ತಳಿ(ತಮಿಳುನಾಡು): ಆಸ್ತಿ ವಿವಾದಕ್ಕೆ ಸಂಬಂಧಿಸಿದಂತೆ ಕೆಲ ವರ್ಷಗಳ ಹಿಂದೆ ನಡೆದ ಕೊಲೆ ಪ್ರಕರಣದ ಸೇಡಿಗಾಗಿ ಯುವಕನೊಬ್ಬನನ್ನು ಕೊಲೆ ಮಾಡಿದ ಘಟನೆ ತಮಿಳುನಾಡಿನಲ್ಲಿ ನಡೆದಿದೆ.
ಬುಲೆಟ್ ಚೆನ್ನಕೃಷ್ಣ. ಸಂಬಂಧಿಗಳಿಂದಲೇ ಕೊಲೆಯಾದವ. ತಮಿಳು ನಾಡಿನ ಹುಲಿ ಬಂಡೆ ಗ್ರಾಮದಲ್ಲಿ ಈ ಘಟನೆ ಜರುಗಿದೆ. ರಾತ್ರಿ ತಮಿಳುನಾಡು ವಿಧಾನಸಭಾ ಚುನಾವಣಾ ಪ್ರಚಾರದ ಗುಂಗಿನಲ್ಲಿ ಮಾತನಾಡಲು ಕರೆಯಿಸಿಕೊಂಡ ಕೊಲೆಗಾರರ ತಂಡ ಚೆನ್ನಕೃಷ್ಣನ ತಲೆ ಮೇಲೆ ಟ್ರ್ಯಾಕ್ಟರ್ ಹರಿಸಿ ಗಾಯಗೊಳಿಸಿದ್ದರು. ಆಗಲೂ ಪ್ರಾಣ ಹೋಗದಿದ್ದಾಗ ಕೆಳಗೆ ಬಿದ್ದವನ ಮೇಲೆ ಮೂರು ಸೈಜುಗಲ್ಲುಗಳನ್ನು ತಲೆ ಮೇಲೆ ಹಾಕಿ ಹತ್ಯೆ ಮಾಡಿದ್ದಾರೆ ಎಂದು ತಿಳಿದು ಬಂದಿದೆ.
ಕೊಲೆಗೆ ಕಾರಣ:
ಕುಟುಂಬದ ಆಸ್ತಿಗಾಗಿ ಹಿರಿಯನಾದ ಓಬೇಗೌಡ ಎಂಬುವನನ್ನು ಕೆಲ ವರ್ಷಗಳ ಹಿಂದೆ ಬರ್ಬರವಾಗಿ ಕೊಲೆ ಮಾಡಿದ್ದ ಆರೋಪದಲ್ಲಿ ಬುಲೆಟ್ ಚೆನ್ನಕೃಷ್ಣ ಜೈಲು ಪಾಲಾಗಿದ್ದ. ಅನಂತರ ಜಾಮೀನು ಪಡೆದು ಆನೇಕಲ್ ಆದಿಗೊಂಡನಹಳ್ಳಿಯಲ್ಲಿ ವಾಸವಿದ್ದ. ಕೋರ್ಟಿನಲ್ಲಿ ಕೊಲೆ ಪ್ರಕರಣ ವಿಚಾರಣಾ ಹಂತದಲ್ಲಿತ್ತು. ಈ ಹಿನ್ನೆಲೆ ಓಬೇಗೌಡನ ಮಗ ಇಪ್ಪತ್ತೆರೆಡು ವರ್ಷದ ಮುರುಗೇಶ್ ಮತ್ತು ಓಬೇಗೌಡನ ತಮ್ಮ ನಲವತ್ತು ವರ್ಷದ ಪಾಪಯ್ಯ ಈ ಕೃತ್ಯ ಎಸಗಿದ್ದಾರೆ ಎಂದು ಹೇಳಲಾಗಿದೆ.
ಇದೀಗ ಪ್ರಕರಣ ತಮಿಳುನಾಡಿನ ತಳಿ ಪೊಲೀಸ್ ಠಾಣೆಯಲ್ಲಿ ದಾಖಲಾಗಿದ್ದು, ತನಿಖೆ ಮುಂದುವರಿದಿದೆ.
