ಕಟಿಹಾರ/ ಬಕ್ಸಾರ (ಬಿಹಾರ): ಕೊರೊನಾ ವೈರಸ್ ಮಹಾಮಾರಿಯ ಅಬ್ಬರದ ನಡುವೆ ಮನಕಲಕುವ ಘಟನೆಯ ವಿಡಿಯೋವೊಂದು ಸೋಶಿಯಲ್ ಮೀಡಿಯಾಗಳಲ್ಲಿ ವೈರಲ್ ಆಗಿದೆ. ಪಿಪಿಇ ಡ್ರೆಸ್ ಧರಿಸಿದ ಕೆಲವರು ಮೃತ ದೇಹಗಳನ್ನು ಆ್ಯಂಬುಲೆನ್ಸ್ನಿಂದ ಸ್ಮಶಾನ ಭೂಮಿಗೆ ದರದರನೆ ಎಳೆದೊಯ್ಯುವ ದೃಶ್ಯಗಳು ಎಲ್ಲೆಡೆ ಸಂತಾಪ ಹಾಗೂ ಆಕ್ರೋಶದ ಅಲೆ ಉಕ್ಕಿಸಿವೆ.
ಕೋವಿಡ್ನಿಂದ ಸತ್ತವರ ಶವಗಳಿಗೆ ಯಾವುದೇ ಮರ್ಯಾದೆ ನೀಡದೆ ಬೇಕಾಬಿಟ್ಟಿಯಾಗಿ ನಡೆದುಕೊಳ್ಳಲಾಗುತ್ತಿದೆ ಎಂಬ ಆರೋಪಗಳು ಬಿಹಾರ ಸರ್ಕಾರದ ವಿರುದ್ಧ ಕೇಳಿ ಬಂದ ಮಧ್ಯೆಯೇ ಇಂಥದೊಂದು ಘಟನೆಯ ದೃಶ್ಯಾವಳಿಗಳು ಬಹಿರಂಗವಾಗಿದ್ದು, ಆರೋಪಗಳಿಗೆ ಪುಷ್ಟಿ ನೀಡುವಂತಿದೆ. ಅಷ್ಟಕ್ಕೂ ಈ ಘಟನೆ ನಡೆದಿದ್ದು ಬಿಹಾರ ಉಪಮುಖ್ಯಮಂತ್ರಿಯ ಸ್ವಕ್ಷೇತ್ರವಾದ ಕಟಿಹಾರ್ನಲ್ಲಿ ಎಂಬುದು ಮತ್ತೂ ಆತಂಕಕಾರಿಯಾಗಿದೆ.
ಕೋವಿಡ್ನಿಂದ ಮೃತಪಟ್ಟವರ ಗೌರವಯುತ ಅಂತ್ಯ ಸಂಸ್ಕಾರಕ್ಕಾಗಿ ಕಟಿಹಾರ್ - ಪೂರ್ಣಿಯಾ ರಸ್ತೆಯ ಭಾಸನಾ ಸೇತುವೆ ಕೆಳಗೆ ವ್ಯವಸ್ಥೆಗಳನ್ನು ಮಾಡಲಾಗಿದೆ ಎಂದು ಜಿಲ್ಲಾಡಳಿತ ಹೇಳಿಕೊಂಡಿತ್ತು. ಆದರೆ ಹೀಗೆ ಶವಗಳನ್ನು ಎಳೆದೊಯ್ಯುವ ದೃಶ್ಯಾವಳಿಗಳು ಜಿಲ್ಲಾಡಳಿತದ ಭರವಸೆ ಹುಸಿಯಾಗಿದೆ ಎಂಬುದನ್ನು ಎತ್ತಿ ತೋರಿಸುತ್ತಿವೆ.
ಆರೋಗ್ಯ ಇಲಾಖೆಯ ಮೂವರು ಸಿಬ್ಬಂದಿ, ಶವಗಳನ್ನು ಸ್ಟ್ರೆಚರ್ ಮೇಲೆ ಹಾಕಿ ಸಾಗಿಸುವ ಬದಲು ದರದರನೆ ಎಳೆದಾಡುತ್ತಿರುವುದು ವಿಡಿಯೋದಲ್ಲಿ ಸೆರೆಯಾಗಿದೆ. ಇನ್ನು ಈ ಮೂವರಲ್ಲಿ ಇಬ್ಬರು ಪಿಪಿಇ ಕಿಟ್ ಧರಿಸಿದ್ದರೆ, ಇನ್ನೊಬ್ಬ ಯಾವುದೇ ಸುರಕ್ಷತಾ ಕವಚ ಧರಿಸಿರಲಿಲ್ಲ.
ವಿಡಿಯೋದಲ್ಲಿನ ದೃಶ್ಯಾವಳಿ ಸತ್ಯ ಎಂದ ಜಿಲ್ಲಾ ಮ್ಯಾಜಿಸ್ಟ್ರೇಟ್
ಕೋವಿಡ್ನಿಂದ ಮೃತರ ದೇಹಗಳನ್ನು ಎಳೆದೊಯ್ಯುತ್ತಿರುವ ದೃಶ್ಯಾವಳಿಗಳ ಘಟನೆ ನಡೆದಿರುವ ಬಗ್ಗೆ ಜಿಲ್ಲಾ ಮ್ಯಾಜಿಸ್ಟ್ರೇಟ್ ಉದಯನ್ ಮಿಶ್ರಾ ಒಪ್ಪಿಕೊಂಡಿದ್ದು, ಈ ಘಟನೆ ಕಟಿಹಾರ್ನಲ್ಲಿಯೇ ನಡೆದಿರುವುದಾಗಿ ದೃಢಪಡಿಸಿದ್ದಾರೆ. ಅಂತ್ಯ ಸಂಸ್ಕಾರದ ಸ್ಥಳ ತಲುಪುವ ಮುನ್ನವೇ ಆ್ಯಂಬುಲೆನ್ಸ್ ದುರಸ್ತಿಗೆ ಬಂದು ನಿಂತುಹೋಗಿತ್ತು ಹಾಗೂ ಅದರಲ್ಲಿರುವ ಸ್ಟ್ರೆಚರ್ ಕೆಲಸಕ್ಕೆ ಬಾರದಂತಾಗಿತ್ತು ಎಂದು ಮ್ಯಾಜಿಸ್ಟ್ರೇಟ್ ಹೇಳಿದ್ದಾರೆ.
