ಹೈದರಾಬಾದ್ (ತೆಲಂಗಾಣ): ಸಂಚಾರಿ ಪೊಲೀಸರು ನಿಯಮ ಉಲ್ಲಂಘಿಸುವ ವಾಹನ ಸವಾರರಿಗೆ ವಿಧಿಸಿರುವ ದಂಡದ ರಿಯಾಯಿತಿಗೆ ತೆಲಂಗಾಣ ರಾಜ್ಯಾದ್ಯಂತ ಭಾರಿ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಮೊದಲ 3 ದಿನಗಳಲ್ಲಿ 39 ಕೋಟಿ ರೂ.ಗಳ ದಂಡ ಸಂಗ್ರಹವಾಗಿದೆ.
ಪಾವತಿಸದ ಸಂಚಾರ ನಿಯಮ ಉಲ್ಲಂಘನೆಯ ಚಲನ್‌ಗಳನ್ನು ಹೊಂದಿರುವ ವಾಹನ ಮಾಲೀಕರು ಮತ್ತು ಆರ್ಟಿಸಿ ಚಾಲಕರಿಗೆ ದೊಡ್ಡ ರಿಲೀಫ್ ಆಗಿ ತೆಲಂಗಾಣ ಪೊಲೀಸರು ಬಾಕಿ ಉಳಿದಿರುವ ಬಿಲ್‌ಗಳನ್ನು ತೆರವುಗೊಳಿಸಲು ಒಂದು ಅವಕಾಶ ನೀಡಿದ್ದಾರೆ. ಬಾಕಿ ಇರುವ ದಂಡ ಪಾವತಿಗೆ ಮಾರ್ಚ್ 1ರಿಂದ ಮಾರ್ಚ್ 31ರವರೆಗೆ ಟ್ರಾಫಿಕ್ ಪೊಲೀಸ್ ಅಧಿಕಾರಿಗಳು ರಿಯಾಯಿತಿ ನೀಡಿದ್ದಾರೆ.
ಇದನ್ನೂ ಓದಿ: 'ಟ್ರಾಫಿಕ್ ಜಾಮ್‌ ಆಗಿದ್ದಕ್ಕೆ ಕ್ಷಮೆಯಿರಲಿ': ಕಾಂಗ್ರೆಸ್ ಕಾರ್ಯಕರ್ತರ ಮನವಿ
ಈ ಬಾಕಿ ದಂಡವನ್ನು ಆನ್ಲೈನ್ ಮೂಲಕ (ಇ-ಚಲನ್ ವೆಬ್ಸೈಟ್) ಪಾವತಿಸಬೇಕಾಗಿದ್ದು, ಚಲನ್ ಮೇಲೆ ರಿಯಾಯಿತಿ ಸಿಗುತ್ತದೆ ಎಂದು ವಾಹನ ಸವಾರರು ಮುಗಿಬಿದ್ದು ತಮ್ಮ ದಂಡವನ್ನು ಪಾವತಿಸುತ್ತಿದ್ದಾರೆ. ಮಾರ್ಚ್ 1 ರಂದು 8 ಕೋಟಿ ರೂ, ಮಾರ್ಚ್ 2ರಂದು 15 ಕೋಟಿ ರೂ ಹಾಗೂ ಮಾರ್ಚ್ 3ರಂದು 16 ಕೋಟಿ ರೂ. ಸೇರಿ ಮೂರು ದಿನಗಳಲ್ಲಿ ಒಟ್ಟು 39 ಕೋಟಿ ರೂ. ದಂಡ ಸಂಗ್ರಹವಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
