ಹೂಸ್ಟನ್: ಅದು ಪ್ರಸ್ತುತ ಕಂಡುಬರುತ್ತಿರುವ ಕೋವಿಡ್-19 ಸೋಂಕಿನ ಎಲ್ಲ ರೂಪಾಂತರಗಳನ್ನು ಕೆಲವೇ ಗಂಟೆಗಳಲ್ಲಿ ನಿಖರವಾಗಿ ಪತ್ತೆ ಮಾಡಬಲ್ಲ ಕ್ಷಿಪ್ರ ಕೋವಿಡ್-19 ಟೆಸ್ಟ್ ವಿಧಾನವೊಂದನ್ನು ಅಮೆರಿಕದ ವಿಜ್ಞಾನಿಗಳು ಅಭಿವೃದ್ಧಿಪಡಿಸಿದ್ದಾರೆ. ಕೋವ್ಯಾರ್ಸ್ಕ್ಯಾನ್ (CoVarScan) ಎಂದು ಹೆಸರಿಸಲಾಗಿರುವ ಈ ಟೆಸ್ಟ್, ಕೋವಿಡ್-19 ವೈರಸ್ ಮೇಲೆ ಕಾಣಸಿಗುವ ಕೋವಿಡ್ಗೆ ಕಾರಣವಾಗುವ ಎಂಟು ಹಾಟ್ಸ್ಪಾಟ್ ಸಿಗ್ನೇಚರ್ಗಳನ್ನು ಪತ್ತೆ ಮಾಡಬಲ್ಲದು ಎಂದು ಅಮೆರಿಕದ ಯುನಿವರ್ಸಿಟಿ ಆಫ್ ಟೆಕ್ಸಾಸ್ ಸೌತ್ ವೆಸ್ಟರ್ನ್ ಮೆಡಿಕಲ್ ಸೆಂಟರ್ನ ಸಂಶೋಧಕರು ತಿಳಿಸಿದ್ದಾರೆ.
ಕ್ಲಿನಿಕಲ್ ಕೆಮಿಸ್ಟ್ರಿ ಎಂಬ ಜರ್ನಲ್ನಲ್ಲಿ ಸಂಶೋಧನಾ ಪ್ರಬಂಧ ಪ್ರಕಟವಾಗಿದ್ದು, ಕ್ಷಿಪ್ರ ಟೆಸ್ಟ್ ವಿಧಾನವು ಇತರ ಎಲ್ಲ ಟೆಸ್ಟ್ ವಿಧಾನಗಳಂತೆ ನಿಖರವಾಗಿದ್ದು, ಪ್ರಸ್ತುತ ಕಾಣಿಸಿಕೊಳ್ಳುತ್ತಿರುವ ಎಲ್ಲ ಬಗೆಯ ಕೋವಿಡ್-19 ವೈರಸ್ಗಳನ್ನು ಪತ್ತೆ ಮಾಡಬಲ್ಲದು ಎಂದು ತಿಳಿಸಲಾಗಿದೆ.
"ಸದ್ಯ ಸಮುದಾಯದಲ್ಲಿ ಎಷ್ಟು ಕೋವಿಡ್ ವೇರಿಯಂಟ್ಗಳು ಇವೆ ಎಂಬುದನ್ನು ಮತ್ತು ಹೊಸ ವೇರಿಯಂಟ್ ಏನಾದರೂ ಬಂದಿದೆಯಾ ಎಂಬುದನ್ನು ಅತಿ ಶೀಘ್ರವಾಗಿ ಈ ಟೆಸ್ಟ್ ಪತ್ತೆ ಮಾಡುತ್ತದೆ." ಎಂದು ಯುನಿವರ್ಸಿಟಿ ಆಫ್ ಟೆಕ್ಸಾಸ್ನ ಸಹಾಯಕ ಪ್ರಾಧ್ಯಾಪಕ ಜೆಫ್ರಿ ರೊಸೆಲ್ಲೆ ಹೇಳಿದ್ದಾರೆ.
ಕ್ಷಿಪ್ರ ಕೋವಿಡ್-19 ಟೆಸ್ಟ್ ವಿಧಾನವು ಕೆಲ ರೂಪಾಂತರಗಳನ್ನು ನಿಖರವಾಗಿ ಪತ್ತೆಹಚ್ಚಲಾರದು ಅಥವಾ ಭವಿಷ್ಯದಲ್ಲಿ ಕಾಣಿಸಿಕೊಳ್ಳಬಹುದಾದ ತಳಿಗಳನ್ನು ಕಂಡುಹಿಡಿಯದೇ ಇರಬಹುದು ಎಂದು ಅನೇಕ ಸಂಶೋಧಕರು ಸಂಶಯ ವ್ಯಕ್ತಪಡಿಸಿದ್ದಾರೆ. ರೋಗಿಯು ಕೋವಿಡ್-19ನ ಯಾವ ರೂಪಾಂತರ ಹೊಂದಿದ್ದಾನೆ ಎಂಬುದನ್ನು ನಿರ್ಧರಿಸಲು, ವಿಜ್ಞಾನಿಗಳು ಸಾಮಾನ್ಯವಾಗಿ ಸಂಪೂರ್ಣ ಜಿನೋಮ್ ಅನುಕ್ರಮವನ್ನು ಬಳಸಬೇಕು. ಜಿನೋಮ್ ಸಿಕ್ವೆನ್ಸಿಂಗ್ ಸಮಯ ತೆಗೆದುಕೊಳ್ಳುವ ಮತ್ತು ದುಬಾರಿ ಪರೀಕ್ಷಣೆಯಾಗಿದೆ ಎಂದು ವಿಜ್ಞಾನಿಗಳು ಹೇಳಿದ್ದಾರೆ.
