ನೋಯ್ಡಾ(ಉತ್ತರ ಪ್ರದೇಶ): ಬರೋಬ್ಬರಿ 70 ಕೋಟಿ ರೂಪಾಯಿ ವೆಚ್ಚದಲ್ಲಿ ನಿರ್ಮಾಣಗೊಂಡಿರುವ ನೋಯ್ಡಾದ ಅವಳಿ ಗೋಪುರ ಇಂದು ಧರೆಗೆ ಉರುಳಲಿವೆ. ಅದಕ್ಕಾಗಿ ಜಿಲ್ಲಾಡಳಿತ ಎಲ್ಲ ರೀತಿಯಲ್ಲೂ ಸನ್ನದ್ಧವಾಗಿದ್ದು, ಕಾರ್ಯಾಚರಣೆಗೋಸ್ಕರ 3,700 ಕೆಜಿ ಸ್ಫೋಟಕ ಬಳಕೆ ಮಾಡಿಕೊಳ್ಳುತ್ತಿದೆ. ಬೆಳಗ್ಗೆ 6 ಗಂಟೆಯಿಂದಲೇ ಅವಳಿ ಕಟ್ಟಡ ಉರುಳಿಸುವ ಕಾರ್ಯಾಚರಣೆ ಆರಂಭಗೊಳ್ಳಲಿದೆ.
12 ಸೆಕೆಂಡ್ಗಳಲ್ಲಿ ಸ್ಫೋಟ: ಮಧ್ಯಾಹ್ನ 2:30ಕ್ಕೆ ಕೇವಲ 12 ಸೆಂಕೆಡ್ಗಳಲ್ಲಿ ಅವಳಿ ಗೋಪುರ ಸ್ಫೋಟಗೊಂಡು ಧರೆಗೆ ಉರುಳಲಿದ್ದು, ಈ ವೇಳೆ ಎನ್ಡಿಆರ್ಎಫ್, ಸಿಬಿಆರ್ಐ ಸೇರಿದಂತೆ ಇತರೆ ಅಧಿಕಾರಿಗಳ ಉಪಸ್ಥಿತಿ ಇರಲಿದೆ. ಇದಕ್ಕೋಸ್ಕರ 20 ಕೋಟಿ ರೂಪಾಯಿ ವೆಚ್ಚ ಮಾಡಲಾಗ್ತಿದೆ.
ಸಂಪೂರ್ಣ ಸೇವೆ ಬಂದ್: ಈ ಗೋಪುರಗಳ ಸುತ್ತಮುತ್ತ ಸುಮಾರು 7 ಸಾವಿರ ಜನರು ವಾಸವಾಗಿದ್ದು, ಬೆಳಗ್ಗೆ 7 ಗಂಟೆಯಿಂದ ಎಲ್ಲರನ್ನೂ ಜಾಗ ಖಾಲಿ ಮಾಡಿಸಲಿದ್ದಾರೆ. ಇದಾದ ಬಳಿಕ ಈ ಪ್ರದೇಶದಲ್ಲಿ ವಿದ್ಯುತ್, ಅನಿಲ್ ಸೇರಿದಂತೆ ಎಲ್ಲ ಸೇವೆಗಳು ಬಂದ್ ಆಗಲಿವೆ. ಕಟ್ಟಡ ಸ್ಫೋಟಗೊಂಡ ನಂತರ ಸಂಜೆ 5 ಗಂಟೆಗೆ ಎಲ್ಲ ಸೇವೆ ಪುನಾರಂಭಗೊಳ್ಳಲಿವೆ. ನಂತರ ಎಲ್ಲ ನಿವಾಸಿಗಳು ತಮ್ಮ ಮನೆಗಳಿಗೆ ತೆರಳಬಹುದಾಗಿದೆ.
ಇದನ್ನೂ ಓದಿ: ನೋಯ್ಡಾ ಅವಳಿ ಕಟ್ಟಡ ಕೆಡವಲು ಮುಹೂರ್ತ ಫಿಕ್ಸ್.. 3700 ಕೆಜಿ ಸ್ಫೋಟಕ ಸಜ್ಜು
915 ಫ್ಲ್ಯಾಟ್ಗಳು, 20 ಕಮರ್ಷಿಯಲ್ ಅಂಗಡಿ: ಇನ್ನೂ ಬಿಲ್ಡಿಂಗ್ ಸ್ಫೋಟಗೊಳ್ಳುತ್ತಿದ್ದಂತೆ ಸುತ್ತಮುತ್ತಲಿನ ಸುಮಾರು 30 ಮೀಟರ್ ವ್ಯಾಪ್ತಿಯಲ್ಲಿ ಕಂಪನದ ಅನುಭವವಾಗಲಿದೆ. ಜೊತೆಗೆ ಈ ಪ್ರದೇಶದಲ್ಲಿ ದೊಡ್ಡ ಮಟ್ಟದ ಧೂಳು ತುಂಬಿಕೊಳ್ಳಲಿದೆ. ಸೂಪರ್ ಟೆಕ್ ಕಂಪನಿ ಈ ಅವಳಿ ಗೋಪುರ ನಿರ್ಮಾಣ ಮಾಡಲು ಬರೋಬ್ಬರಿ 70 ಕೋಟಿ ರೂಪಾಯಿ ಖರ್ಚು ಮಾಡಿದ್ದು, ಇದರಲ್ಲಿ ಒಟ್ಟು 915 ಫ್ಲ್ಯಾಟ್ಗಳು, 20 ಕಮರ್ಷಿಯಲ್ ಅಂಗಡಿಗಳಿವೆ. ಈ ಕಟ್ಟಡ ಧ್ವಂಸದಿಂದಾಗಿ ಸುಮಾರು ಸಾವಿರ ಕೋಟಿ ರೂಪಾಯಿ ನಷ್ಟವಾಗಲಿದೆ ಎಂದು ಹೇಳಲಾಗ್ತಿದೆ.
ಕಾನೂನು ಬಾಹಿರವಾಗಿ ನಿರ್ಮಾಣ: ಉತ್ತರ ಪ್ರದೇಶದ ನೋಯ್ಡಾದಲ್ಲಿ ಸೂಪರ್ ಟೆಕ್ ಅಪೆಕ್ಸ್ ಮತ್ತು ಸಿಯಾನಿ ಎಂಬ ಎರಡು ಅವಳಿ ಗೋಪುರ 2004ರಲ್ಲಿ ನಿರ್ಮಾಣ ಮಾಡಲಾಗಿದ್ದು, ಒಂದು ಕಟ್ಟಡ 103 ಮೀಟರ್ ಹಾಗೂ ಇನ್ನೊಂದು 97 ಮೀಟರ್ ಎತ್ತರವಿದೆ. ಅಕ್ರಮವಾಗಿ ಈ ಕಟ್ಟಡವನ್ನು ನಿಯಮ ಬಾಹಿರವಾಗಿ ನಿರ್ಮಾಣ ಮಾಡಿರುವ ಕಾರಣ ಸುಪ್ರೀಂಕೋರ್ಟ್ 2021ರಲ್ಲಿ ಕಟ್ಟಡ ಧ್ವಂಸಗೊಳಿಸಲು ಆದೇಶ ನೀಡಿತ್ತು. ಸೂಪರ್ ಟೆಕ್ ಎಮರಾಲ್ಡ್ ಸಂಸ್ಥೆ ನಿಯಮಾವಳಿ ಉಲ್ಲಂಘಿಸಿ ನಿರ್ಮಿಸಿದ್ದರ ವಿರುದ್ಧ ಸುಪ್ರೀಂ ಕೋರ್ಟ್‌ನಲ್ಲಿ ಅರ್ಜಿ ಸಲ್ಲಿಸಲಾಗಿತ್ತು. ಈ ಕುರಿತು ವಿಚಾರಣೆ ನಡೆಸಿದ ಸುಪ್ರೀಂ ಕೋರ್ಟ್, ನಿಬಂಧನೆಗಳಿಗೆ ವಿರುದ್ಧವಾಗಿ ನಿರ್ಮಿಸುತ್ತಿದ್ದ ಅವಳಿ ಗೋಪುರಗಳನ್ನು ಕೆಡವಲು ಆಗಸ್ಟ್ 31, 2021ರಂದು ಆದೇಶಿಸಿತ್ತು. ಹೀಗಾಗಿ, ಕಳೆದ 10 ದಿನಗಳಿಂದ ಎರಡು ಬಿಲ್ಡಿಂಗ್ನಲ್ಲಿ ಸ್ಫೋಟಕ ತುಂಬಲಾಗಿದೆ.
ಅವಳಿ ಕಟ್ಟಡ ಬ್ಲಾಸ್ಟ್ ಮಾಡಲಿರುವ ಚೇತನ್ ದತ್ತಾ: ಎಡಿಫೈಸ್ ಇಂಜಿನಿಯರಿಂಗ್ ಮಾಡಿರುವ ಚೇತನ್ ದತ್ತಾ ಬ್ಲಾಸ್ಟರ್ ಆಗಿ ಕಾರ್ಯನಿರ್ವಹಿಸುತ್ತಿದ್ದು, ಅವರು ಬಟನ್ ಒತ್ತುವ ಮೂಲಕ ಬಿಲ್ಡಿಂಗ್ ಧ್ವಂಸ ಮಾಡಲಿದ್ದಾರೆ. ಬಿಲ್ಡಿಂಗ್ ನೆಲಸಮಗೊಂಡ ನಂತರ ಈ ಪ್ರದೇಶದಲ್ಲಿ ಪರಿಶೀಲನೆ ಕಾರ್ಯ ಸಹ ನಡೆಯಲಿದೆ.
