ದುರ್ಗ್(ಛತ್ತೀಸ್ಗಢ): ಛತ್ತೀಸ್ಗಢದಲ್ಲಿ ಮುಂದಿನ ವರ್ಷ ವಿಧಾನಸಭೆ ಚುನಾವಣೆ ನಡೆಯಲಿದ್ದು, ಆಡಳಿತಾರೂಢ ಕಾಂಗ್ರೆಸ್ ಮತ್ತು ವಿಪಕ್ಷ ಬಿಜೆಪಿ ಮಧ್ಯೆ ಅದಾಗಲೇ ಕಿತ್ತಾಟ ಜೋರಾಗಿದೆ. ಸೋಮವಾರ ಬಿಜೆಪಿ ಕಾರ್ಯಕ್ರಮದ ಮೇಲೆ ಯಾರೋ ಕಿಡಿಗೇಡಿಗಳು ಕಲ್ಲು ತೂರಾಟ ನಡೆಸಿದ್ದರು. ಈ ಕೃತ್ಯ ಖಂಡಿಸಿ, ಮಂಗಳವಾರ ಬಿಜೆಪಿ ನಾಯಕರು ಹೆಲ್ಮೆಟ್ ಧರಿಸಿ ಕಾರ್ಯಕ್ರಮ ನಡೆಸಿದರು.
ಸುಪೇಲಾದಲ್ಲಿ ಮಂಗಳವಾರ ನಡೆದ ಸಾರ್ವಜನಿಕ ಕಾರ್ಯಕ್ರಮದ ಮೇಲೆ ಕಲ್ಲು ತೂರಾಟ ನಡೆಸಲಾಗಿತ್ತು. ಇದು ರಾಜಕೀಯವಾಗಿ ವಾಗ್ದಾಳಿಗೆ ಕಾರಣವಾಯಿತು. ಘಟನೆ ಬಗ್ಗೆ ಪೊಲೀಸರಿಗೆ ದೂರು ನೀಡಲಾಗಿದೆ. ಆದರೆ, ಇದನ್ನು ಮಾಡಿದ್ದು ಯಾರು ಎಂಬುದು ಇನ್ನೂ ಗೊತ್ತಾಗಿಲ್ಲ. ಇದರಿಂದ ಕುಪಿತವಾಗಿರುವ ಬಿಜೆಪಿಯು ಕಾಂಗ್ರೆಸ್ ವಿರುದ್ಧ ಹರಿಹಾಯ್ದಿದೆ.
ಹೆಲ್ಮೆಟ್ ಧರಿಸಿದ ಮಾಜಿ ಸಚಿವ: ಇಂದು ದುರ್ಗ್ದ ಹಳೆ ಬಸ್ ನಿಲ್ದಾಣದಲ್ಲಿ ಆಯೋಜಿಸಿದ್ದ ಕಾರ್ಯಕ್ರಮದಲ್ಲಿ ಬಿಜೆಪಿ ಮುಖಂಡ, ಮಾಜಿ ಸಚಿವ ಅಜಯ್ ಚಂದ್ರಾಕರ್ ಕ್ರಿಕೆಟ್ ಹೆಲ್ಮೆಟ್ ಧರಿಸಿ ವೇದಿಕೆಯ ಮೇಲೆ ಕಾಣಿಸಿಕೊಂಡರು. ಬಳಿಕ ಕಾಂಗ್ರೆಸ್ ಗುರಿಯಾಗಿಸಿ ವಾಗ್ದಾಳಿಗಿಳಿದರು. ನಮ್ಮ ವಿರೋಧಿಗಳು ಕಾರ್ಯಕ್ರಮದ ಮೇಲೆ ಕಲ್ಲು ತೂರಾಟ ನಡೆಸುತ್ತಿದ್ದಾರೆ. ಇದಕ್ಕಾಗಿ ಹೆಲ್ಮೆಟ್ ಧರಿಸಿ ಬಂದಿದ್ದೇನೆ. ಕಲ್ಲು ತೂರಿದ್ದು ನನ್ನ ಮೇಲಲ್ಲ, ಛತ್ತೀಸ್ಗಢ ಜನರ ಮೇಲೆ ಎಂಬುದು ಅವರಿಗೆ ಗೊತ್ತಿಲ್ಲ ಎಂದು ಕಿಡಿಕಾರಿದರು.
2023ರ ಮಿಷನ್‌ಗಾಗಿ ಬಿಜೆಪಿ ಸಾರ್ವಜನಿಕರನ್ನು ತಲುುಪುವ ಯತ್ನಕ್ಕೆ ಕಾಂಗ್ರೆಸ್ ಅಡ್ಡಿಯಾಗುತ್ತಿದೆ. ಕಾಂಗ್ರೆಸ್ ಓಡಿಸಿ ಛತ್ತೀಸ್‌ಗಢ್ ಉಳಿಸಿ ಕಾರ್ಯಕ್ರಮ ಅವರ ನಿದ್ದೆಗೆಡಿಸಿದೆ ಎಂದು ವ್ಯಂಗ್ಯವಾಡಿದರು.
ವಿಐಪಿಗಳ ಸೇವೆಯಲ್ಲಿ ಪೊಲೀಸರು: ಇನ್ನು ಪೊಲೀಸ್ ಇಲಾಖೆ ವಿರುದ್ಧವೂ ಅಸಮಾಧಾನ ವ್ಯಕ್ತಪಡಿಸಿದ ಮಾಜಿ ಸಚಿವ ಚಂದ್ರಾಕರ್, ಪೊಲೀಸರು ಸಾರ್ವಜನಿಕರ ರಕ್ಷಣೆ ಮಾಡಬೇಕು. ಅದನ್ನು ಬಿಟ್ಟು ಅವರು ದೊಡ್ಡವರ(ವಿಐಪಿ) ಸೇವೆಯಲ್ಲೇ ನಿರತರಾಗಿದ್ದಾರೆ. ಹೀಗಾಗಿ ಗೃಹ ಸಚಿವಾಲಯ ಮತ್ತು ಮುಖ್ಯಮಂತ್ರಿಗಳು ದೊಡ್ಡವರಿಗೆ ಮತ್ತು ಸಾಮಾನ್ಯರಿಗೆ ಪ್ರತ್ಯೇಕ ಪೊಲೀಸ್ ಪಡೆಗಳನ್ನು ರಚಿಸಬೇಕು ಎಂದು ಆಗ್ರಹಿಸಿದರು.
ಓದಿ: ಅನ್ಯಧರ್ಮೀಯರ ಹಿಟ್ ಲಿಸ್ಟ್ ತಯಾರಿಸಿದ್ದ ಪಿಎಫ್ಐ ರಹಸ್ಯ ವಿಭಾಗ: ಕೋರ್ಟ್ಗೆ ಎನ್ಐಎ ಮಾಹಿತಿ
