ಲಖೀಂಪುರ ಖೇರಿ (ಉತ್ತರ ಪ್ರದೇಶ): 'ವರ್ಗಾವಣೆಗಾಗಿ ಒಂದು ಲಕ್ಷ ರೂ. ಲಂಚ ಮತ್ತು ಒಂದು ರಾತ್ರಿಗೆ ನಿನ್ನ ಪತ್ನಿಯನ್ನು ನನ್ನೊಂದಿಗೆ ಕಳುಹಿಸಬೇಕು..' ದುಷ್ಟ ಕಿರಿಯ ಇಂಜಿನಿಯರ್ (ಜೆಇ) ಒಬ್ಬನ ಈ ರೀತಿಯ ಕಿರುಕುಳದಿಂದಾಗಿ ತೀವ್ರವಾಗಿ ಮನನೊಂದ ಲೈನ್ಮ್ಯಾನ್ವೋರ್ವರು ಮೈಮೇಲೆ ಪೆಟ್ರೋಲ್ ಸುರಿದು ಬೆಂಕಿ ಹಚ್ಚಿಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ. ಈ ಘಟನೆ ಉತ್ತರ ಪ್ರದೇಶದ ಲಖೀಂಪುರ ಖೇರಿ ಜಿಲ್ಲೆಯಲ್ಲಿ ನಡೆದಿದೆ. ಶನಿವಾರ ರಾತ್ರಿ ಜೆಇ ಮನೆ ಮುಂದೆಯೇ ಅವರು ಬೆಂಕಿ ಹಚ್ಚಿಕೊಂಡಿದ್ದಾರೆ ಎಂದು ತಿಳಿದುಬಂದಿದೆ.
45 ವರ್ಷದ ಗೋಕುಲ್ ಪ್ರಸಾದ್ ಮೃತ ಲೈನ್ಮ್ಯಾನ್. ಇವರು ಕಳೆದ 22 ವರ್ಷಗಳಿಂದ ಇಂಧನ ಇಲಾಖೆಯಲ್ಲಿ ಕೆಲಸ ಮಾಡುತ್ತಿದ್ದಾರೆ. ಮೊದಲು ಪಾಲಿಯಾ ವಿದ್ಯುತ್ ಕೇಂದ್ರದಲ್ಲಿ ಕಾರ್ಯ ನಿರ್ವಹಿಸುತ್ತಿದ್ದು ನಂತರ ಅಲಿಗಂಜ್ಗೆ ವರ್ಗಾಯಿಸಲಾಗಿತ್ತು. ಆದರೆ, ಪಾಲಿಯಾದಲ್ಲಿ ಇಡೀ ಕುಟುಂಬ ನೆಲೆಸಿದ್ದರಿಂದ ಮರಳಿ ಪಾಲಿಯಾಗೆ ವರ್ಗಾವಣೆ ಮಾಡುವಂತೆ ಗೋಕುಲ್ ಮನವಿ ಮಾಡಿದ್ದರಂತೆ. ಆದರೆ, ಜೆಇ ನಾಗೇಂದ್ರ ಶರ್ಮಾ ವಿಕೃತವಾದ ಬೇಡಿಕೆ ಇಟ್ಟಿದ್ದನಂತೆ.
ಜೆಇ ಕಿರುಕುಳದಿಂದಾಗಿಯೇ ಗೋಕುಲ್ ಮಾನಸಿಕವಾಗಿ ನೊಂದಿದ್ದರು. ಈ ಸಂಬಂಧ ಪೊಲೀಸ್ ಠಾಣೆಯಲ್ಲಿ ದೂರು ಸಹ ದಾಖಲಿಸಲಾಗಿತ್ತು. ಆದರೂ, ಪೊಲೀಸರು ಆರೋಪಿ ವಿರುದ್ಧ ಯಾವುದೇ ಕ್ರಮ ಕೈಗೊಂಡಿರಲಿಲ್ಲ ಎಂದು ಮೃತನ ಪತ್ನಿ ಮನನೊಂದು ಹೇಳಿದ್ದಾರೆ. ಗೋಕುಲ್ಗೆ ನಾಲ್ವರು ಮಕ್ಕಳಿದ್ದಾರೆ ಎಂದು ತಿಳಿದು ಬಂದಿದೆ.
ಸಾವಿಗೂ ಮುನ್ನ ವಿಡಿಯೋ ಹೇಳಿಕೆ: ಜೆಇಯ ಅಮಾನವೀಯ ಬೇಡಿಕೆಯಿಂದ ಬೇಸತ್ತಿದ್ದ ಲೈನ್ಮ್ಯಾನ್ ಗೋಕುಲ್ 59 ಸೆಕೆಂಡ್ಗಳ ವಿಡಿಯೋ ಮಾಡಿದ್ದು, ಜೆಇ ವಿರುದ್ಧ ಹೇಳಿಕೆ ದಾಖಲಿಸಿದ್ದಾರೆ. ನಂತರ ಪೆಟ್ರೋಲ್ ಸುರಿದುಕೊಂಡು ಬೆಂಕಿ ಹಚ್ಚಿಕೊಂಡಿದ್ದಾರೆ. ತೀವ್ರ ಸುಟ್ಟ ಗಾಯಗಳಿಂದ ನರಳುತ್ತಿದ್ದ ಆತನನ್ನು ಲಖನೌ ಆಸ್ಪತ್ರೆಗೆ ಸಾಗಿಸಲಾಗಿತ್ತು. ಆದರೆ, ಚಿಕಿತ್ಸೆಗೆ ಸ್ಪಂದಿಸದೆ ಸಾವನ್ನಪ್ಪಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಜೆಇ ಅಮಾನತು: ಲೈನ್ಮ್ಯಾನ್ ಆತ್ಮಹತ್ಯೆ ನಂತರ ಇಂಧನ ಇಲಾಖೆಯಲ್ಲಿ ನೌಕರರ ಆಕ್ರೋಶ ಭುಗಿಲೆದ್ದಿದೆ. ಅಲ್ಲದೇ, ಸ್ವತಃ ಗೋಕುಲ್ ಮೇಲಾಧಿಕಾರಿ ವಿರುದ್ಧ ವಿಡಿಯೋ ಮಾಡಿ ಸಾವನ್ನಪ್ಪಿರುವುದಿಂದ ಇಲಾಖೆ ಕೊನೆಗೂ ಎಚ್ಚೆತ್ತುಕೊಂಡಿದೆ. ಹೀಗಾಗಿ ತಕ್ಷಣವೇ ಆರೋಪಿ ಜೆಇ ನಾಗೇಂದ್ರ ಶರ್ಮಾನನ್ನು ಅಮಾನತು ಮಾಡಲಾಗಿದೆ. ಜತೆಗೆ ಮತ್ತೊಬ್ಬ ಲೈನ್ಮ್ಯಾನ್ ವಿರುದ್ಧವೂ ಕ್ರಮ ಕೈಗೊಳ್ಳಲಾಗಿದೆ ಎಂದು ಅಧೀಕ್ಷಕ ಇಂಜಿನಿಯರ್ ರಾಮ್ ತಿಳಿಸಿದ್ದಾರೆ.
ಇದನ್ನೂ ಓದಿ: ಸೆಕ್ಷನ್ 144 ಉಲ್ಲಂಘನೆ ಪ್ರಕರಣ : ಕೋರ್ಟ್ಗೆ ಶರಣಾಗಿ ಜಾಮೀನು ಪಡೆದ ಕೇಂದ್ರ ಸಚಿವ
