ನವದೆಹಲಿ: ಮದರಸಾಗಳಲ್ಲಿ ವಿಶಾಲ ತಳಹದಿಯ ಶಿಕ್ಷಣ ನೀಡುವುದು ಇಂದಿನ ಅಗತ್ಯವಾಗಿದೆ ಎಂದು ಕೇರಳ ರಾಜ್ಯಪಾಲ ಆರಿಫ್ ಮೊಹಮ್ಮದ್ ಖಾನ್ ಹೇಳಿದ್ದಾರೆ. ಮದರಸಾಗಳಲ್ಲಿ ಸರಿಯಾದ ಶಿಕ್ಷಣವನ್ನು ನೀಡಬೇಕು ಹಾಗೂ ಮಕ್ಕಳಿಗೆ ಏಕ ಸಿದ್ಧಾಂತ ಬೋಧನೆಯ ರೀತಿಯ ಶಿಕ್ಷಣ ನೀಡಲೇಬಾರದು ಎಂದು ಅವರು ಪ್ರತಿಪಾದಿಸಿದ್ದಾರೆ. ಇದೇ ಸಂದರ್ಭದಲ್ಲಿ, ತಾವು ಒಂದು ಸಮುದಾಯಕ್ಕೆ ಸೇರಿದ್ದು, ಅದು ಭಾರತೀಯ ಸಮುದಾಯ ಎಂದು ಖಾನ್ ತಿಳಿಸಿದ್ದಾರೆ.
ತ್ರಿವಳಿ ತಲಾಖ್ ರದ್ದು ಮಾಡಿದ ಕಾರಣಕ್ಕೆ ಪ್ರಧಾನಿ ನರೇಂದ್ರ ಮೋದಿ ಅವರು ಕೇವಲ ಭಾರತ ಮಾತ್ರವಲ್ಲದೆ ಇಡೀ ವಿಶ್ವದಲ್ಲೇ ಮೆಚ್ಚುಗೆ ಪಡೆದಿದ್ದಾರೆ. ತ್ರಿವಳಿ ತಲಾಖ್ ಕಾಯ್ದೆ ರದ್ದತಿಯಿಂದ ಮುಸಲ್ಮಾನ ಸಮುದಾಯದಲ್ಲಿ ತಲಾಖ್ ಪ್ರಕರಣಗಳು ಶೇ 91 ರಷ್ಟು ಕಡಿಮೆಯಾಗಿವೆ ಎಂದರು.
ಖಾಸಗಿ ಸುದ್ದಿ ವಾಹಿನಿಯ ಜಾಗತಿಕ ಸಮಾವೇಶದಲ್ಲಿ ಭಾಗವಹಿಸಿ ಮಾತನಾಡಿದ ಅವರು, ಭಾರತವು ವಿಶ್ವಸಂಸ್ಥೆಯ ಮಾನವ ಹಕ್ಕುಗಳ ಘೋಷಣೆಯ ಒಪ್ಪಿತ ರಾಷ್ಟ್ರವಾಗಿದೆ. ಯಾವುದೇ ಮಗುವಿಗೆ 14 ವರ್ಷದವರೆಗೆ ವಿಶಾಲ ತಳಹದಿಯ ಶಿಕ್ಷಣವನ್ನೇ ನೀಡಬೇಕು ಎಂದು ಮನವಿ ಮಾಡಿದರು.
"5 ರಿಂದ 6 ವರ್ಷ ವಯಸ್ಸಿನ ಮಕ್ಕಳಿಗೆ ನಾವು ಸಿದ್ಧಾಂತ ಬೋಧನೆಯ ಶಿಕ್ಷಣ ನೀಡುತ್ತಿದ್ದೇವೆ ಎಂಬುದನ್ನು ಮರೆಯಬಾರದು. ಸರಿಯಾದ ಶಿಕ್ಷಣ ನೀಡದಿದ್ದರೆ ಇಂಥ ಸಂಗತಿಗಳು ಘಟಿಸುವುದನ್ನು ನೋಡಲು ನಾವು ತಯಾರಾಗಿರಬೇಕು" ಎಂದು ಮದರಸಾ ಶಿಕ್ಷಣ ಕ್ರಮ ಉಲ್ಲೇಖಿಸಿ ಕೇರಳ ರಾಜ್ಯಪಾಲರು ಹೇಳಿದರು.
ಶಿಕ್ಷಣವನ್ನು ಮೂಲಭೂತ ಹಕ್ಕು ಎಂದು ಘೋಷಿಸಿದಾಗ ಕೇವಲ ಒಂದೇ ಒಂದು ಸಂಘಟನೆ ಅದನ್ನು ವಿರೋಧಿಸಿತ್ತು. ಆ ಸಂಘಟನೆಯೇ ಮುಸ್ಲಿಂ ಪರ್ಸನಲ್ ಲಾ ಬೋರ್ಡ್ ಎಂದು ಆರಿಫ್ ಮೊಹಮ್ಮದ್ ಖಾನ್ ಮಾರ್ಮಿಕವಾಗಿ ನುಡಿದರು.
ಏಕ ಸಿದ್ಧಾಂತ ಬೋಧನೆಯ ಶಿಕ್ಷಣ ಎಂದರೇನು?: ಒಂದು ಸಿದ್ಧಾಂತ ಅಥವಾ ಕೆಲವು ನಂಬಿಕೆಯನ್ನು ಯಾವುದೇ ವಿಶ್ಲೇಷಣೆಗೆ ಒಳಪಡಿಸದೆಯೇ ಅಥವಾ ಸಾಧಕ-ಬಾಧಕಗಳನ್ನು ಅರಿಯುವ ಕೆಲಸವನ್ನೂ ಮಾಡದೇ ನಿರ್ದಿಷ್ಟ ವ್ಯಕ್ತಿ ಇಲ್ಲವೇ ಇಡೀ ಗುಂಪಿಗೆ ಬೋಧಿಸುವ ಪದ್ಧತಿ.
