ಬೆಂಗಳೂರು: 580 ವರ್ಷಗಳಲ್ಲೇ ಅತ್ಯಂತ ದೀರ್ಘಾವಧಿಯ ಭಾಗಶಃ ಚಂದ್ರಗ್ರಹಣ (Lunar Eclipse 2021) ಇಂದು ಸಂಭವಿಸಲಿದೆ ಮತ್ತು ಈಶಾನ್ಯ ಭಾರತದ ಕೆಲವು ಭಾಗಗಳಲ್ಲಿ ಗೋಚರಿಸುತ್ತದೆ ಎಂದು ಖಗೋಳ ಭೌತಶಾಸ್ತ್ರಜ್ಞರು ತಿಳಿಸಿದ್ದಾರೆ.
ಅರುಣಾಚಲ ಪ್ರದೇಶ ಮತ್ತು ಅಸ್ಸೋಂನ ಕೆಲವು ಪ್ರದೇಶಗಳಲ್ಲಿ ಅಪರೂಪದ ವಿದ್ಯಮಾನವು ಗೋಚರಿಸಲಿದೆ. ಭಾಗಶಃ ಗ್ರಹಣವು (The longest partial lunar eclipse) ಇಂದು ಮಧ್ಯಾಹ್ನ 12.48ಕ್ಕೆ ಆರಂಭವಾಗಿ ಸಂಜೆ 4.17ಕ್ಕೆ ಮುಕ್ತಾಯವಾಗಲಿದೆ. ಗ್ರಹಣದ ಅವಧಿ 3 ಗಂಟೆ 28 ನಿಮಿಷ 24 ಸೆಕೆಂಡ್‌ಗಳಾಗಿದ್ದು, ಇದು 580 ವರ್ಷಗಳಲ್ಲೇ ಅತಿ ದೀರ್ಘವಾಗಿದೆ. ಅರುಣಾಚಲ ಪ್ರದೇಶ ಮತ್ತು ಅಸ್ಸೋಂನ ಕೆಲವು ಪ್ರದೇಶಗಳು ಪೂರ್ವ ದಿಗಂತಕ್ಕೆ ಬಹಳ ಹತ್ತಿರದಲ್ಲಿ ಚಂದ್ರೋದಯದ ನಂತರ ಭಾಗಶಃ ಗ್ರಹಣದ ಕೊನೆಯ ಕ್ಷಣಗಳನ್ನು ಕಾಣಬಹುದು.
ಫೆಬ್ರವರಿ 18, 1440ರಂದು ಕೊನೆಯ ಬಾರಿಗೆ ಇಂತಹ ಧೀರ್ಘಾವಧಿಯ ಭಾಗಶಃ ಚಂದ್ರಗ್ರಹಣ ಸಂಭವಿಸಿತ್ತು. ಮುಂದಿನ ಬಾರಿ ಇದೇ ರೀತಿಯ ವಿದ್ಯಮಾನ 2669ರ ಫೆಬ್ರವರಿ 8ರಂದು ಸಂಭವಿಸಲಿದೆ. ಚಂದ್ರನು ರಕ್ತಕೆಂಪು ಬಣ್ಣದಲ್ಲಿ (Blood red Moon) ಕಾಣಿಸಿಕೊಳ್ಳುವ ಸಾಧ್ಯತೆಯಿದೆ. ಭಾಗಶಃ ಚಂದ್ರಗ್ರಹಣವು (The longest partial lunar eclipse) ಉತ್ತರ ಅಮೆರಿಕ, ದಕ್ಷಿಣ ಅಮೆರಿಕ, ಪೂರ್ವ ಏಷ್ಯಾ, ಆಸ್ಟ್ರೇಲಿಯಾ ಮತ್ತು ಪೆಸಿಫಿಕ್ ಪ್ರದೇಶದಲ್ಲಿ ಗೋಚರಿಸಲಿದೆ.
ಸೂರ್ಯ, ಭೂಮಿ ಮತ್ತು ಚಂದ್ರ ಅಪೂರ್ಣವಾಗಿ ಜೋಡಿಸಿದಾಗ ಸಂಭವಿಸುವ ಪೆನಂಬ್ರಾಲ್ ಗ್ರಹಣವು ಬೆಳಗ್ಗೆ 11.32ಕ್ಕೆ ಪ್ರಾರಂಭವಾಗಿ ಸಂಜೆ 5.33ಕ್ಕೆ ಕೊನೆಗೊಳ್ಳುತ್ತದೆ. ಉತ್ತರ ಪ್ರದೇಶ, ಬಿಹಾರ, ಜಾರ್ಖಂಡ್, ಪಶ್ಚಿಮ ಬಂಗಾಳ ಮತ್ತು ಒಡಿಶಾದಿಂದ ಪೆನಂಬ್ರಲ್ ಗ್ರಹಣವು (penumbral eclipse) ಗೋಚರಿಸುತ್ತದೆ. ಆದರೆ, ಈ ಸ್ಥಳಗಳಿಂದ ಇದನ್ನು ಸಂಕ್ಷಿಪ್ತವಾಗಿ ಮಾತ್ರ ಕಾಣಬಹುದು.
ಜುಲೈ 27, 2018ರಂದು ಕೊನೆಯ ಚಂದ್ರಗ್ರಹಣ (Lunar Eclipse) ಸಂಭವಿಸಿತ್ತು. ಮುಂದಿನ ಚಂದ್ರಗ್ರಹಣವು ಮೇ 16, 2022ರಂದು ಸಂಭವಿಸಲಿದೆ. ಆದರೆ, ಇದು ಭಾರತದಲ್ಲಿ ಗೋಚರಿಸುವುದಿಲ್ಲ. ಭಾರತದಲ್ಲಿ ಗೋಚರಿಸುವ ಮುಂದಿನ ಚಂದ್ರಗ್ರಹಣವು ನವೆಂಬರ್ 8, 2022ರಂದು ಸಂಭವಿಸಲಿದೆ.
ಇದನ್ನೂ ಓದಿ: VIDEO... ವರುಣಾಘಾತಕ್ಕೆ ತಿರುಪತಿಯ ತಿಮ್ಮಪ್ಪನ ಸನ್ನಿಧಿ ತತ್ತರ..
