ಪಾಟ್ನಾ: ಪೊಲೀಸರು ಕರ್ತವ್ಯನಿರತರಾಗಿರುವಾಗ ಮೊಬೈಲ್ ಅಥವಾ ಇನ್ನಿತರ ಯಾವುದೇ ಗ್ಯಾಜೆಟ್ ಉಪಯೋಗಿಸಕೂಡದೆಂದು ಬಿಹಾರ ಪೊಲೀಸ್ ಮಹಾನಿರ್ದೇಶಕರು ರಾಜ್ಯ ಪೊಲೀಸರಿಗೆ ಆದೇಶ ನೀಡಿದ್ದಾರೆ. ಈ ಹೊಸ ಆದೇಶ ಪಾಲಿಸದಿದ್ದರೆ ಅದನ್ನು ಸರ್ಕಾರಿ ಸೇವಾ ನಿಯಮಗಳ ಉಲ್ಲಂಘನೆ ಎಂದು ಪರಿಗಣಿಸಲಾಗುವುದು ಹಾಗೂ ನಿಯಮ ಪಾಲಿಸದವರ ವಿರುದ್ಧ ಸೂಕ್ತ ಕ್ರಮ ಕೈಗೊಳ್ಳಲಾಗುವುದು ಎಂದು ಹೇಳಿದ್ದಾರೆ.
ಡ್ಯೂಟಿಯಲ್ಲಿರುವಾಗ ಮೊಬೈಲ್ ಬಳಕೆಯಿಂದ ಪೊಲೀಸರ ಗಮನ ಬೇರೆಡೆ ಹೋಗುತ್ತದೆ. ಇದರಿಂದ ಅವರ ಕಾರ್ಯಕ್ಷಮತೆಯು ಕುಗ್ಗುತ್ತದೆ ಎಂದು ಡಿಜಿಪಿ ಎಸ್.ಕೆ. ಸಿಂಘಾಲ್ ಅಭಿಪ್ರಾಯ ಪಟ್ಟಿದ್ದಾರೆ.
ಅದೆಷ್ಟೋ ದೂರು ಬಂದಿವೆ
ಡ್ಯೂಟಿ ಸಮಯದಲ್ಲಿ ಪೊಲೀಸರು ಹಾಗೂ ಅಧಿಕಾರಿಗಳು ಅನವಶ್ಯಕವಾಗಿ ಮೊಬೈಲ್ ನೋಡುತ್ತ ಕೆಲಸದ ಬಗ್ಗೆ ನಿರ್ಲಕ್ಷ್ಯ ವಹಿಸಿರುವ ಅನೇಕ ಪ್ರಕರಣಗಳು ಕಂಡುಬಂದಿವೆ. ಪೊಲೀಸರು ಡ್ಯೂಟಿ ಸಮಯದಲ್ಲಿ ವೈಯಕ್ತಿಕ ಸೋಶಿಯಲ್ ಮೀಡಿಯಾ ಮೆಸೇಜ್ ನೋಡುವುದು, ಕಳುಹಿಸುವುದು ಮಾಡುವುದರಿಂದ ಅವರ ಕಾರ್ಯಕ್ಷಮತೆಯ ಮೇಲೆ ಪ್ರತಿಕೂಲ ಪರಿಣಾಮ ಬೀರುತ್ತಿದೆ. ಇದು ಪೊಲೀಸ್ ಇಲಾಖೆಯ ಶಿಸ್ತು ಪಾಲನೆಯ ನಿಯಮಕ್ಕೆ ವಿರುದ್ಧವಾಗಿದೆ ಎಂದು ಸಿಂಘಾಲ್ ಹೇಳಿದ್ದಾರೆ.
