ನವದೆಹಲಿ: ರಾಜಕೀಯ ಪಕ್ಷಗಳು ಚುನಾವಣಾ ಬಾಂಡ್‌ಗಳ ಮೂಲಕ ದೇಣಿಗೆ ಸ್ವೀಕರಿಸುವ ವಿಷಯಕ್ಕೆ ಸಂಬಂಧಿಸಿದಂತೆ ಸುಪ್ರೀಂ ಕೋರ್ಟ್ ಬುಧವಾರ ಮಹತ್ವದ ವಿಚಾರಗಳನ್ನು ಎತ್ತಿದೆ. ಚುನಾವಣಾ ಬಾಂಡ್‌ಗಳ ಯೋಜನೆಯು ಪ್ರತಿಪಕ್ಷಗಳಿಗೆ ನೀಡುವ ದಾನಿಗಳ ಬಗ್ಗೆ ಆಡಳಿತ ಪಕ್ಷವು 'ಆಯ್ದ ಅನಾಮಧೇಯತೆ'ಯ ಮಾಹಿತಿಯನ್ನು ಪಡೆಯಲು ಹೇಗೆ ಸುಲಭಗೊಳಿಸುತ್ತದೆ ಹಾಗೂ ಪ್ರತಿಪಕ್ಷಗಳ ದೇಣಿಗೆಗಳನ್ನು ಹೇಗೆ ಪ್ರಶ್ನಿಸಲಾಗುತ್ತದೆ ಎಂದು ಐವರು ನ್ಯಾಯಾಧೀಶರ ಸಂವಿಧಾನ ಪೀಠ ಕೇಳಿದೆ. ಪಾರದರ್ಶಕ ಯೋಜನೆ ಅಥವಾ ಎಲ್ಲ ರಾಜಕೀಯ ಪಕ್ಷಗಳಿಗೆ ಸಮನಾದ ವೇದಿಕೆ ಹೊಂದಿರುವ ಯೋಜನೆಯೊಂದಿಗೆ ಸರ್ಕಾರ ಬರುವುದನ್ನು ತಡೆಯಲ್ಲ ಎಂದೂ ತಿಳಿಸಿದೆ.
ಮುಖ್ಯ ನ್ಯಾಯಮೂರ್ತಿ ಡಿ.ವೈ.ಚಂದ್ರಚೂಡ್ ನೇತೃತ್ವದಲ್ಲಿ ನ್ಯಾಯಮೂರ್ತಿಗಳಾದ ಸಂಜೀವ್ ಖನ್ನಾ, ಬಿ.ಆರ್.ಗವಾಯಿ, ಜೆ.ಬಿ.ಪರ್ದಿವಾಲಾ ಮತ್ತು ಮನೋಜ್ ಮಿಶ್ರಾ ಅವರನ್ನೊಳಗೊಂಡ ಪೀಠವು, ಕೇಂದ್ರದ ಚುನಾವಣಾ ಬಾಂಡ್‌ಗಳ ಯೋಜನೆಯ ಸಿಂಧುತ್ವ ಪ್ರಶ್ನಿಸಿ ಸಲ್ಲಿಸಿದ್ದ ಅರ್ಜಿಗಳ ವಿಚಾರಣೆಯನ್ನು ಎರಡನೇ ದಿನವಾದ ಬುಧವಾರ ಕೂಡ ಮುಂದುವರೆಸಿತು.
ಈ ಯೋಜನೆಯನ್ನು ಸಮರ್ಥಿಸಿಕೊಂಡ ಕೇಂದ್ರ ಸರ್ಕಾರವನ್ನು ಪ್ರತಿನಿಧಿಸಿದ ಸಾಲಿಸಿಟರ್ ಜನರಲ್ ತುಷಾರ್ ಮೆಹ್ತಾ, ಪ್ರಸ್ತುತ ಯೋಜನೆಯು ರಾಜಕೀಯ ಪಕ್ಷಗಳಿಗೆ ಬ್ಯಾಂಕಿಂಗ್ ಚಾನಲ್‌ಗಳ ಮೂಲಕ ಕಾನೂನು ಬದ್ಧ ಹಣ ಬರುವುದನ್ನು ಖಚಿತಪಡಿಸಿಕೊಳ್ಳುವ ಪ್ರಯತ್ನವಾಗಿದೆ. ಇದರಲ್ಲಿ ಯಾವುದೇ ಪ್ರತೀಕಾರವಿಲ್ಲ ಎಂದು ಖಚಿತಪಡಿಸಿಕೊಳ್ಳಲು ರಾಜಕೀಯ ದೇಣಿಗೆಗಳಲ್ಲಿ ಅನಾಮಧೇಯತೆಯ ಅಗತ್ಯ ಇದೆ ಎಂದು ಒತ್ತಿ ಹೇಳಿದರು.
ಈ ವೇಳೆ ಮಧ್ಯಪ್ರವೇಶ ಮಾಡಿದ ಮುಖ್ಯ ನ್ಯಾಯಮೂರ್ತಿ, ಈ ಯೋಜನೆಯ ಸಮಸ್ಯೆ ಎಂದರೆ 'ಆಯ್ದ ಅನಾಮಧೇಯತೆ' ಆಗಿದೆ. ಇದು ಸಂಪೂರ್ಣವಾಗಿ ಅನಾಮಧೇಯ ಅಥವಾ ಆಯ್ದ ಗೌಪ್ಯತೆಯನ್ನು ಹೊಂದಿಲ್ಲ ಎಂದರು. ''ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ ಕೂಡಾ ಗೌಪ್ಯತೆ ಕಾಪಾಡಲು ಸಾಧ್ಯವಿಲ್ಲ. ಹಾಗೂ ಕಾನೂನು ಜಾರಿ ಏಜೆನ್ಸಿಗಳಿಗಾದರೂ ಗೌಪ್ಯತೆ ಬಹಿರಂಗಪಡಿಸಬೇಕಾಗುತ್ತದೆ. ಹಾಗಿರುವುದರಿಂದ ದೊಡ್ಡ ದಾನಿಯು ರಾಜಕೀಯ ಪಕ್ಷಕ್ಕೆ ದೇಣಿಗೆ ನೀಡುವ ಉದ್ದೇಶಕ್ಕಾಗಿಯೇ ಚುನಾವಣಾ ಬಾಂಡ್‌ಗಳನ್ನು ಖರೀದಿಸುವ ಅಪಾಯವನ್ನು ಎಂದಿಗೂ ತೆಗೆದುಕೊಳ್ಳಲು ಹೋಗುವುದಿಲ್ಲ. ಹೀಗಾಗಿ ದೊಡ್ಡ ದೊಡ್ಡ ದೇಣಿಗೆದಾರರು ತಮ್ಮ ದೇಣಿಗೆಯನ್ನು ವಿಂಗಡಣೆ ಮಾಡಿ, ಸಣ್ಣ ಮೊತ್ತದ ಚುನಾವಣಾ ಬಾಂಡ್‌ಗಳನ್ನು ಖರೀದಿಸುವ ಜನರಿಗೆ ನೀಡಿ, ಅದನ್ನು ಅಧಿಕೃತ ಬ್ಯಾಂಕಿಂಗ್ ಚಾನಲ್‌ಗಳ ಮೂಲಕ ಖರೀದಿಸುತ್ತಾರೆ '' ಎಂದು ಸಿಐಜೆ ಹೇಳಿದರು.
ಆಗ ಮೆಹ್ತಾ, ''ನಾನು 10 ಕೋಟಿ ನೀಡಲು ಹತ್ತು ಜನರನ್ನು (ತಲಾ 1 ಕೋಟಿ ರೂ. ಠೇವಣಿ ಮಾಡಲು) ಹುಡುಕುವ ಅಪಾಯಕ್ಕೆ ಸಿದ್ಧನಾಗಿಬೇಕಾಗುತ್ತದೆ'' ಎಂದರು. ಇದಕ್ಕೆ ಸಿಐಜೆ, ''ಒಂದು ದೊಡ್ಡ ದಾನಿ ಎಸ್ಬಿಐ ಖರೀದಿಸಿದ ಖಾತೆಯ ಪುಸ್ತಕದಲ್ಲಿ ಎಂದಿಗೂ ತಲೆ ಹಾಕಲ್ಲ. ಈ ಯೋಜನೆಯು ಆಯ್ದ ಅನಾಮಧೇಯತೆ ಹಾಗೂ ಆಯ್ದ ಗೌಪ್ಯತೆಗೆ ಸಮರ್ಥನೀಯವಾಗಿದೆ'' ಎಂಬುದನ್ನು ಗಮನಿಸಿದರು.
ಈ ಸಂದರ್ಭದಲ್ಲಿ ಇಡೀ ಯೋಜನೆಯನ್ನು ವಿವರಿಸಲು ಅವಕಾಶ ನೀಡುವಂತೆ ಸಿಜೆಐ ಅವರನ್ನು ಮೆಹ್ತಾ ಕೇಳಿದರು. ಮತ್ತೊಂದೆಡೆ, ಸಿಜೆಐ "ನಾವು ಪಾರದರ್ಶಕ ಯೋಜನೆ ಜಾರಿಗೆ ಮಾಡುವ ಸರ್ಕಾರದ ಯತ್ನವನ್ನು ತಡೆಯುವುದಿಲ್ಲ" ಎಂದು ತಿಳಿಸಿದರು. ಅಲ್ಲದೇ, ''ಚುನಾವಣಾ ಬಾಂಡ್‌ಗಳನ್ನು ಖಾತ್ರಿಪಡಿಸುವ ಉದ್ದೇಶವು ಚುನಾವಣಾ ನಿಧಿಯು ನಗದು ಮೇಲೆ ಕಡಿಮೆ ಅವಲಂಬಿತವಾಗಿದೆ. ಹೊಣೆಗಾರಿಕೆಯ ಘಟಕದ ಮೇಲೆ ಹೆಚ್ಚು ಅವಲಂಬಿತವಾಗಿದ್ದು, ಇದು ಮುಂದುವರೆದಿದೆ'' ಎಂದೂ ಹೇಳಿದರು.
ಅಷ್ಟೇ ಅಲ್ಲ, ''ಈ ಯೋಜನೆಯ ಸಮಸ್ಯೆ ಏನೆಂದರೆ, ಮೊದಲನೆಯದು, ಇದು ರಾಜಕೀಯ ಪಕ್ಷಗಳಿಗೆ ಸಮಾನ ವೇದಿಕೆ ಒದಗಿಸದಿದ್ದರೆ, ಎರಡನೆಯದು, ಅರ್ಜಿದಾರರು ವಾದಿಸಿದಂತೆ ಇದು ಅಪಾರದರ್ಶಕತೆಯಿಂದ ಬಳಲುತ್ತಿದೆ. ನಿರೀಕ್ಷೆಯಂತೆ ಚುನಾವಣಾ ನಿಧಿಗೆ ಹೆಚ್ಚು ಬಿಳಿ ಹಣ ಪಡೆಯಲು ಸಾಧ್ಯವಾಗದ ಕಾರಣ ಹಿಂದಿನ ಯೋಜನೆಯು ವಿಫಲವಾಗಿದೆ'' ಎಂದು ಸಿಜೆಐ ಹೇಳಿದರು.
ಮತ್ತೊಬ್ಬ ನ್ಯಾಯಮೂರ್ತಿ ಖನ್ನಾ ಮಾತನಾಡಿ, ''ಬಲಿಪಶು ಮತ್ತು ಪ್ರತೀಕಾರ ಸಾಮಾನ್ಯವಾಗಿ ಅಧಿಕಾರದಲ್ಲಿರುವ ಪಕ್ಷದಿಂದ ಆಗಬೇಕಾಗುತ್ತದೆ ಹೊರತು ಪ್ರತಿಪಕ್ಷದಿಂದಲ್ಲ. ಈ ಯೋಜನೆ ಅಥವಾ ಹಿಂದಿನ ಯೋಜನೆಯಿಂದ ಗರಿಷ್ಠ ಹಣವು ಆಡಳಿತ ಪಕ್ಷಕ್ಕೆ ಹೋಗುತ್ತದೆ. ಆಯ್ದ ಗೌಪ್ಯತೆಯ ಕಾರಣ, ಪ್ರತಿಪಕ್ಷಗಳ ದೇಣಿಗೆದಾರರು ಇದರ ಮಾರ್ಗಗಳು ಮತ್ತು ವಿಧಾನಗಳ ಎಂಬ ಆತಂಕ ವ್ಯಕ್ತಪಡಿಸುತ್ತಾರೆ'' ಎಂದರು.
ಅದನ್ನು ಸ್ಪಷ್ಟವಾಗಿ ಹೇಳುವುದಾದರೆ... ''ಈ ಆಯ್ದ ಗೌಪ್ಯತೆಯ ಕಾರಣದಿಂದಾಗಿ ಪ್ರತಿಪಕ್ಷಗಳಿಗೆ ನಿಮ್ಮ (ಆಡಳಿತ ಪಕ್ಷದ) ದಾನಿ ಯಾರು ಎಂದು ತಿಳಿಯಲ್ಲ. ಆದರೆ, ಪ್ರತಿಪಕ್ಷಗಳ ದಾನಿಗಳನ್ನು ಕನಿಷ್ಠ ತನಿಖಾ ಸಂಸ್ಥೆಗಳ ಮೂಲಕ ಖಚಿತಪಡಿಸಿಕೊಳ್ಳಬಹುದು... ಅವರ (ವಿಪಕ್ಷಗಳು) ದೇಣಿಗೆದಾರರನ್ನು ಪ್ರಶ್ನಿಸಲಾಗುತ್ತದೆ ಎಂಬುವುದೇ ಈಗಿರುವ ಭಯ'' ಎಂದು ವಿವರಿಸಿದರು.
ಇದೇ ವೇಳೆ, ಸಿಜೆಐ ಚಂದ್ರಚೂಡ್, '' ಒಂದು ಕಂಪನಿಯು ಯಾವ ರಾಜಕೀಯ ಪಕ್ಷಕ್ಕೆ ಕೊಡುಗೆ ನೀಡಿದೆ ಎಂಬುದನ್ನು ಬಹಿರಂಗಪಡಿಸುವ ಅಗತ್ಯವಿಲ್ಲ. ಆದರೆ, ಅದು ಸಂಪೂರ್ಣವಾಗಿ ಎಷ್ಟು ಕೊಡುಗೆ ನೀಡಿದೆ ಎಂಬುದನ್ನು ಬಹಿರಂಗಪಡಿಸಬೇಕು'' ತಿಳಿಸಿದರು. ಈ ಪ್ರಕರಣದ ವಿಚಾರಣೆ ಗುರುವಾರ ಮುಂದುವರಿಯಲಿದೆ.
ಇದನ್ನೂ ಓದಿ: ರಾಜಕೀಯ ಪಕ್ಷಗಳ ಹಣದ ಮೂಲ ತಿಳಿದುಕೊಳ್ಳುವ ಹಕ್ಕು ನಾಗರಿಕರಿಗೆ ಇಲ್ಲ: ಸುಪ್ರೀಂ ಕೋರ್ಟ್ಗೆ ಕೇಂದ್ರ ಸರ್ಕಾರ ಅಫಿಡವಿಟ್
