ನವದೆಹಲಿ: ದೇಶವನ್ನೇ ಬೆಚ್ಚಿಬೀಳಿಸಿದ್ದ ಶ್ರದ್ಧಾ ವಾಕರ್ ಹತ್ಯೆ ಪ್ರಕರಣದಲ್ಲಿ ಮತ್ತೊಂದು ಮಹತ್ವದ ಅಂಶ ಹೊರಬಿದ್ದಿದೆ. ಕತ್ತು ಹಿಸುಕಿ ಕೊಂದ ಬಳಿಕ ಶ್ರದ್ಧಾಳ ದೇಹವನ್ನು 35 ತುಂಡುಗಳನ್ನಾಗಿ ಮಾಡಿ, ಮೂಳೆಯನ್ನು ಗ್ರೈಂಡರ್ ಮೂಲಕ ಪುಡಿ ಮಾಡಿದ್ದ. ಬಳಿಕ ತುಂಡುಗಳನ್ನು ಒಂದೊಂದಾಗಿ ಬಿಸಾಡಿ ಬರುತ್ತಿದ್ದ ಎಂಬುದು ಬಯಲಾಗಿದೆ.
ಪ್ರಕರಣದ ತನಿಖೆ ನಡೆಸಿದ ದೆಹಲಿ ಪೊಲೀಸರು ಸಾಕೇತ್ ನ್ಯಾಯಾಲಯಕ್ಕೆ ಸಲ್ಲಿಸಿದ ಚಾರ್ಜ್ಶೀಟ್ನಲ್ಲಿ ಈ ಅಂಶವಿದೆ. ಹಂತಕ ಅಫ್ತಾಬ್ ಪೂನಾವಾಲಾ ನೀಡಿದ ತಪ್ಪೊಪ್ಪಿಗೆ ಹೇಳಿಕೆಯಂತೆ, ಶ್ರದ್ಧಾಳನ್ನು ಕೊಂದು, ದೇಹವನ್ನು ಯಾವ ರೀತಿ ವಿಲೇವಾರಿ ಮಾಡಿದೆ ಎಂಬ ಬಗ್ಗೆ ಸಂಪೂರ್ಣವಾಗಿ ಬಾಯ್ಬಿಟ್ಟಿದ್ದಾನೆ.
ಚಾರ್ಜ್ಶೀಟ್ನಲ್ಲಿದೆ ಭಯಾನಕ ಅಂಶಗಳು: ಕಳೆದ ವರ್ಷ ಮೇ 18 ರಂದು ಶ್ರದ್ಧಾಳನ್ನು ಕೊಂದ ನಂತರ ಪೂನಾವಾಲಾ ರಾತ್ರಿ ವೇಳೆ ಹಾರ್ಡ್ವೇರ್ ಅಂಗಡಿಗೆ ತೆರಳಿ ಹರಿತವಾದ ಆಯುಧವನ್ನು ಖರೀದಿಸಿದ್ದ. ಫ್ಲಾಟ್‌ಗೆ ಹಿಂತಿರುಗಿ ಶ್ರದ್ಧಾಳ ದೇಹವನ್ನು ಸ್ನಾನಗೃಹಕ್ಕೆ ಎಳೆದೊಯ್ದಿದ್ದಾನೆ. ಅಲ್ಲಿ ಹರಿತವಾದ ಆಯುಧದಿಂದ ಎರಡೂ ಕೈಗಳನ್ನು 3 ತುಂಡುಗಳು, ಕಾಲುಗಳನ್ನು ತಲಾ 3 ತುಂಡು, ತಲೆಯನ್ನು ಒಂದು ಭಾಗ, ತೊಡೆಯನ್ನು 2 ಭಾಗ ಸೇರಿದಂತೆ ಇಡೀ ದೇಹವನ್ನು 35 ತುಂಡುಗಳನ್ನಾಗಿ ಮಾಡಿದ್ದ.
ಕತ್ತರಿಸಿ ತುಂಡುಗಳನ್ನು ಮೊದಲು ಪಾಲಿಥಿನ್ ಪ್ಲಾಸ್ಟಿಕ್ ಬ್ಯಾಗ್ನಲ್ಲಿ ಇರಿಸಿದ್ದ. ಇದರ ಬಳಿಕ ದೇಹ ದುರ್ವಾಸನೆ ಬೀರದಿರಲು, ಮರುದಿನ ಅಂದರೆ ಮೇ 19 ರಂದು 25 ಸಾವಿರ ರೂ. ನೀಡಿ ರೆಫ್ರಿಜರೇಟರ್ ಖರೀದಿಸಿದ್ದ. ತುಂಡರಿಸಿದ ದೇಹವನ್ನು ಅದರಲ್ಲಿಟ್ಟು ವಾಸನೆ ಬಾರದಂತೆ ನೋಡಿಕೊಂಡಿದ್ದ. ರಕ್ತದ ಕಲೆ ಮತ್ತು ವಾಸನೆಯನ್ನು ಶುಚಿಗೊಳಿಸಲು ಬ್ಲಿಂಕಿಟ್ ಆ್ಯಪ್ ಮೂಲಕ ಟಾಯ್ಲೆಟ್ ಕ್ಲೀನರ್, ಬ್ಲೀಚಿಂಗ್, ಹ್ಯಾಂಡ್‌ವಾಶ್ ಮತ್ತು ಇತರ ವಸ್ತುಗಳನ್ನು ಖರೀದಿಸಿದ್ದ.
ಮೇ 19-20 ರ ಮಧ್ಯರಾತ್ರಿ 2 ಗಂಟೆಗೆ ದೇಹದ ತುಂಡೊಂದನ್ನು ಮೆಹ್ರೌಲಿ- ಗುರುಗ್ರಾಮ್ ರಸ್ತೆಯಲ್ಲಿರುವ ಚತ್ತರ್‌ಪುರ ಪಹಾರಿ ಕಾಡಿನಲ್ಲಿ ಬಿಸಾಡಿ ಬಂದಿದ್ದ. ಅದೇ ದಿನ ರಾತ್ರಿ ಜೊಮ್ಯಾಟೊ ಆ್ಯಪ್ ಮೂಲಕ ಚಿಕನ್ ರೋಲ್ ತರಿಸಿಕೊಂಡು ತಿಂದಿದ್ದ. ಹತ್ಯೆ ಮಾಡಿದ ಮೂರು ದಿನಗಳ ಬಳಿಕ ಸಾಕಷ್ಟು ನೀರಿನ ಕ್ಯಾನ್ಗಳನ್ನು ಆನ್ಲೈನ್ ಮೂಲಕ ತರಿಸಿಕೊಂಡಿದ್ದ ಎಂಬುದು ಚಾರ್ಜ್ಶೀಟ್ನಲ್ಲಿದೆ.
ಶ್ರದ್ಧಾ ಹತ್ಯೆ ಬಳಿಕ ಮತ್ತೊಂದು ಹುಡುಗಿಗೆ ಗಾಳ: ಶ್ರದ್ಧಾ ವಾಕರ್ಳನ್ನು ತುಂಡು ತುಂಡಾಗಿ ಕತ್ತರಿಸಿ ಮನೆಯೊಳಗೆ ಇಟ್ಟುಕೊಂಡಿದ್ದಾಗಲೇ ಡಬಲ್ ಡೇಟಿಂಗ್ ಆ್ಯಪ್ ಮೂಲಕ ಮತ್ತೊಂದು ಹುಡುಗಿಯ ಜೊತೆಗೆ ಸಂಪರ್ಕ ಬೆಳೆಸಿಕೊಂಡಿದ್ದ. ಇದಲ್ಲದೇ, ಆ ಹುಡುಗಿಯನ್ನು ತನ್ನ ಮನೆಗೆ ಕರೆಸಿಕೊಂಡಿದ್ದ. ಹೀಗೆ ಹಲವಾರು ಬಾರಿ ಅವರು ಮನೆಯಲ್ಲೇ ತಂಗಿದ್ದರು. ಹೊಸ ಹುಡುಗಿ ಬಂದಾಗ ಶ್ರದ್ಧಾ ದೇಹವನ್ನು ರೆಫ್ರಿಜರೇಟರ್ನಿಂದ ಹೊರತೆಗೆದು ಅದನ್ನು ಅಡುಗೆ ಮನೆಯ ಕ್ಯಾಬಿನ್ನಲ್ಲಿ ಇಟ್ಟು, ಹೋದ ಬಳಿಕ ಅದನ್ನು ಮತ್ತೆ ಫ್ರೀಜರ್ ಒಳಗೆ ಇಡುತ್ತಿದ್ದ ಎಂದು ಹಂತಕ ಹೇಳಿಕೊಂಡಿದ್ದಾನೆ.
ಹತ್ಯೆ ಮಾಡಿದ್ದು, ಗೊತ್ತಾಗದಿರಲಿ ಎಂದು ಶ್ರದ್ಧಾಳ ಇನ್ಸ್ಟಾಗ್ರಾಂ ಖಾತೆಯನ್ನು ತನ್ನ ಮೊಬೈಲ್ ಮೂಲಕ ಬಳಸಿ, ಸ್ನೇಹಿತರೊಂದಿಗೆ ಚಾಟ್ ಮಾಡುತ್ತಿದ್ದ. ಕೊಲೆ ಮಾಡಿದ ದಿನ ಅವಳ ಖಾತೆಯಿಂದ 55 ಸಾವಿರ ರೂ. ಹಣವನ್ನು ತನ್ನ ಖಾತೆಗೆ ವರ್ಗಾಯಿಸಿಕೊಂಡಿದ್ದ. ಬಳಿಕ ಶ್ರದ್ಧಾಳ ಮೊಬೈಲ್ ಅನ್ನು ಮುಂಬೈನಲ್ಲಿ ಎಸೆದು ಬಂದಿದ್ದ. ತನಿಖೆಯ ವೇಳೆ ಪೊಲೀಸರು ಶ್ರದ್ಧಾಳ ದೇಹದ 35 ತುಂಡುಗಳಲ್ಲಿ 20 ತುಂಡುಗಳನ್ನು ಪತ್ತೆ ಹಚ್ಚಿದ್ದಾರೆ ಎಂದು ಚಾರ್ಜ್ಶೀಟ್ ಹೇಳುತ್ತದೆ.
ಪ್ರಕರಣ ತನಿಖೆ ನಡೆಸಿದ ದೆಹಲಿ ಪೊಲೀಸರು ಜನವರಿ 24 ರಂದು 6629 ಪುಟಗಳ ಆರೋಪ ಪಟ್ಟಿಯನ್ನು ನ್ಯಾಯಾಲಯಕ್ಕೆ ಸಲ್ಲಿಸಿದ್ದಾರೆ. ಚಾರ್ಜ್ಶೀಟ್ ಸ್ವೀಕರಿಸಿರುವ ಕೋರ್ಟ್ ಪ್ರಕರಣವನ್ನು ಫೆಬ್ರವರಿ 21 ಕ್ಕೆ ಮುಂದೂಡಿದೆ.
ಓದಿ: ಇದು ಮೋದಿ-ಅದಾನಿ ಸಂಬಂಧ ಎಂದು ಫೋಟೋ ತೋರಿಸಿದ ರಾಹುಲ್: ಸ್ಪೀಕರ್ ಎಚ್ಚರಿಕೆ ಹೀಗಿತ್ತು!
