ರಷ್ಯಾ ಮತ್ತು ಉಕ್ರೇನ್ ನಡುವಿನ ಯುದ್ಧ ಮುಂದುವರೆದಿದ್ದು, ತೀವ್ರ ಸಾವು- ನೋವು ಉಂಟಾಗುತ್ತಿದೆ. ಈ ಯುದ್ಧದಲ್ಲಿ ಅಮೆರಿಕ-ನಿರ್ಮಿತ ಕಾಂಪ್ಯಾಕ್ಟ್ ಎಫ್‌ಜಿಎಂ-148 ಜಾವೆಲಿನ್ ಟ್ಯಾಂಕ್ ವಿರೋಧಿ ಕ್ಷಿಪಣಿಯು ಉಕ್ರೇನ್ಗೆ ಪಡೆಗಳಿಗೆ ಉಪಯುಕ್ತವಾಗಿದೆ.
ಈ ಕ್ಷಿಪಣಿಯ ಪ್ರಮುಖ ಪ್ಲಸ್ ಪಾಯಿಂಟ್ ಎಂದರೆ, ಅದನ್ನು ಒಬ್ಬರೇ ಹೊತ್ತೊಯ್ಯಬಹುದು ಮತ್ತು ಉಡಾವಣೆ ಮಾಡಬಹುದು. ಪರಿಣಾಮವಾಗಿ, ಯುದ್ಧ ವಲಯದಲ್ಲಿ ಇದು ತುಂಬ ಅನುಕೂಲವಾಗಿದೆ. ಕಳೆದ ಎರಡು ದಶಕಗಳಿಂದ ಈ ಕ್ಷಿಪಣಿಯು ಅಮೆರಿಕ ಸೇನೆಯ ವಶದಲ್ಲಿದೆ. ಉಕ್ರೇನ್ ಮಾತ್ರವಲ್ಲದೆ, ಇನ್ನೂ 20 ದೇಶಗಳು ಯಂತ್ರಗಳ ಸಹಾಯವಿಲ್ಲದೆ ಮಾನವನೇ ಸಾಗಿಸಬಹುದಾದ ಈ ಕ್ಷಿಪಣಿಗಳನ್ನು ಹೊಂದಿವೆ. ಸಾಮಾನ್ಯವಾಗಿ ನ್ಯಾಟೋ (NATO) ಎಂದು ಕರೆಯಲಾಗುವ ಉತ್ತರ ಅಟ್ಲಾಂಟಿಕ್ ಒಪ್ಪಂದ ಸಂಸ್ಥೆಯ ಕೆಲವು ಸದಸ್ಯ ರಾಷ್ಟ್ರಗಳಿಗಿಂತ ಹೆಚ್ಚು ಸಂಖ್ಯೆಯ ಜಾವೆಲಿನ್ ಕ್ಷಿಪಣಿಗಳನ್ನು ಉಕ್ರೇನ್ ಸೇನೆಯು ಈಗ ಹೊಂದಿದೆ ಎಂದು ಹೇಳಲಾಗುತ್ತದೆ.
ರೇಥಿಯಾನ್ ಕ್ಷಿಪಣಿಗಳು (ಈ ಮೊದಲು ಟೆಕ್ಸಾಸ್ ಇನ್‌ಸ್ಟ್ರುಮೆಂಟ್ ಎಂದು ಪ್ರಸಿದ್ಧವಾಗಿದ್ದವು) ಮತ್ತು ಲಾಕ್ಹೀಡ್ ಮಾರ್ಟಿನ್ (ಈ ಹಿಂದೆ ಮಾರ್ಟಿನ್ ಮರಿಯೆಟ್ಟಾ ಎಂದು ಕರೆಯಲಾಗುತ್ತಿತ್ತು) ನಡುವಿನ ಜಂಟಿ ಉದ್ಯಮವಾಗಿರುವ ಜಾವೆಲಿನ್ ಜಾಯಿಂಟ್ ವೆಂಚರ್ ಈ ಜಾವೆಲಿನ್ ಅನ್ನು ವಿನ್ಯಾಸಗೊಳಿಸಿದೆ. ಇದು ಟಾಪ್-ಅಟ್ಯಾಕ್ ಮೋಡ್‌ನಲ್ಲಿ 490 ಅಡಿ ಎತ್ತರವನ್ನು ಮತ್ತು ಡೈರೆಕ್ಟ್-ಫೈರ್ ಮೋಡ್‌ನಲ್ಲಿ 200 ಅಡಿ ಎತ್ತರವನ್ನು ತಲುಪಬಹುದು. ಇದು ಯಾವುದೇ ಸೇನೆಯಲ್ಲಿ ಪ್ರಮುಖವಾಗಿರುವ ಯುದ್ಧ ಟ್ಯಾಂಕ್ ಅನ್ನು ನಾಶಪಡಿಸಬಲ್ಲದು ಹಾಗೂ ಕಡಿಮೆ ಎತ್ತರದಲ್ಲಿ ಹಾರುವ ಹೆಲಿಕಾಪ್ಟರ್ ಅನ್ನೂ ಗುರಿಯಿಟ್ಟು ಹೊಡೆಯಬಲ್ಲದು. ಮೊದಲ ಬಾರಿಗೆ 1991ರಲ್ಲಿ ಇದರ ಪರೀಕ್ಷೆ ನಡೆಸಲಾಯಿತು. ಇರಾಕ್ ಮತ್ತು ಅಫ್ಘಾನಿಸ್ತಾನದ ಯುದ್ಧದ ಸಮಯದಲ್ಲಿ 5,000ಕ್ಕೂ ಹೆಚ್ಚು ಕಾರ್ಯಾಚರಣೆಗಳಲ್ಲಿ ಈ ಕ್ಷಿಪಣಿಯನ್ನು ವ್ಯಾಪಕವಾಗಿ ಮತ್ತು ಮತ್ತು ಯಶಸ್ವಿಯಾಗಿ ಬಳಸಲಾಯಿತು. ಈ ಕ್ಷಿಪಣಿ ವ್ಯವಸ್ಥೆಯನ್ನು ಕ್ರಿ.ಶ. 2050ರವರೆಗೆ ದಾಸ್ತಾನು ಮಾಡಲು ನಿರ್ಧರಿಸಲಾಗಿದೆ.
ಪ್ರಸ್ತುತ, ಎಫ್‌ಜಿಎಂ-148 ಜಾವೆಲಿನ್ ವಿಶ್ವದ ಅತ್ಯಂತ ಸುಧಾರಿತ, ಮಾನವರೇ ಸಾಗಿರಬಹುದಾದ ಟ್ಯಾಂಕ್ ನಿರೋಧಕ ಮಾರ್ಗದರ್ಶಿ ಕ್ಷಿಪಣಿ ವ್ಯವಸ್ಥೆಗಳಲ್ಲಿ ಒಂದಾಗಿದೆ. ಜಾವೆಲಿನ್ ಕ್ಷಿಪಣಿ ವ್ಯವಸ್ಥೆಯು ಎರಡು ಭಾಗಗಳನ್ನು ಹೊಂದಿದೆ. ಅವುಗಳೆಂದರೆ ಕಮಾಂಡ್ ಲಾಂಚ್ ಯುನಿಟ್ (ಸಿಎಲ್‌ಯು) ಮತ್ತು ಕ್ಷಿಪಣಿ ಸಹಿತವಾದ ಲಾಂಚರ್ ಟ್ಯೂಬ್. ಸಿಎಲ್‌ಯು ಬಿಡಿಭಾಗವನ್ನು ಮರುಬಳಕೆ ಮಾಡಬಹುದು. ಆದರೆ, ಟ್ಯೂಬ್ ಅನ್ನು ಎಸೆಯಬೇಕಾಗುತ್ತದೆ. ಈ ಜಾವೆಲಿನ್‌ನಲ್ಲಿ ಒಟ್ಟು ಐದು ರೂಪಾಂತರಗಳಿವೆ.
ಈ ಕ್ಷಿಪಣಿಯನ್ನು ದಿನದ ಯಾವುದೇ ಸಮಯದಲ್ಲಿ ಮತ್ತು ಯಾವುದೇ ರೀತಿಯ ಹವಾಮಾನದಲ್ಲಿ, ಹಲವು ವೇದಿಕೆಗಳಿಂದ ನಿಯೋಜಿಸಬಹುದು. ಭೂಮಿಯ ಮೇಲೆ ಚಲಿಸುವ ಮಾನವರಹಿತವಾದ ವಾಹನದಲ್ಲಿ ರಿಮೋಟ್ ಲಾಂಚ್‌ನಿಂದ ಇದನ್ನು ಹಾರಿಸಬಹುದು. ಅದರ ಜೊತೆಗೆ ಈ ಕ್ಷಿಪಣಿ ಕೆಲವು ಮಿತಿಗಳನ್ನೂ ಹೊಂದಿದೆ. ಜಾವೆಲಿನ ಕ್ಷಿಪಣಿಯ ವೈಶಿಷ್ಟ್ಯಗಳನ್ನು ಇಸ್ರೇಲಿನ ಸ್ಪೈಕ್ ಮತ್ತು ಚೀನಾದ ಜೆಎಚ್-12ಗೆ ಹೋಲಿಸಬಹುದು.
ರಷ್ಯಾ ಯುದ್ಧ ಆರಂಭಿಸಿ ಕೆಲವು ದಿನಗಳ ಬಳಿಕ, ಕೊಂಚ ವಿಳಂಬವಾಗಿಯೇ ಮಾರ್ಚ್ ತಿಂಗಳ ಮೊದಲ ವಾರದಲ್ಲಿ ಅಮೆರಿಕವು ಉಕ್ರೇನ್ಗೆ ತನ್ನ ಶಸ್ತ್ರಾಸ್ತ್ರಗಳ ಬೆಂಬಲವನ್ನು ನೀಡಿತು. ಜೋ ಬೈಡನ್ ಅವರ ನೇತೃತ್ವದ ಅಮೆರಿಕ ಸರ್ಕಾರವು ಉಕ್ರೇನ್‌ನ ರಕ್ಷಣಾ ಇಲಾಖೆಯ ತಕ್ಷಣದ ಬೆಂಬಲಕ್ಕಾಗಿ 350 ಮಿಲಿಯನ್ ಅಮೆರಿಕನ್ ಡಾಲರ್ ಮೌಲ್ಯದ ನೆರವಿಗೆ ಅನುಮತಿ ನೀಡಿದೆ. ಅಮೆರಿಕವು ಕಳೆದ ವರ್ಷ ಉಕ್ರೇನ್ಗೆ ಒಟ್ಟು 1 ಶತಕೋಟಿ ಅಮೆರಿಕನ್ ಡಾಲರ್ಗಿಂತ ಹೆಚ್ಚಿನ ಮೊತ್ತದ ನೆರವು ನೀಡುವ ಬದ್ಧತೆಯನ್ನು ವ್ಯಕ್ತಪಡಿಸಿತ್ತು. ಆ ನೆರವಿನ ಭಾಗವಾಗಿ ಈಗ ಈ ಮೊತ್ತಕ್ಕೆ ಮಂಜೂರಾತಿ ನೀಡಿದೆ. ಜಾವೆಲಿನ್ ಕ್ಷಿಪಣಿಗಳೂ ಅಮೆರಿಕವು ಬಿಡುಗಡೆ ಮಾಡಿದ ತುರ್ತು ಸಹಾಯದ ಭಾಗವೇ ಆಗಿದ್ದವು. ಇದು ದುಬಾರಿ ಉಪಕರಣವಾಗಿದ್ದು 80,000 ಅಮೆರಿನ್ ಡಾಲರ್ ಆಗಿದೆ.
ಭಾರತ ಯಾವ ಕ್ಷಿಪಣಿಯನ್ನು ನೆಚ್ಚಿಕೊಂಡಿದೆ?: 2019ರಲ್ಲಿ ಬಾಲಾಕೋಟ್ ವೈಮಾನಿಕ ದಾಳಿಯ ಬಳಿಕ ಭಾರತವು ಡಿಸೆಂಬರ್ 2020ರಲ್ಲಿ ಇಸ್ರೇಲ್‌ನಿಂದ ದೀರ್ಘ-ಶ್ರೇಣಿಯ, ನಾಲ್ಕನೇ ತಲೆಮಾರಿನ ಸ್ಪೈಕ್ ಎಟಿಜಿಎಂ (Spike ATGM) ಗಳನ್ನು ಖರೀದಿಸಿತು. ಭಾರತವು ಒಟ್ಟು 210 ಸ್ಪೈಕ್ ಕ್ಷಿಪಣಿಗಳನ್ನು ತನ್ನ ಬತ್ತಳಿಕೆಯಲ್ಲಿ ಹೊಂದಿದೆ ಎಂದು ಹೇಳಲಾಗಿದೆ. 'ಮೇಕ್ ಇನ್ ಇಂಡಿಯಾ' ಪರಿಕಲ್ಪನೆಗೆ ಅನುಗುಣವಾಗಿ ತಂತ್ರಜ್ಞಾನವನ್ನು ವರ್ಗಾಯಿಸಲು ಮತ್ತು ಅವುಗಳನ್ನು ಭಾರತದಲ್ಲಿ ತಯಾರಿಸಲು ಇಸ್ರೇಲ್ ಒಪ್ಪಿಕೊಂಡಿದ್ದರಿಂದ ನರೇಂದ್ರ ಮೋದಿ ನೇತೃತ್ವದ ಸರ್ಕಾರವು ಜಾವೆಲಿನ್‌ಗೆ ಬದಲಾಗಿ ಸ್ಪೈಕ್ ಕ್ಷಿಪಣಿ ಖರೀದಿಗೆ ಮುಂದಾಯಿತು. ಈ ಯೋಜನೆಯ ಅಂದಾಜು ವೆಚ್ಚ 280 ಕೋಟಿ ರೂ. ಆಗಿದೆ.
(Disclaimer: ಈ ಲೇಖನದಲ್ಲಿ ವ್ಯಕ್ತಪಡಿಸಿರುವ ಅಭಿಪ್ರಾಯಗಳು ಲೇಖಕರದ್ದಾಗಿದೆ.)
