ಶಿಮ್ಲಾ (ಹಿಮಾಚಲ ಪ್ರದೇಶ): ತಮ್ಮದೇ ಆದ ಒಂದು ಸ್ವಂತ ಕಾರು, ಬೈಕ್ ಹೊಂದಬೇಕೆಂಬುದು ಬಹುಕೇತರ ಆಸೆ. ಇದರೊಂದಿಗೆ ತಮ್ಮ ವಾಹನಕ್ಕೆ ಗಮನ ಸೆಳೆಯುವ ನೋಂದಣಿ ನಂಬರ್ಗಳೂ ಇರಬೇಕೆಂದು ಬಯಸುವುದು ಸಾಮಾನ್ಯ. ಇದನ್ನು ವಿಐಪಿ ಅಥವಾ ವಿವಿಐಪಿ ಅಥವಾ ಫ್ಯಾನ್ಸಿ ನಂಬರ್ಗಳು ಎಂದು ಕರೆಯಲಾಗುತ್ತದೆ. ಇಂತಹ ಫ್ಯಾನ್ಸಿ ನಂಬರ್ ಹೊಂದಲು ಸಾಕಷ್ಟು ಹಣ ಖರ್ಚು ಮಾಡಬೇಕಾಗುತ್ತದೆ. ಹಿಮಾಚಲ ಪ್ರದೇಶದಲ್ಲಿ ಇಂತಹದ್ದೊಂದು ನಂಬರ್ಗೆ ಒಂದು ಕೋಟಿ ರೂ.ಗೂ ಅಧಿಕ ಬಿಡ್ ಮಾಡಲಾಗಿದೆ ಎಂದರೆ ನೀವು ನಂಬಲೇಬೇಕು.!
ಐಷಾರಾಮಿ ಕಾರಲ್ಲ! ಸ್ಕೂಟಿ ನಂಬರ್ಗೆ ಕೋಟಿ ಬಿಡ್: ರಾಜಧಾನಿ ಶಿಮ್ಲಾ ಜಿಲ್ಲೆಯಲ್ಲಿ ಹೆಚ್ಪಿ 999999 ಎಂಬ ವಿಐಪಿ ನಂಬರ್‌ನ ಬಿಡ್ ಒಂದು ಕೋಟಿ ರೂ ದಾಟಿದೆ. ಅಚ್ಚರಿ ಎಂದರೆ, ಈ ಸಂಖ್ಯೆ ಯಾವುದೇ ಐಷಾರಾಮಿ ಕಾರಿನ ನಂಬರ್ಗಾಗಿ ಅಲ್ಲ, ಸ್ಕೂಟಿಯ ನಂಬರ್ಗೆ ಇಷ್ಟೊಂದು ದೊಡ್ಡ ಮೊತ್ತದ ಬೇಡಿಕೆ ಬಂದಿದೆ. ಸ್ಕೂಟಿ ನಂಬರ್ಗೆ ಒಂದು ಸಾವಿರ ರೂ. ಮೀಸಲು ಬೆಲೆ ಇರಿಸಲಾಗಿದೆ. ಇಲ್ಲಿಯವರೆಗೆ ಸುಮಾರು 26 ಜನರು ಈ ಸಂಖ್ಯೆ ತೆಗೆದುಕೊಳ್ಳಲು ಆಸಕ್ತಿ ತೋರಿಸಿದ್ದಾರೆ. ಆದರೆ ಬಿಡ್ ಒಂದು ಕೋಟಿ 11 ಸಾವಿರ ರೂಪಾಯಿಗೆ ತಲುಪಿದೆ.
ನಾಳೆ ನಂಬರ್ ಹರಾಜು: ವಾಸ್ತವವಾಗಿ, ರಸ್ತೆ ಸಾರಿಗೆಯು ವಿವಿಐಪಿ ಸಂಖ್ಯೆಗಳಿಗೆ ಬಿಡ್‌ಗಳನ್ನು ಆಹ್ವಾನಿಸುತ್ತದೆ. ಈ ಸಂಖ್ಯೆಯನ್ನು ಪಡೆಯಲು ಆನ್‌ಲೈನ್ ಬಿಡ್ ಮಾಡಲು ಅವಕಾಶ ನೀಡಲಾಗುತ್ತಿದೆ. ಇಲ್ಲಿನ ಕೋಟ್‌ಖಾಯ್‌ನ ಪ್ರದೇಶದ ಬಹುಬೇಡಿಕೆಯ ಹೆಚ್ಪಿ 999999 ಆರ್‌ಎಲ್‌ಎ (ನೋಂದಣಿ ಮತ್ತು ಪರವಾನಗಿ ಪ್ರಾಧಿಕಾರ)ನ ಸ್ಕೂಟಿ ನಂಬರ್ಗೆ ಫೆಬ್ರವರಿ 17ರಂದು ಸಂಜೆ 5 ಗಂಟೆಯವರೆಗೆ ಬಿಡ್ಡಿಂಗ್ ನಡೆಯಲಿದೆ.
ಹೆಚ್ಪಿ 999999 ಹೇಗೆ?: ಯಾವುದೇ ವಾಹನಕ್ಕೆ ಸಮಾನ್ಯವಾಗಿ ನಾಲ್ಕೇ ನಂಬರ್ಗಳು ಇರುತ್ತವೆ. ಆದರೆ, ಆರು ಸಂಖ್ಯೆಯ ಹೆಚ್ಪಿ 999999 ಹೇಗೆ ಎಂಬ ಪ್ರಶ್ನೆ ಮೂಡಬಹುದು. ಇಲ್ಲಿ ಹೆಚ್ಪಿ 99 ಎಂಬುದು ಕೋಟ್‌ಖಾಯ್‌ನ ನೋಂದಣಿ ಸಂಖ್ಯೆಯಾಗಿದ್ದು, ನಂಬರ್ ಪ್ಲೇಟ್ 9999 ಆಗಿದೆ. ಇದರಿಂದ ಅದು ಒಟ್ಟಾಗಿ ಹೆಚ್ಪಿ 999999 ಎಂದು ಆಗುತ್ತದೆ. ಇದೇ ಮಾದರಿಯಲ್ಲಿ ಹೆಚ್ಪಿ 990009, ಹೆಚ್ಪಿ 990005, ಹೆಚ್ಪಿ 990003 ಮುಂತಾದ ಸಂಖ್ಯೆಗಳಿವೆಯಂತೆ. ಇವುಗಳಿಗೆ 21 ಲಕ್ಷ, 20 ಲಕ್ಷ ಮತ್ತು 10 ಲಕ್ಷದವರೆಗೂ ಬಿಡ್ ಮಾಡಲಾಗಿದೆ. ಆದರೆ ಹೆಚ್ಚಿನ ಜನರು ಕಣ್ಣುಗಳು ಹೆಚ್ಪಿ 999999 ಮೇಲೆ ಬೀರಿವೆ ಎಂದು ವರದಿಯಾಗಿದೆ.
ಇಲ್ಲಿ ವಿಚಿತ್ರ ಎಂದರೆ ಒಂದು ಕೋಟಿಯ ಬಿಡ್ ಮಾಡಿರುವುದು ಸ್ಕೂಟಿಯ ನಂಬರ್ ಪ್ಲೇಟ್ ಎಂಬುವುದು. ಯಾಕೆಂದರೆ, ಅಂದಾಜು 90 ಸಾವಿರದಿಂದ ಒಂದು ಲಕ್ಷದವರೆಗಿನ ಸ್ಕೂಟಿಗಳು ಮಾರುಕಟ್ಟೆಯಲ್ಲಿ ಲಭ್ಯವಿವೆ. ಇಂತಹ ಪರಿಸ್ಥಿತಿಯಲ್ಲಿ ಒಂದು ಲಕ್ಷ ಸ್ಕೂಟಿಗೆ ವಿಐಪಿ ನಂಬರ್ ಪಡೆಯಲೆಂದು ಒಂದು ಕೋಟಿ ಬಿಡ್ ಮಾಡಿರುವುದು ಎಲ್ಲರೂ ಹುಬ್ಬೇರಿಸುವಂತೆ ಮಾಡಿದೆ. ಕಳೆದ ಕೆಲ ವರ್ಷಗಳಲ್ಲಿ ಅಂತಹ ಸಂಖ್ಯೆಗಳನ್ನು ಖರೀದಿಸುವ ಕ್ರೇಜ್ ಹೆಚ್ಚಾಗಿದೆ. ಇದು ಸರ್ಕಾರಿ ಇಲಾಖೆಗೆ ಉತ್ತಮ ಆದಾಯದ ಮೂಲವೂ ಆಗಿದೆ ಎಂದರೂ ತಪ್ಪಲ್ಲ.
ಇದನ್ನೂ ಓದಿ: 40 ಕಿ.ಮೀ ದೂರ, 29 ನಿಮಿಷ..: ಡ್ರೋನ್ ಮೂಲಕ ಔಷಧ ಸೇವೆ ಪ್ರಾರಂಭಿಸಿದ ಏಮ್ಸ್!
