ಚೆನ್ನೈ(ತಮಿಳುನಾಡು): ಆನ್ಲೈನ್ ಜೂಜಿನ ಗೀಳಿಗೆ ಬಿದ್ದು ಜನರು ಪ್ರಾಣ, ಆಸ್ತಿ-ಪಾಸ್ತಿ ಕಳೆದುಕೊಳ್ಳುವುದನ್ನು ತಡೆಯುವ ಸಲುವಾಗಿ ತಮಿಳುನಾಡು ಸರ್ಕಾರ 2020 ನವೆಂಬರ್ 21ರಲ್ಲಿ ರಮ್ಮಿ ಮತ್ತು ಬ್ರೋಕರ್ನಂತಹ ಆನ್ಲೈನ್ ಗೇಮ್ಗಳನ್ನು ಬ್ಯಾನ್ ಮಾಡಿ ಕಾನೂನು ಹೊರಡಿಸಿತ್ತು. ಇದೀಗ ಆ ಕಾನೂನನ್ನು ಹಿಂಪಡೆದಿದೆ.
ಎಐಎಡಿಎಂಕೆ ಅವಧಿಯಲ್ಲಿ ಈ ರೀತಿಯ ಗೇಮ್ಗಳನ್ನು ಬ್ಯಾನ್ ಮಾಡಿದ್ದನ್ನು ವಿರೋಧಿಸಿ ಜಂಗಲ್ ಗೇಮ್ಸ್, ಪ್ಲೇ ಗೇಮ್ಸ್ ಮತ್ತು ರೀಡ್ ಡಿಜಿಟಲ್ ಆನ್ಲೈನ್ ಗೇಮಿಂಗ್ ಕಂಪನಿಗಳು ಮದ್ರಾಸ್ ಹೈಕೋರ್ಟ್ ಮೆಟ್ಟಿಲೇರಿದ್ದವು. ಆನ್ಲೈನ್ ಗೇಮ್ಗಳನ್ನು ಬ್ಯಾನ್ ಮಾಡುವ ಕಾನೂನನ್ನು ಹಿಂಪಡೆಯಬೇಕೆಂದು ಅರ್ಜಿಯಲ್ಲಿ ಒತ್ತಾಯಿಸಿದ್ದವು.
ಈ ಅರ್ಜಿಯ ವಿಚಾರಣೆ ನಡೆಸಿದ ಮದ್ರಾಸ್ ಹೈಕೋರ್ಟ್ ಮುಖ್ಯನ್ಯಾಯಮೂರ್ತಿ ಸಂಜೀಬ್ ಬ್ಯಾನರ್ಜಿ ಮತ್ತು ನ್ಯಾ.ಸೆಂಥಿಲ್ ಕುಮಾರ್ ರಾಮಮೂರ್ತಿ ಅವರಿದ್ದ ದ್ವಿಸದಸ್ಯ ಪೀಠ ನಿಷೇಧವನ್ನು ಹಿಂಪಡೆದಿದೆ.
ಗೇಮಿಂಗ್ ಕಂಪನಿಗಳ ಜಲ್ಲಿಕಟ್ಟು ವಾದ
ಆನ್ಲೈನ್ ಜೂಜು ಗೇಮ್ಗಳನ್ನು ಬ್ಯಾನ್ ಮಾಡಿದ್ದನ್ನು ಸಮರ್ಥನೆ ಮಾಡಿಕೊಂಡಿದ್ದ ತಮಿಳುನಾಡು ಸರ್ಕಾರ, ಈ ಗೇಮ್ಗಳಿಂದಾಗಿ ಸಾಕಷ್ಟು ಮಂದಿ ಆಸ್ತಿ ಪಾಸ್ತಿ ಕಳೆದುಕೊಳ್ಳುವುದು ಮಾತ್ರವಲ್ಲದೇ, ಹಲವರು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ ಎಂದು ನ್ಯಾಯಾಲಯದಲ್ಲಿ ವಾದಿಸಿತ್ತು.
ಇದಕ್ಕೆ ಪ್ರತಿಯಾಗಿ ವಾದಿಸಿದ್ದ ಆನ್ಲೈನ್ ಕಂಪನಿಗಳು ಜಲ್ಲಿಕಟ್ಟು ಕೂಡಾ ಒಂದು ಆಟವಾಗಿದ್ದು, ಪ್ರತೀವರ್ಷ ಸುಮಾರು 20ಕ್ಕೂ ಹೆಚ್ಚು ಮಂದಿ ಸಾವನ್ನಪ್ಪುತ್ತಾರೆ. ಆನ್ಲೈನ್ ಗೇಮ್ಗಳು ಪ್ರತಿಭೆಯನ್ನು ಆಧರಿಸಿರುತ್ತವೆ. ಜಲ್ಲಿಕಟ್ಟು ಸ್ಪರ್ಧೆಯಲ್ಲಿ ಇಷ್ಟು ಮಂದಿ ಸತ್ತರೂ, ಈ ಸ್ಪರ್ಧೆ ಮುಂದುವರೆದಿದೆ ಎಂದು ವಾದಿಸಿದ್ದವು. ಜೊತೆಗೆ ಈ ಗೇಮ್ಗಳು ಜೂಜು ಅಲ್ಲ ಹೇಳಿದ್ದವು.
ಈ ವಾದ- ಪ್ರತಿವಾದವನ್ನು ಆಲಿಸಿದ ಮದ್ರಾಸ್ ಹೈಕೋರ್ಟ್ ಆನ್ಲೈನ್ ಗೇಮಿಂಗ್ಗಳ ನಿಷೇಧಕ್ಕೆ ಸರ್ಕಾರ ಸರಿಯಾದ ಕಾರಣ ನೀಡುತ್ತಿಲ್ಲ ಎಂದು ಅಭಿಪ್ರಾಯ ವ್ಯಕ್ತಪಡಿಸಿ, ಆನ್ಲೈನ್ ಗೇಮ್ಗಳ ಮೇಲೆ ಹೇರಲಾಗಿದ್ದ ನಿಷೇಧವನ್ನು ಹಿಂಪಡೆಯಿತು.
ಇದನ್ನೂ ಓದಿ: ಇಂದು ಬೆಳಗ್ಗೆ ಶುಭ ಸುದ್ದಿ, ಮಧ್ಯಾಹ್ನ ಅಥವಾ ಸಂಜೆ ನೂತನ ಸಚಿವರ ಪ್ರಮಾಣವಚನ: ಸಿಎಂ
