ಕಾರಿನ ಬಾನೆಟ್ ಮೇಲೆ ಕುಳಿತು ಸ್ಟಂಟ್​: ಇಬ್ಬರು ಯುವಕರಿಗೆ ಬಿತ್ತು 27,500 ರೂಪಾಯಿ ದಂಡ

ಆಲ್ಟೊ ಕಾರಿನ ಬಾನೆಟ್ ಮೇಲೆ ಕುಳಿತು ಸ್ಟಂಟ್​ ಮಾಡಿದ ಆರೋಪದ ಮೇಲೆ ಇಬ್ಬರು ಯುವಕರನ್ನು ಗ್ರೇಟರ್ ನೋಯ್ಡಾ ಪೊಲೀಸರು ಬಂಧಿಸಿ, 27,500 ರೂಪಾಯಿಗಳ ದಂಡ ಹಾಕಿದ್ದಾರೆ.

ನವದೆಹಲಿ/ಗ್ರೇಟರ್ ನೋಯ್ಡಾ: ರಾಷ್ಟ್ರ ರಾಜಧಾನಿ ದೆಹಲಿ ಸಮೀಪದ ಗ್ರೇಟರ್ ನೋಯ್ಡಾದಲ್ಲಿ ಆಲ್ಟೊ ಕಾರಿನ ಬಾನೆಟ್ ಮೇಲೆ ಕುಳಿತು ಸ್ಟಂಟ್​ ಮಾಡುತ್ತಿರುವ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್​ ಆಗಿದೆ. ಇದರ ಬೆನ್ನಲ್ಲೇ ಪೊಲೀಸರು ಅಪಾಯಕಾರಿ ಸ್ಟಂಟ್​ ಮಾಡುತ್ತಿದ್ದ ಇಬ್ಬರ ಯುವಕರನ್ನು ಪತ್ತೆ ಹೆಚ್ಚಿಸಿ, ಕಠಿಣ ಕ್ರಮ ಕೈಗೊಂಡಿದ್ದಾರೆ. ಆರೋಪಿಗಳಿಗೆ ಬರೋಬ್ಬರಿ 27,500 ರೂಪಾಯಿಗಳ ದಂಡ ವಿಧಿಸಿ ಬಿಸಿ ಮುಟ್ಟಿಸಿದ್ದಾರೆ.

ಇಲ್ಲಿನ ನಾಲೆಡ್ಜ್ ಪಾರ್ಕ್ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ಶುಕ್ರವಾರ ಆಲ್ಟೊ ಕಾರಿನ ಬಾನೆಟ್ ಮೇಲೆ ಕುಳಿತು ಸ್ಟಂಟ್​ ಮಾಡುತ್ತಿರುವ ವಿಡಿಯೋ ಸೋಷಿಯಲ್​ ಮೀಡಿಯಾದಲ್ಲಿ ಸಾಕಷ್ಟು ಹರಿದಾಡಿದೆ. ಈ ವಿಡಿಯೋದಲ್ಲಿ ಯುವಕನೊಬ್ಬ ಕಾರಿನ ಬಾನೆಟ್ ಮೇಲೆ ಕುಳಿತಿದ್ದು, ಮತ್ತೊಬ್ಬ ಕಾರು ಅತಿವೇಗವಾಗಿ ಚಲಿಸುತ್ತಿರುವುದು ಸೆರೆಯಾಗಿದೆ. ಇಂತಹ ಅಪಾಯಕಾರಿಯಾದ ಚಾಲನೆ ಮತ್ತು ಸ್ಟಂಟ್​ ಮಾಡಿರುವ ವಿಡಿಯೋ ಗ್ರೇಟರ್ ನೋಯ್ಡಾದ ಟ್ರಾಫಿಕ್​ ಪೊಲೀಸರ ಗಮನಕ್ಕೆ ಬಂದಿದೆ.

ಅಂತೆಯೇ, ಟ್ರಾಫಿಕ್​ ಪೊಲೀಸರು ತಕ್ಷಣವೇ ಎಚ್ಚೆತ್ತುಕೊಂಡು ವಿಡಿಯೋವನ್ನು ಸೂಕ್ಷ್ಮವಾಗಿ ಪರಿಶೀಲಿಸಿ, ಅದರಲ್ಲಿ ದಾಖಲಾದ ಕಾರಿನ ಸಂಖ್ಯೆಯನ್ನು ಪತ್ತೆಹಚ್ಚಿದ್ದಾರೆ. ನಂತರ ಇದರ ಆಧಾರದ ಮೇಲೆಯೇ ಹೆಚ್ಚಿನ ತನಿಖೆ ಕೈಗೊಂಡು ಈ ಹುಚ್ಚಾಟದ ಸ್ಟಂಟ್​ನಲ್ಲಿ ತೊಡಗಿದ್ದ ವಿಪಿನ್ ಮತ್ತು ನಿಶಾಂತ್ ಎಂಬ ಇಬ್ಬರು ಯುವಕರನ್ನು ಬಂಧಿಸಿದ್ದಾರೆ. ಜೊತೆಗೆ ಸ್ಟಂಟ್​ ಮಾಡಲು ಬಳಸಿದ್ದ ಕಾರನ್ನೂ ಪೊಲೀಸರು ವಶಪಡಿಸಿಕೊಂಡಿದ್ದಾರೆ.

ಡಿಸಿಪಿ ಕಚೇರಿ ಸಮೀಪದಲ್ಲೇ ಸ್ಟಂಟ್​: ಮತ್ತೊಂದು ಅಚ್ಚರಿ ವಿಷಯ ಎಂದರೆ ಸಹಾಯಕ ಪೊಲೀಸ್​ ಆಯುಕ್ತರ (ಡಿಸಿಪಿ) ಕಚೇರಿ ಸಮೀಪದಲ್ಲೇ ಈ ಇಬ್ಬರು ಯುವಕರು ಆಲ್ಟೊ ಕಾರಿನ ಬಾನೆಟ್ ಮೇಲೆ ಕುಳಿತು ಸ್ಟಂಟ್​ ಮಾಡುತ್ತಿದ್ದರು ಎನ್ನಲಾಗಿದೆ. ಡಿಸಿಪಿ ಕಚೇರಿಯಿಂದ ಸ್ವಲ್ಪ ದೂರದಲ್ಲಿ ಕಾರನ್ನು ಅತಿವೇಗವಾಗಿ ಚಲಾಯಿಸುತ್ತಾ, ಹುಚ್ಚಾಟ ಪ್ರದರ್ಶಿಸುತ್ತಿದ್ದರು ಎಂಬುವುದು ವೈರಲ್​ ವಿಡಿಯೋ ಮೂಲಕ ಪೊಲೀಸರು ಗಮನಿಸಿದ್ದಾರೆ.

ಇದೇ ವಿಡಿಯೋ ಆಧಾರದ ಮೇಲೆ ಆರೋಪಿಗಳನ್ನು ವಶಕ್ಕೆ ಪಡೆದ ಪೊಲೀಸರು, ಸಂಚಾರ ನಿಯಮಗಳ ಉಲ್ಲಂಘನೆ ಸೇರಿದಂತೆ ಕಾನೂನಿನ ಪ್ರಕಾರ 27,500 ರೂ.ಗಳ ದಂಡವನ್ನು ವಿಧಿಸಿದ್ದಾರೆ. ಇನ್ಮುಂದೆ ಯಾವುದೇ ರೀತಿಯ ಸ್ಟಂಟ್ ಮಾಡಬಾರದು. ಒಂದು ವೇಳೆ ಸ್ಟಂಟ್​ ಮಾಡುವುದರಲ್ಲಿ ತೊಡಗಿದರೆ ಕಠಿಣ ಕ್ರಮ ಕೈಗೊಳ್ಳಲಾಗುವುದು ಎಂದು ನಾಲೆಡ್ಜ್ ಪಾರ್ಕ್ ಪೊಲೀಸ್ ಠಾಣಾಧಿಕಾರಿ ವಿನೋದ್ ಕುಮಾರ್ ಎಚ್ಚರಿಕೆ ನೀಡಿದ್ದಾರೆ.

ರೀಲ್ಸ್​ಗಾಗಿ ಹುಚ್ಚಾಟ ಆರೋಪ: ಸಾಕಷ್ಟು ಯುವಕರು ಫೇಸ್​ಬುಕ್​, ಇನ್​ಸ್ಟಾಗ್ರಾಮ್​, ಟ್ವಿಟರ್​ ಸೇರಿದಂತೆ ವಿವಿಧ ಸೋಶಿಯಲ್​ ಮೀಡಿಯಾಗಳಲ್ಲಿ ಸಕ್ರಿಯರಾಗಿದ್ದಾರೆ. ಅಲ್ಲದೇ, ಇದರಲ್ಲಿ ವಿಡಿಯೋ ಮತ್ತು ಫೋಟೋಗಳನ್ನು ಫೋಸ್ಟ್​ಗಳನ್ನು ಮಾಡಲು ಇಂತಹ ಹೆಚ್ಚಾಟದಲ್ಲಿ ತೊಡಗಿಸಿಕೊಳ್ಳುತ್ತಿದ್ದಾರೆ. ಅದರಲ್ಲೂ, ರೀಲ್ಸ್​ ಮಾಡಲು ಯುವಕರು ತಮ್ಮ ಪ್ರಾಣವನ್ನೇ ಪಣಕ್ಕಿಡುತ್ತಿದ್ದಾರೆ.

ಅದರಲ್ಲೂ, ಗ್ರೇಟರ್ ನೋಯ್ಡಾ ಸುತ್ತಮತ್ತಲು ಕಳೆದ ಕೆಲವು ತಿಂಗಳುಗಳಲ್ಲಿ ಅಪಾಯಕಾರಿ ಸ್ಟಂಟ್​ ಮಾಡುತ್ತಿರುವ ಹತ್ತಾರು ವಿಡಿಯೋಗಳು ವೈರಲ್ ಆಗುತ್ತಲೇ ಇದೆ. ಇಂತಹ ಹುಚ್ಚಾಟದಲ್ಲಿ ತೊಡಗಿಸಿಕೊಂಡು ಇಬ್ಬರಿಗೆ ಭಾರಿ ಮೊತ್ತದ ದಂಡವನ್ನು ಪೊಲೀಸರು ವಿಧಿಸುವ ಮೂಲಕ ಕಠಿಣ ಕ್ರಮದ ಎಚ್ಚರಿಕೆ ಸಂದೇಶವನ್ನು ರವಾನಿಸಿದ್ದಾರೆ.

ಇದನ್ನೂ ಓದಿ: ರಾಷ್ಟ್ರ ರಾಜಧಾನಿಯಲ್ಲಿ ಅಮಾನವೀಯ.. ಬೈಕ್​ ಸವಾರನನ್ನು ಎಳೆದೊಯ್ದ ಕಾರು.. ಇಬ್ಬರು ಸಾವು!