತ್ನಿ.

ಕುಂತಿ (ಜಾರ್ಖಂಡ್​​): ಮಾರುಕಟ್ಟೆ ಹೋಗಲು ಅನುಮತಿ ನೀಡದ ಗಂಡನ ಮೇಲೆ ಹೆಂಡತಿ ಮಾರಣಾಂತಿಕ ದಾಳಿ ನಡೆಸಿ, ಹತ್ಯೆ ಮಾಡಿರುವ ಘಟನೆ ಇಲ್ಲಿನ ಸೋನಪುರಗರ್​ನಲ್ಲಿ ನಡೆದಿದೆ. ಘಟನೆ ಸಂಬಂಧ ಪೊಲೀಸರು ಆರೋಪಿ ಮಹಿಳೆಯನ್ನು ವಶಕ್ಕೆ ಪಡೆದಿದ್ದಾರೆ. ವಿಚಾರಣೆ ವೇಳೆ ಮಹಿಳೆ ತಪ್ಪೊಪ್ಪಿಕೊಂಡಿದ್ದಾಳೆ ಎಂದು ಪೊಲೀಸರು ತಿಳಿಸಿದ್ದಾರೆ. ಕಲಾವತಿ ಆರೋಪಿತ ಮಹಿಳೆಯಾಗಿದ್ದು, ಅರ್ಜುನ್​ ಸಿಂಗ್​ ಕೊಲೆಯಾದ ವ್ಯಕ್ತಿ

ಏನಿದು ಘಟನೆ: ಮನೆಯ ಹತ್ತಿರದ ವಾಟರ್​ ಪಂಪ್​ನಲ್ಲಿ ಅರ್ಜುನ್​ ಸಿಂಗ್​ ಸ್ನಾನ ಮಾಡುತ್ತಿದ್ದರು. ಈ ವೇಳೆ ಅಲ್ಲಿಗೆ ಬಂದ ಕಲಾವತಿ ಮಾರುಕಟ್ಟೆಗೆ ಹೋಗಿಬರುವುದಾಗಿ ಪತಿಗೆ ತಿಳಿಸಿದ್ದರು. ಅದಕ್ಕೆ ಗಂಡ ಒಪ್ಪಿಲ್ಲ. ಇದರಿಂದ ಕುಪಿತಳಾದ ಕಲಾವತಿ, ಗಂಡನ ಜೊತೆ ರಸ್ತೆಯಲ್ಲಿಯೇ ವಾಗ್ವಾದ ನಡೆಸಿದ್ದರು. ಈ ವೇಳೆ ಮಾತಿಗೆ ಮಾತು ಬೆಳೆದು ಜಗಳ ತಾರಕಕ್ಕೇರಿದೆ. ಆಗ ಅಲ್ಲೇ ಇದ್ದ ಇಟ್ಟಿಗೆ ತೆಗೆದುಕೊಂಡು ಪತಿ ತಲೆಗೆ ಪತ್ನಿ ಹೊಡೆದಿದ್ದಾಳೆ. ಗಂಭೀರ ಗಾಯಗೊಂಡ ಪತಿ​ ಕುಸಿದು ಬಿದ್ದಿದ್ದಾನೆ. ಅಷ್ಟಕ್ಕೂ ಸುಮ್ಮನಾಗದ ಕಲಾವತಿ, ನಿರಂತರವಾಗಿ ಇಟ್ಟಿಗೆಯಿಂದ ಹೊಡೆದಿದ್ದಾಳೆ ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ.

ಘಟನೆ ಕಂಡ ಸ್ಥಳೀಯರು ಅರ್ಜುನ್​ ಸಿಂಗ್​ ರಕ್ಷಣೆಗೆ ಧಾವಿಸಿದ್ದರು. ಆದರೆ, ಕಲಾವತಿ ಸ್ಥಳೀಯರಿಗೆ ಬೈಯ್ದು ಅವರನ್ನು ಓಡಿಸಿದ್ದಾಳೆ. ಬಳಿಕ ಗಂಡನನ್ನು ಹೆಗಲ ಮೇಲೆ ಹೊತ್ತು ತಂದು ಮನೆಯ ಕೋಣೆಯಲ್ಲಿ ಬಂಧಿಸಿದ್ದಳು. ಈ ವೇಳೆ ಗಾಯಗೊಂಡಿದ್ದ ಅರ್ಜುನ್​ ಸಿಂಗ್​ ಸಾವನ್ನಪ್ಪಿದ್ದಾನೆ. ಗ್ರಾಮಸ್ಥರ ಮಾಹಿತಿ ಮೇರೆಗೆ ಪೊಲೀಸರು ಸ್ಥಳಕ್ಕೆ ಆಗಮಿಸಿ, ಪರಿಶೀಲನೆ ನಡೆಸಿದರು. ಮಹಿಳೆ ವಿರುದ್ದ ಅರ್ಜುನ್​ ಚಿಕ್ಕಪ್ಪ ಕಲೇಶ್ವರ್​ ಸಿಂಗ್​ ನೀಡಿದ ದೂರಿನ ಅನ್ವಯ ಎಫ್​ಐಆರ್​ ದಾಖಲಿಸಲಾಗಿದೆ.

ಪ್ರಕರಣ ಕುರಿತು ಮಾತನಾಡಿರುವ ತೊರ್ಪ ಪೊಲೀಸರು, ಘಟನೆ ಬಳಿಕ ಕಲಾವತಿ ಮನೆಯಲ್ಲಿ ಕುಳಿತಿದ್ದಳು. ವಿಚಾರಣೆ ನಡೆಸಿದಾಗ ಗಂಡ ತನ್ನನ್ನು ಮಾರುಕಟ್ಟೆಗೆ ಹೋಗಲು ನಿರಾಕರಿಸಿದ ಹಿನ್ನೆಲೆ ಈ ಕೃತ್ಯ ಎಸಗಿದ್ದಾಗಿ ತಿಳಿಸಿದ್ದಾಳೆ ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ.

ಇದನ್ನೂ ಓದಿ: ಪತ್ನಿ ಜೊತೆ ಸೇರಿ ನೌಕರನಿಂದಲೇ ಬ್ಯಾಂಕ್ ಲೂಟಿ.. ಲಾಕರ್​ನಲ್ಲಿದ್ದ 48 ಲಕ್ಷ ಮೌಲ್ಯದ ನಗದು, ವಸ್ತು ಕಳ್ಳತನ