ನವದೆಹಲಿ: ಬಿಹಾರ, ಉತ್ತರ ಪ್ರದೇಶ, ಮಹಾರಾಷ್ಟ್ರ ಮತ್ತು ಪಂಜಾಬ್ ಸೇರಿದಂತೆ ಭಾರತದ ಒಂಬತ್ತು ರಾಜ್ಯಗಳು ತಮ್ಮಲ್ಲಿನ ಮಾನವ ನಿರ್ಮಿತ ಪರಿಸರಕ್ಕೆ ಹವಾಮಾನ ಬದಲಾವಣೆಯ ಕಾರಣಗಳಿಂದ ಹಾನಿ ಸಂಭವಿಸುವ ಸಾಧ್ಯತೆ ಇರುವ ವಿಶ್ವದ ಅಗ್ರ 50 ಪ್ರದೇಶಗಳಲ್ಲಿ ಸೇರಿವೆ ಎಂದು ಸೋಮವಾರ ಪ್ರಕಟವಾದ ಹೊಸ ವರದಿಯೊಂದು ತಿಳಿಸಿದೆ. ಈ ವರದಿ ನೀಡಿದ ಕ್ರಾಸ್ ಡಿಪೆಂಡೆನ್ಸಿ ಇನಿಶಿಯೇಟಿವ್ (XDI) ಹೆಸರಿನ ಸಂಸ್ಥೆಯು ಹವಾಮಾನ ಬದಲಾವಣೆಯ ವೆಚ್ಚಗಳನ್ನು ಪ್ರಮಾಣೀಕರಿಸಲು ಮತ್ತು ಸಂವಹನ ಮಾಡಲು ಬದ್ಧವಾಗಿರುವ ಕಂಪನಿಗಳ ಗುಂಪಿನ ಭಾಗವಾಗಿದೆ. 2050 ರಲ್ಲಿ ಪ್ರಪಂಚದಾದ್ಯಂತ 2,600 ಕ್ಕೂ ಹೆಚ್ಚು ರಾಜ್ಯಗಳು ಮತ್ತು ಪ್ರಾಂತ್ಯಗಳಲ್ಲಿ ನಿರ್ಮಿತ ಪರಿಸರಕ್ಕೆ ಭೌತಿಕ ಹವಾಮಾನದ ಅಪಾಯವನ್ನು ಈ ಸಂಸ್ಥೆಯು ಲೆಕ್ಕಾಚಾರ ಮಾಡಿದೆ.
ನಿರ್ಮಿತ ಪರಿಸರ ಎಂದರೆ ಮನೆಗಳು ಮತ್ತು ಕೆಲಸದ ಸ್ಥಳಗಳಂತಹ ಮಾನವ ಚಟುವಟಿಕೆಯನ್ನು ಬೆಂಬಲಿಸಲು ಮನುಷ್ಯ ತಾನೇ ನಿರ್ಮಿಸಿದ ನಮ್ಮ ಸುತ್ತಮುತ್ತಲಿನ ಘಟಕಗಳನ್ನು ಸೂಚಿಸುತ್ತದೆ. XDI ಗ್ರಾಸ್ ಡೊಮೆಸ್ಟಿಕ್ ಕ್ಲೈಮೇಟ್ ರಿಸ್ಕ್ ಡೇಟಾ ಸೆಟ್ ಈ ಪ್ರದೇಶಗಳನ್ನು ಹವಾಮಾನ ವೈಪರೀತ್ಯ ಮತ್ತು ಪ್ರವಾಹ, ಕಾಡಿನ ಬೆಂಕಿ, ಶಾಖದ ಅಲೆ ಮತ್ತು ಸಮುದ್ರ ಮಟ್ಟ ಏರಿಕೆಯಂತಹ ಹವಾಮಾನ ಬದಲಾವಣೆಯಿಂದ ಕಟ್ಟಡಗಳು ಮತ್ತು ಆಸ್ತಿಗಳಿಗೆ ಹಾನಿಯ ಮಾದರಿಯ ಪ್ರಕ್ಷೇಪಗಳ ಅನುಸಾರ ಹೋಲಿಸಿದೆ.
ಈ ವಲಯದಲ್ಲಿ 2050 ರಲ್ಲಿ ಅಗ್ರ 200 ರಲ್ಲಿ ಅರ್ಧಕ್ಕಿಂತ ಹೆಚ್ಚು (114) ಅಪಾಯದಲ್ಲಿರುವ ಪ್ರಾಂತ್ಯಗಳನ್ನು ಹೊಂದುವ ಮೂಲಕ ಪಟ್ಟಿಯಲ್ಲಿ ಏಷ್ಯಾ ಪ್ರಾಬಲ್ಯ ಹೊಂದಿದೆ. ಇದರಲ್ಲಿ ಚೀನಾ ಮತ್ತು ಭಾರತಗಳನ್ನು ವಿಶೇಷವಾಗಿ ಹೆಸರಿಸಲಾಗಿದೆ. ಹಾಗಂತ ಪಟ್ಟಿಯಲ್ಲಿಲ್ಲದ ಘಟಕಗಳು ಕಡಿಮೆ ಅಪಾಯವನ್ನು ಹೊಂದಿಲ್ಲ ಎಂದು XDI ಹೇಳಿದ್ದು, ಹವಾಮಾನ ವೈಪರೀತ್ಯದ ಅಪಾಯಗಳಿಂದ ಹೆಚ್ಚಿನ ಅಪಾಯವನ್ನು ಎದುರಿಸುತ್ತಿರುವ ಅನೇಕ ರಾಜ್ಯಗಳು ಮತ್ತು ಪ್ರಾಂತ್ಯಗಳು ತಮ್ಮ ಕಡಿಮೆ ಸಂಖ್ಯೆಯ ವಸತಿ, ವಾಣಿಜ್ಯ ಮತ್ತು ಕೈಗಾರಿಕಾ ಕಟ್ಟಡಗಳ ಕಾರಣದಿಂದಾಗಿ ಈ ಶ್ರೇಯಾಂಕದ ಅಗ್ರಸ್ಥಾನದಲ್ಲಿ ಕಾಣಿಸಿಕೊಂಡಿಲ್ಲ ಎಂದು ತಿಳಿಸಿದೆ.
ವಿಶ್ಲೇಷಣೆಯ ಪ್ರಕಾರ 2050 ರಲ್ಲಿ ಅಗ್ರ 50 ಅಪಾಯದಲ್ಲಿರುವ ರಾಜ್ಯಗಳು ಮತ್ತು ಪ್ರಾಂತ್ಯಗಳಲ್ಲಿ 80 ಪ್ರತಿಶತದಷ್ಟು ಭಾಗವು ಚೀನಾ, ಅಮೆರಿಕ ಮತ್ತು ಭಾರತದಲ್ಲಿರುತ್ತವೆ. ಚೀನಾದ ನಂತರ, ಭಾರತವು ಅಗ್ರ 50 ರಲ್ಲಿ ಅತಿ ಹೆಚ್ಚು ರಾಜ್ಯಗಳನ್ನು (9) ಹೊಂದಿದೆ. ಇದರಲ್ಲಿ ಬಿಹಾರ (22 ನೇ ಸ್ಥಾನ), ಉತ್ತರ ಪ್ರದೇಶ (25), ಅಸ್ಸಾಂ (28), ರಾಜಸ್ಥಾನ (32), ತಮಿಳುನಾಡು (36), ಮಹಾರಾಷ್ಟ್ರ ( 38), ಗುಜರಾತ್ (48), ಪಂಜಾಬ್ (50) ಮತ್ತು ಕೇರಳ (52) ಇವೆ. 1990 ಕ್ಕೆ ಹೋಲಿಸಿದರೆ, 2050 ರ ವೇಳೆಗೆ ಅಸ್ಸಾಂ ರಾಜ್ಯದ ನಿರ್ಮಿತ ಪರಿಸರಕ್ಕೆ ಹವಾಮಾನ ಅಪಾಯವು ಶೇ 330 ರಷ್ಟು ಗರಿಷ್ಠ ಹೆಚ್ಚಳವಾಗಲಿದೆ.
ಪಾಕಿಸ್ತಾನವು ತನ್ನ ಸಿಂಧ್ ಪ್ರಾಂತ್ಯ ಸೇರಿದಂತೆ ಟಾಪ್ 100 ರಲ್ಲಿ ಬಹು ಪ್ರಾಂತ್ಯಗಳನ್ನು ಹೊಂದಿದೆ. ಜೂನ್ ಮತ್ತು ಆಗಸ್ಟ್ 2022 ರ ನಡುವಿನ ವಿನಾಶಕಾರಿ ಪ್ರವಾಹವು ಪಾಕಿಸ್ತಾನದ ಶೇಕಡಾ 30 ರಷ್ಟು ಪ್ರದೇಶದ ಮೇಲೆ ಪರಿಣಾಮ ಬೀರಿತ್ತು ಮತ್ತು ಸಿಂಧ್ ಪ್ರಾಂತ್ಯದಲ್ಲಿ ಒಂಬತ್ತು ಲಕ್ಷಕ್ಕೂ ಹೆಚ್ಚು ಮನೆಗಳಿಗೆ ಭಾಗಶಃ ಅಥವಾ ಸಂಪೂರ್ಣವಾಗಿ ಹಾನಿಯಾಗಿದೆ. ಪ್ರಪಂಚದ ಪ್ರತಿಯೊಂದು ರಾಜ್ಯ, ಪ್ರಾಂತ್ಯ ಮತ್ತು ಪ್ರದೇಶವನ್ನು ಹೋಲಿಸಿ, ನಿರ್ಮಿತ ಪರಿಸರದ ಮೇಲೆ ಪ್ರತ್ಯೇಕವಾಗಿ ಕೇಂದ್ರೀಕರಿಸಿದ ಭೌತಿಕ ಹವಾಮಾನ ಅಪಾಯದ ವಿಶ್ಲೇಷಣೆ ಮಾಡಲಾಗಿರುವುದು ಇದೇ ಮೊದಲು.
ಇದನ್ನೂ ಓದಿ: ಕೋವಿಡ್ ಮಾನವ ನಿರ್ಮಿತ ವೈರಸ್: ಅಮೆರಿಕ ಮೂಲದ ವಿಜ್ಞಾನಿ ಹೇಳಿಕೆ
