ಬೇಡವೆಂದ್ರೂ ಬೇಡದ ದೇಹತೂಕ ಜಾಸ್ತಿ ಆಗುತ್ತಿದೆಯಾ? ಅದಕ್ಕೆ ಹೀಗೆ ಮಾಡಿ ಸಾಕು..!

ಬಹುತೇಕ ಪಿಜ್ಜಾಗಳನ್ನು ಮೈದಾ ಹಿಟ್ಟು, ಚೀಸ್ ಹಾಗೂ ಮಾಂಸಗಳಿಂದ ತಯಾರಿಸಲಾಗಿರುತ್ತದೆ. ಹೆಚ್ಚು ಪ್ರಮಾಣದಲ್ಲಿ ಮಾಂಸ ಸೇವನೆಯಿಂದ ಬೊಜ್ಜು, ಹೃದಯ ಬೇನೆ ಸಮಸ್ಯೆಗಳು ಕಾಡಬಹುದು..

ಹೈದರಾಬಾದ್: ಲಾಕ್​ಡೌನ್​ ನಮ್ಮೆಲ್ಲರ ಜೀವನದಲ್ಲಿ ಒಂದಿಲ್ಲೊಂದು ರೀತಿಯ ಪ್ರತಿಕೂಲ ಪರಿಣಾಮ ಬೀರಿದೆ. ಬಹುತೇಕರು ಲಾಕ್​ಡೌನ್​ ಕಾರಣದಿಂದ ಮಾನಸಿಕ ಒತ್ತಡ ಹಾಗೂ ಬೇಸರದಿಂದ ಬಳಲಿದ್ದಾರೆ. ಮಾನಸಿಕ ಸ್ಥಿತಿಯ ಏರುಪೇರಿನಿಂದ ಕೆಲವರು ಅತಿ ಆಹಾರ ಸೇವಿಸುತ್ತಿದ್ದಾರೆ. ಈ ಸಮಯದಲ್ಲಿ ಕೆಲವರಿಗೆ ತಿಳಿಯದಂತೆಯೇ ಅವರ ದೇಹದಲ್ಲಿ ಕೊಬ್ಬಿನ ಅಂಶ ಜಾಸ್ತಿಯಾಗಿ ತೂಕ ವಿಪರೀತ ಹೆಚ್ಚುತ್ತಿದೆ. ಆದರೂ ಸಮತೋಲಿತ ಆಹಾರ ಸೇವಿಸುವ ಮೂಲಕ ಬೊಜ್ಜು ಬರದಂತೆ ತಡೆದು, ಆರೋಗ್ಯಕರವಾಗಿ ಬದುಕಬಹುದು. ಯಾವೆಲ್ಲ ಆಹಾರ ಪದಾರ್ಥಗಳು ತೂಕ ಹೆಚ್ಚಾಗಲು ಕಾರಣವಾಗುತ್ತವೆ ಎಂಬುದನ್ನು ಈ ಕೆಳಗೆ ವಿವರಿಸಲಾಗಿದೆ.

ಇವೇ ನೋಡಿ ದೇಹ ತೂಕ ಹೆಚ್ಚಿಸುವ ಪ್ರಮುಖ ಆಹಾರ ಪದಾರ್ಥಗಳು

ಸಕ್ಕರೆ ಮಿಶ್ರಿತ ಸೋಡಾ : ಸಕ್ಕರೆ ಮಿಶ್ರಣದ ಸೋಡಾ ಪೇಯಗಳು ಕೇವಲ ಕ್ಯಾಲೋರಿ ಹೆಚ್ಚಿಸುವ ದ್ರಾವಣಗಳಾಗಿವೆ. ಇವುಗಳಿಂದ ದೇಹಕ್ಕೆ ಯಾವುದೇ ಪೌಷ್ಠಿಕಾಂಶ ಸಿಗದಿದ್ದರೂ ದಿನಗಳೆದಂತೆ ಇವುಗಳ ವ್ಯಸನ ಆರಂಭವಾಗುತ್ತದೆ. ಆಗಾಗ ಸಕ್ಕರೆ ಮಿಶ್ರಿತ ಸೋಡಾ ಪೇಯಗಳನ್ನು ಕುಡಿಯುವವರ ದೇಹತೂಕ ಜಾಸ್ತಿಯಾಗುವ ಸಾಧ್ಯತೆ ಹೆಚ್ಚು ಅಂತಿದೆ ಅಧ್ಯಯನ. ಅಲ್ಲದೆ ಬೊಜ್ಜು, ಟೈಪ್-2 ಮಧುಮೇಹ, ಹೃದಯ ಬೇನೆ ಮುಂತಾದ ಆರೋಗ್ಯ ಸಮಸ್ಯೆಗಳಿಗೆ ಈ ಪೇಯಗಳೇ ಕಾರಣವಾಗಬಲ್ಲವು.

ಪಿಜ್ಜಾ : ಖುಷಿಯಿಂದ ಬಾಯಿ ಚಪ್ಪರಿಸಿ ತಿನ್ನುವ ಪಿಜ್ಜಾಗಳು ಆರೋಗ್ಯಕ್ಕೆ ಒಳ್ಳೆಯದಲ್ಲ ಎಂಬುದು ವಾಸ್ತವ. ಇವು ಬರೀ ಅನಾರೋಗ್ಯಕರ ಕ್ಯಾಲೋರಿಗಳಿಂದ ತುಂಬಿರುತ್ತವೆ. ಬಹುತೇಕ ಪಿಜ್ಜಾಗಳನ್ನು ಮೈದಾ ಹಿಟ್ಟು, ಚೀಸ್ ಹಾಗೂ ಮಾಂಸಗಳಿಂದ ತಯಾರಿಸಲಾಗಿರುತ್ತದೆ. ಹೆಚ್ಚು ಪ್ರಮಾಣದಲ್ಲಿ ಮಾಂಸ ಸೇವನೆಯಿಂದ ಬೊಜ್ಜು, ಹೃದಯ ಬೇನೆ ಸಮಸ್ಯೆಗಳು ಕಾಡಬಹುದು. ಕೆಲವೊಮ್ಮೆ ಕ್ಯಾನ್ಸರ್​ಗೂ ಕಾರಣವಾಗಬಹುದು. ಪಿಜ್ಜಾ ತಿನ್ನಲೇಬೇಕಿದ್ದರೆ ಧಾನ್ಯಗಳ ಹಿಟ್ಟು, ತರಕಾರಿಗಳನ್ನು ಬಳಸಿ ತಯಾರಿಸಿದ ಪಿಜ್ಜಾಗಳನ್ನೇ ತಿನ್ನಿ. ಮನೆಯಲ್ಲೇ ಆರೋಗ್ಯಕರ ಪಿಜ್ಜಾ ತಯಾರಿಸಿ ಸೇವಿಸುವುದು ಇನ್ನೂ ಉತ್ತಮ.

ಡೊನೆಟ್​ಗಳು : ಡೊನೆಟ್​ಗಳನ್ನು ಸಕ್ಕರೆ, ಮೈದಾಗಳಿಂದ ತಯಾರಿಸಿರುವುದರಿಂದ ಇವುಗಳಲ್ಲಿನ ಕ್ಯಾಲೋರಿ ಪ್ರಮಾಣ ಹೆಚ್ಚಾಗಿರುತ್ತದೆ. ಅಲ್ಲದೆ ಇವನ್ನು ಅತಿ ಬೇಯಿಸಿರುವುದರಿಂದ ಆರೋಗ್ಯಕ್ಕೆ ಸೂಕ್ತವಲ್ಲ. ಡೊನೆಟ್​ಗಳನ್ನು ಕಡಿಮೆ ಪ್ರಮಾಣದಲ್ಲಿ ಸೇವಿಸುವುದು ಹಿತಕರ.

ಫ್ರೆಂಚ್ ಫ್ರೈಸ್ : ಗರಿಗರಿಯಾದ ರುಚಿಕಟ್ಟಾಗಿರುವ ಫ್ರೆಂಚ್ ಫ್ರೈಸ್ ಯಾರಿಗಿಷ್ಟ ಇಲ್ಲ ಹೇಳಿ.. ಆದರೆ, ಇವುಗಳಲ್ಲಿ ಮೇಲಿನಿಂದ ಹೆಚ್ಚುವರಿ ಫ್ಯಾಟ್​ಗಳನ್ನು ಸೇರಿಸಿರುವುದರಿಂದ ಹಾಗೂ ಉಪ್ಪಿನ ಪ್ರಮಾಣ ಹೆಚ್ಚಾಗಿರುವುದರಿಂದ ಆರೋಗ್ಯಕ್ಕೆ ಮಾರಕವಾಗಬಲ್ಲವು. ಇನ್ನು ಇವನ್ನು ಕೆಚಪ್​ ಅಥವಾ ಸಾಸ್​ಗಳಲ್ಲಿ ಅದ್ದಿ ತಿನ್ನುವುದರಿಂದ ಮತ್ತಷ್ಟು ಸಕ್ಕರೆ ಹಾಗೂ ಲವಣಾಂಶಗಳನ್ನು ದೇಹಕ್ಕೆ ಸೇರಿಸಿದಂತಾಗುತ್ತದೆ.

ಹಣ್ಣಿನ ಜ್ಯೂಸ್​ಗಳು : ಹಣ್ಣಿನ ಜ್ಯೂಸ್​ಗಳಲ್ಲಿ ಸಕ್ಕರೆ ಪ್ರಮಾಣ ಅತಿಯಾಗಿದೆ. ಪೌಷ್ಠಿಕಾಂಶಗಳ ಪ್ರಮಾಣ ಕಡಿಮೆ ಇರುತ್ತದೆ. ಆದ್ದರಿಂದ ಜ್ಯೂಸ್​ ಬದಲು ನೇರವಾಗಿ ಹಣ್ಣುಗಳನ್ನು ಸೇವಿಸುವುದು ಆರೋಗ್ಯಕ್ಕೆ ಉತ್ತಮ.

ಹೆಚ್ಚು ಸಕ್ಕರೆ ಮಿಶ್ರಿತ ಕಾಫಿ : ಕಾಫಿ ನಿಜವಾಗಿಯೂ ಆರೋಗ್ಯಕರ ಪೇಯವಾಗಿದೆ. ಆದರೆ, ಇದರಲ್ಲಿ ಅತಿಯಾಗಿ ಸಕ್ಕರೆ ಬೆರೆಸುವುದು ಮಾತ್ರ ಸಲ್ಲದು. ಕಾಫಿಯಲ್ಲಿ ಸಕ್ಕರೆ ಹೆಚ್ಚಿದಷ್ಟೂ ಬೊಜ್ಜಿನ ಪ್ರಮಾಣ ಹೆಚ್ಚಾಗುವುದು ಖಂಡಿತ.

ಇನ್ನು ಮುಂದೆ ಯಾವುದೇ ಆಹಾರ ಸೇವಿಸುವ ಮುನ್ನ ಅದು ನಿಮ್ಮ ದೇಹಕ್ಕೆ ಎಷ್ಟು ಕ್ಯಾಲೋರಿಗಳನ್ನು ಸೇರಿಸಬಹುದು ಎಂಬುದನ್ನು ಸ್ವಲ್ಪ ಯೋಚಿಸಿ ಆಮೇಲೆ ಮುಂದುವರಿಯಿರಿ. ಬೊಜ್ಜು ತರಿಸುವ ಆಹಾರ ಪದಾರ್ಥಗಳು ನಿಮ್ಮ ದೇಹಕ್ಕೆ ಬೇಡವಾದ ಕ್ಯಾಲೋರಿಗಳನ್ನು ಸೇರಿಸುತ್ತ ಹೋಗುವುದರಿಂದ ಶರೀರದ ತೂಕ ಬಹು ಬೇಗನೆ ಹೆಚ್ಚಾಗುವ ಅಪಾಯವಿರುತ್ತದೆ. ಕೇವಲ ಬಾಯಿರುಚಿಗಾಗಿ ಆಹಾರ ಸೇವಿಸದೇ ಆರೋಗ್ಯಕರ ಆಹಾರ ಸೇವಿಸುವುದನ್ನು ರೂಢಿ ಮಾಡಿಕೊಂಡರೆ ಉತ್ತಮ. ಆರೋಗ್ಯವೇ ಭಾಗ್ಯ ಎಂಬುದನ್ನು ತಿಳಿದರೆ ಬಾಯಿ ರುಚಿಯ ಆಹಾರಗಳು ತನ್ನಿಂತಾನೇ ದೂರವಾಗುತ್ತವೆ..