ಲಖನೌ : ಉತ್ತರಪ್ರದೇಶದಲ್ಲಿ ಐಇಡಿ ಸ್ಫೋಟ ಘಟನೆಗೆ ಸಂಬಂಧಿಸಿದಂತೆ ಹಾಗೂ ಶಸ್ತ್ರಾಸ್ತ್ರಗಳನ್ನು ಸಂಗ್ರಹಣೆ ಮತ್ತು ಸಂಚು ರೂಪಿಸಿದ್ದಕ್ಕಾಗಿ ರಾಷ್ಟ್ರೀಯ ತನಿಖಾ ಸಂಸ್ಥೆಯು ಐವರು ಅನ್ಸಾರ್ ಘಜ್ವತ್-ಉಲ್-ಹಿಂದ್ ಸದಸ್ಯರಾದ ಮುಸೀರುದ್ದೀನ್, ಮಿನ್ಹಾಜ್ ಅಹ್ಮದ್, ಶಕೀಲ್, ಮುಸ್ತಕೀಮ್ ಮತ್ತು ಮೊಹಮ್ಮದ್ ಮೊಯಿದ್ ವಿರುದ್ಧ ನ್ಯಾಯಾಲಯಕ್ಕೆ ಚಾರ್ಜ್‌ಶೀಟ್ ಸಲ್ಲಿಸಿದೆ.
ಭಯೋತ್ಪಾದಕರು ಅಲ್ ಖೈದಾ ಕಾರ್ಯಕರ್ತರೊಂದಿಗೂ ಸಂಪರ್ಕ ಹೊಂದಿದ್ದರು ಎಂದು ಈ ಮೂಲಕ ತಿಳಿದು ಬಂದಿದೆ. ಯುಪಿಯ ಭಯೋತ್ಪಾದನಾ ನಿಗ್ರಹ ದಳವು ಜುಲೈ 11ರಂದು ಗೋಮತಿನಗರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಿಸಿತ್ತು. ಪ್ರಾಥಮಿಕ ತನಿಖೆಯ ನಂತರ ಈ ತನಖೆಯನ್ನು ರಾಷ್ಟ್ರೀಯ ತನಿಖಾ ಸಂಸ್ಥೆಗೆ (NIA) ಹಸ್ತಾಂತರಿಸಲಾಯಿತು.
ಅದರಂತೆ ಜುಲೈ 29, 2021ರಂದು ಎನ್ಐಎ ಎರಡನೇ ಪ್ರಕರಣವನ್ನು ದಾಖಲಿಸಿ, ಈ ವಿಷಯದ ಬಗ್ಗೆ ಹೆಚ್ಚನ ತನಿಖೆ ಪ್ರಾರಂಭಿಸಿತು. ಆರೋಪಿ ಮಿನ್ಹಾಜ್ ಅಹ್ಮದ್‌ನನ್ನು ಜಮ್ಮು ಮತ್ತು ಕಾಶ್ಮೀರ ಮೂಲದ ಇಬ್ಬರು ಅಲ್‌ಖೈದಾ ಭಯೋತ್ಪಾದಕರು ಆನ್‌ಲೈನ್‌ನಲ್ಲಿಯೇ ತೀವ್ರಗಾಮಿಯನ್ನಾಗಿ ಮಾಡಿದ್ದಾರೆ ಎಂದು ಎನ್ಐಎ ತನ್ನ ತನಿಖಾ ಸಂಶೋಧನೆಗಳಲ್ಲಿ ಉಲ್ಲೇಖಿಸಿದೆ.
ಇದನ್ನೂ ಓದಿ: ಉಗ್ರರು ಅಡಗಿಸಿಟ್ಟಿದ್ದ ಐಇಡಿ ಬಾಂಬ್ ನಿಷ್ಕ್ರಿಯಗೊಳಿಸಿದ ಭದ್ರತಾ ಪಡೆ
ಅನ್ಸರ್ ಘಜ್ವತ್ ಉಲ್ ಹಿಂದ್‌ಗೆ ಮತ್ತಷ್ಟು ಸದಸ್ಯರನ್ನು ಸೇರಿಸಿಕೊಳ್ಳಲು ಮತ್ತು ಭಯೋತ್ಪಾದಕ ಚಟುವಟಿಕೆಗಳನ್ನು ನಡೆಸಲು ಮಿನ್ಹಾಜ್ ಅಹ್ಮದ್ ಅವರೊಂದಿಗೆ (ಅಲ್ ಖೈದಾ ಭಯೋತ್ಪಾದಕರು) ಸಂಚು ರೂಪಿಸಿದ್ದರು ಎಂದು ಈ ಮೂಲಕ ತಿಳಿದು ಬಂದಿದೆ.
ಮುಸೀರುದ್ದೀನ್ ಮತ್ತು ಮಿನ್ಹಾಜ್ ಅಹ್ಮದ್ ಅವರು ಶಸ್ತ್ರಾಸ್ತ್ರಗಳು, ಮದ್ದುಗುಂಡುಗಳು, ಸ್ಫೋಟಕಗಳನ್ನು ಸಂಗ್ರಹಿಸಿದ್ದರು. ಹಾಗೆ ಸ್ಫೋಟ ಮಾಡಲು ಸೂಕ್ಷ್ಮ ಪ್ರದೇಶಗಳಲ್ಲಿ ಪರಿಶೀಲನೆ ಕೂಡ ನಡೆಸಿದ್ದರು ಎಂದು ತಿಳಿದು ಬಂದಿದೆ. ಅದರಲ್ಲೂ ಪ್ರಮುಖವಾಗಿ ಭಾರತ ಸರ್ಕಾರದ ವಿರುದ್ಧ ಯುದ್ಧ ಮಾಡುವುದು ಅವರ ಉದ್ದೇಶವಾಗಿತ್ತಂತೆ.
ಇತರ ಮೂವರು ಆರೋಪಿಗಳಾದ ಶಕೀಲ್, ಮೊಹಮ್ಮದ್ ಮುಸ್ತಕೀಮ್ ಮತ್ತು ಮೊಹಮ್ಮದ್ ಮೊಯ್ದ್ ಅವರು ಮಿನ್ಹಾಜ್ ಮತ್ತು ಮುಸೀರುದ್ದೀನ್‌ಗೆ ಶಸ್ತ್ರಾಸ್ತ್ರ ಮತ್ತು ಮದ್ದುಗುಂಡುಗಳನ್ನು ಸಂಗ್ರಹಿಸಲು ಸಹಾಯ ಮಾಡಿದ್ದರು. ಈ ಮೂಲಕ ಇವರೂ ಸಹ ಪಿತೂರಿಯ ಭಾಗವಾಗಿದ್ದಾರೆ ಎಂದು ಎನ್ಐಎ ಹೇಳಿದೆ.
