ಮೂತ್ರ ವಿಸರ್ಜನೆ ವಿಚಾರಕ್ಕೆ ಗಲಾಟೆ: ಯುವಕನ ಹತ್ಯೆ

ರಾಷ್ಟ್ರ ರಾಜಧಾನಿಯಲ್ಲಿ ಕಿರಾಣಿ ಅಂಗಡಿ ಮುಂದೆ ಮೂತ್ರ ವಿಸರ್ಜನೆ ಮಾಡಿದ ವಿಚಾರಕ್ಕೆ ಮಾಲೀಕ ಮತ್ತು ಯುವಕರ ನಡುವೆ ನಡೆದ ಗಲಾಟೆಯಲ್ಲಿ ಓರ್ವ ಯುವಕ ಕೊಲೆಗೀಡಾಗಿದ್ದಾನೆ.

ನವದೆಹಲಿ: ಆಗ್ನೇಯ ದೆಹಲಿಯ ಅಮರ್ ಕಾಲೋನಿ ಪೊಲೀಸ್ ಠಾಣೆ ಪ್ರದೇಶದ ಕಿರಾಣಿ ಅಂಗಡಿಯ ಹೊರಗೆ ಮೂತ್ರ ವಿಸರ್ಜನೆ ಮಾಡಿದ ವಿಚಾರಕ್ಕೆ ಅಂಗಡಿ ಮಾಲೀಕ ಮತ್ತು ಯುವಕರ ನಡುವೆ ಗಲಾಟೆ ಆಗಿದ್ದು, ಈ ವೇಳೆ ಓರ್ವ ಯುವಕನನ್ನು ಹತ್ಯೆ ಮಾಡಲಾಗಿದೆ.

ಏನಿದು ಘಟನೆ?

ಜಗಜೀತ್ ಎಂಬ ವ್ಯಕ್ತಿ, ಕಿರಾಣಿ ಅಂಗಡಿಯ ಮುಂದೆ ಮೂತ್ರ ವಿಸರ್ಜನೆ ಮಾಡುತ್ತಿರುವುದು ಕಂಡುಬಂದಿದೆ. ಅಂಗಡಿಯ ಶಟರ್ ಮುಚ್ಚಲ್ಪಟ್ಟಿತು, ಆದರೆ ಅದರ ಮಾಲೀಕರು ಅಂಗಡಿಯ ಹೊರಗಡೆ ನಿಂತಿದ್ದರು. ಈ ವಿಷಯದ ಬಗ್ಗೆ ಇಬ್ಬರ ನಡುವೆ ತೀವ್ರ ಗಲಾಟೆ ನಡೆದಿದೆ. ಸ್ಥಳದಿಂದ ಅಂಗಡಿ ಮಾಲೀಕರು ಹೊರಟುಹೋದರು ಜಗಜೀತ್ ಸ್ವಲ್ಪ ಸಮಯದ ನಂತರ ಸ್ನೇಹಿತರಾದ ಅಮಿತ್, ರಮಣ್​ದೀಪ್, ಗುರ್ವಿಂದರ್, ಜಸ್ಪ್ರೀತ್, ಜಗತ್ ಸಿಂಗ್, ಕರಣ್ ಮತ್ತು ಅಮನ್​ದೀಪ್ ಅವರೊಂದಿಗೆ ಬಂದು ಅಂಗಡಿ ಮಾಲೀಕರಾದ ವಿಮಲ್ ಮತ್ತು ವಿನಯ್ ಅವರೊಂದಿಗೆ ಜಗಳ ನಡೆಸಿದ್ದಾನೆ.

ಜಗಳದ ಸಮಯದಲ್ಲಿ ಜನ ಸೇರಿದ್ದಾರೆ, ಅವರ ಸಹಾಯದಿಂದ ವಿಮಲ್ ಮತ್ತು ವಿನಯ್, ಜಗಜೀತ್ ಅವರನ್ನು ಹಿಡಿದಿದ್ದಾರೆ. ಈ ವೇಳೆ ಅವನ ಇತರ ಸ್ನೇಹಿತರು ಸ್ಥಳದಿಂದ ಓಡಿಹೋಗಿದ್ದಾರೆ. ಸ್ಥಳದಿಂದ ತಪ್ಪಿಸಿಕೊಳ್ಳುವ ಸಮಯದಲ್ಲಿ, ಅಮನ್​ದೀಪ್ ಇದ್ದಕ್ಕಿದ್ದಂತೆ ಪ್ರಜ್ಞಾಹೀನನಾಗಿ ಬಿದ್ದಿದ್ದಾನೆ. ಅವನ ಸ್ನೇಹಿತರು ತಕ್ಷಣ ಹತ್ತಿರದ ಆಸ್ಪತ್ರೆಗೆ ಕರೆದೊಯ್ದಿದ್ದಾರೆ. ಆದರೆ ಆತ ಮೃತಪಟ್ಟಿದ್ದಾನೆ ಎಂದು ವೈದ್ಯರು ತಿಳಿಸಿದ್ದಾರೆ.

ಮರಣೋತ್ತರ ಪರೀಕ್ಷೆಯಲ್ಲಿ, ತೀಕ್ಷ್ಣವಾದ ಆಯುಧದಿಂದ ಯುವಕನ ಬೆನ್ನಿನಲ್ಲಿ ಗಂಭೀರ ಗಾಯಗಳಾಗಿರುವುದು ಕಂಡುಬಂದಿದೆ. ಈ ಜಗಳದ ಸಮಯದಲ್ಲಿ ವಿಮಲ್, ವಿನಯ್, ಸುರ್ಜೀತ್ ಮತ್ತು ಜಗಜೀತ್​ಗೂ ಗಾಯಗಳಾಗಿವೆ. ಪ್ರಕರಣ ಸಂಬಂಧ ಪೊಲೀಸರು ಅಂಗಡಿಯ ಮಾಲೀಕರನ್ನು ಬಂಧಿಸಿ ತನಿಖೆ ನಡೆಸುತ್ತಿದ್ದಾರೆ.