ಕಾಸರಗೋಡು: ಕೇರಳದ ಕಾಸರಗೋಡು ಜಿಲ್ಲೆಯ ಬೇಕಲ್ ಪೊಲೀಸ್ ಠಾಣೆ ಭಾರಿ ಬದಲಾವಣೆ ಹೊಂದಿದೆ. ಈ ಠಾಣೆಗೆ ಪಂಚತಾರಾ ಹೋಟೆಲ್ನ ಕಳೆ ಬಂದಿದೆ. ಇಲ್ಲಿಗೆ ಯಾರಾದರೂ ಭೇಟಿ ನೀಡಿದರೆ, ಅಚ್ಚರಿಗೊಳಗಾಗುವುದರ ಜತೆ ಹಾದಿ ತಪ್ಪಿ ಬಂದಿದೆವಾ ಎಂಬ ಅನುಮಾನ ಕಾಡದಿರದು. ಹಾಗೆ ಬದಲಾಗಿದೆ ಬೇಕಲ್ ಪೊಲೀಸ್ ಠಾಣೆ.
ಎಲ್ಲ ರೀತಿಯಿಂದಲೂ ಈ ಠಾಣೆ ಐಶಾರಾಮಿ ಆಗಿ ಕಂಗೊಳಿಸುತ್ತಿದೆ. ಸುಮಾರು 10 ಲಕ್ಷ ರೂ ವೆಚ್ಚದಲ್ಲಿ ಈ ಠಾಣೆಯನ್ನ ಪುನರ್ ನಿರ್ಮಾಣ ಮಾಡಲಾಗಿದೆ. ಇಲ್ಲವೇ ಹೊಸ ಟಚ್ ನೀಡಲಾಗಿದೆ. ಕಾಸರಗೂಡಿನ ತ್ರಿಕ್ಕನತ್ತು ಬೆಸೆಯುವ ರಾಜ್ಯ ಹೆದ್ದಾರಿಯಲ್ಲಿ ಈ ಪೊಲೀಸ್ ಠಾಣೆ ಇದೆ. ಹೇಗೆಲ್ಲ ಠಾಣೆಗೆ ಹೊಸ ಕಳೆ ತುಂಬಲಾಗಿದೆ ಎಂದರೆ, ಪ್ರವೇಶದ್ವಾರದಿಂದ ಹಿಡಿದು ರೆಸ್ಟ್ ರೂಂವರೆಗೂ ಮಾರ್ಪಾಡುಗಳಾಗಿವೆ.
ಪೀಠೋಪಕರಣಗಳು, ದೀಪಗಳನ್ನು ಅಲಂಕರಿಸುವ ಮೂಲಕ ಹೊಸ ರೂಪ ನೀಡಲಾಗಿದೆ. ತಮ್ಮ ದೂರುಗಳನ್ನು ಸಲ್ಲಿಸಲು ಪೊಲೀಸ್ ಠಾಣೆಗೆ ಬರುವ ದೂರುದಾರರಿಗೆ ಕುಳಿತುಕೊಳ್ಳಲು ವ್ಯವಸ್ಥಿತ ಲಾಂಜ್ಗಳನ್ನ ನಿರ್ಮಾಣ ಮಾಡಲಾಗಿದೆ. ಈ ನವೀಕರಣ ಕಾಮಗಾರಿ 21 ದಿನಗಳಲ್ಲಿ ಪೂರ್ಣಗೊಂಡಿದೆ. ಸರ್ಕಾರಿ ನಿದಿಯಷ್ಟೇ ಅಲ್ಲ, ಪೊಲೀಸರೇ ಹಣ ಹಾಕಿ ಪೊಲೀಸ್ ಠಾಣೆಗೆ ಹೊಸ ಟಚ್ ನೀಡಿದ್ದಾರೆ.
