ಮುಂಬೈ: ಸಣ್ಣ ಹೂಡಿಕೆದಾರರಿಗೆ RBI ಅನುಕೂಲ ಮಾಡಿಕೊಡಲು ಮುಂದಾಗಿದೆ. ಸರ್ಕಾರಿ ಭದ್ರತೆಗಳಲ್ಲಿ ಹೂಡಿಕೆ ಮಾಡಲು ಅನುಕೂಲವಾಗುವಂತೆ ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ ‘ಆರ್ಬಿಐ ರಿಟೇಲ್ ಡೈರೆಕ್ಟ್’ ಎಂಬ ಯೋಜನೆಯನ್ನು ಸೋಮವಾರ ಜಾರಿಗೊಳಿಸಿದೆ.
ಸಣ್ಣ ಹೂಡಿಕೆದಾರರು ಸರ್ಕಾರಿ ಬಾಂಡ್‌ಗಳನ್ನು ನೇರವಾಗಿ ಖರೀದಿಸಲು ಮತ್ತು ಮಾರಾಟ ಮಾಡಲು ಆರ್ಬಿಐ ಈ ಮೂಲಕ ಅವಕಾಶ ಕಲ್ಪಿಸಲಿದೆ. ಸರ್ಕಾರಿ ಸಾಲಪತ್ರಗಳ ಮಾರುಕಟ್ಟೆಯಲ್ಲಿ ನೇರವಾಗಿ ಹೂಡಿಕೆ ಮಾಡುವುದನ್ನು ಪ್ರೋತ್ಸಾಹಿಸಲು ಈ ಕ್ರಮ ಕೈಗೊಳ್ಳಲಾಗಿದೆ.
2021 ರ ಫೆಬ್ರವರಿಯಲ್ಲಿ ಆರ್ಬಿಐ ಈ ಯೋಜನೆಯನ್ನು ಘೋಷಿಸಿತ್ತು. ಇಲ್ಲಿಯ ತನಕ ಸಣ್ಣ ಹೂಡಿಕೆದಾರರು ನೇರವಾಗಿ ಸರ್ಕಾರಿ ಬಾಂಡ್ ಖರೀದಿಸಲು ಅವಕಾಶವಿರಲಿಲ್ಲ. ಈಗ ನೇರವಾಗಿ ಬಿಡ್ಡಿಂಗ್ ಮಾಡಲು ಸಾಧ್ಯವಾಗಲಿದೆ. ಆರ್‌ಬಿಐನ ಇ-ಕುಬೇರ್ ವೇದಿಕೆ ಮೂಲಕ ‘ಗಿಲ್ಟ್‌ ಸೆಕ್ಯುರಿಟೀಸ್‌ ಖಾತೆ’ ತೆರೆಯಬೇಕು. ನಂತರ ಆರ್‌ಬಿಐನ NDS-OM (ನೆಗೋಷಿಯೇಟೆಡ್ ಡೀಲಿಂಗ್ ಸಿಸ್ಟಮ್ ಆರ್ಡರ್ ಮ್ಯಾಚಿಂಗ್) ಮೂಲಕ ಬಿಡ್ ಸಲ್ಲಿಸಬಹುದು.
ಇದನ್ನೂ ಓದಿ:ಹಿಂದಿ, ಇಂಗ್ಲಿಷ್ ಭಾಷೆಗಳಲ್ಲಿ ಮಾತ್ರ ಬ್ಯಾಂಕಿಂಗ್ ಪರೀಕ್ಷೆ : IBPS ನಿರ್ಧಾರ ಖಂಡಿಸಿದ ಮನು ಬಳಿಗಾರ್
ಸಣ್ಣ ಅಥವಾ ಚಿಲ್ಲರೆ ಹೂಡಿಕೆದಾರರು ಭಾರತದಲ್ಲಿ ಉಳಿತಾಯ ಖಾತೆ ಹೊಂದಿದ್ದರೆ, ಈ ಯೋಜನೆಯಡಿ ನೊಂದಾಯಿಸಿಕೊಳ್ಳಬಹುದು ಮತ್ತು ಆರ್ಡಿಜಿ ಖಾತೆಯನ್ನು ನಿರ್ವಹಿಸಬಹುದು. 1999ರ ವಿದೇಶಿ ವಿನಿಮಯ ನಿರ್ವಹಣಾ ಕಾಯ್ದೆಯಡಿ ಸರ್ಕಾರಿ ಭದ್ರತೆಗಳಲ್ಲಿ ಹೂಡಿಕೆ ಮಾಡಲು ಅರ್ಹರಾಗಿರುವ ಅನಿವಾಸಿ ಸಣ್ಣ ಹೂಡಿಕೆದಾರರು ಕೂಡ ಈ ಯೋಜನೆಗೆ ಅರ್ಹರಾಗಿದ್ದಾರೆ. ಇದರಲ್ಲಿ ಜಂಟಿ ಖಾತೆ ತೆರೆಯಲೂ ಅವಕಾಶವಿದೆ ಎಂದು ಆರ್ಬಿಐ ಹೇಳಿದೆ.
