ಕರೀಂನಗರ(ತೆಲಂಗಾಣ): ಆಕೆಗೆ ಧೈರ್ಯ ಜಾಸ್ತಿ... ಏನಾದ್ರೂ ಸಾಹಸ ಮಾಡಬೇಕೆಂಬ ಹಂಬಲ.. ಹೀಗಾಗಿ ಅವಳು ಆಯ್ದುಕೊಂಡ ರಂಗವೇ ಬೇರೆ ಆಗಿತ್ತು. ಅದು ಸಹ ವಿಷವುಳ್ಳ ಹಾವು ಹಿಡಿಯುವ ಸಾಹಸ ಕಾರ್ಯ.
ಕರೀಂನಗರ ಜಿಲ್ಲೆಯ ನಿವಾಸಿ ಶಬಾನಾಗೆ ಹಾವು ಹಿಡಿಯುವುದು ಅಂದ್ರೆ ಒಂದು ಕ್ರೇಜ್ ಇದ್ದಂತೆ. ಅಲ್ಲಿ ಹಾವು ಇದೇ ಅಂತಾ ಗೊತ್ತಾದರೆ ಸಾಕು ಮುನ್ನುಗ್ಗೇ ಬಿಡುತ್ತಾರೆ. ಮಂಗಳವಾರ ರಾತ್ರಿ ಜಿಲ್ಲೆಯ ಮಂಕಮ್ಮತೋಟದಲ್ಲಿ ವೆಂಕಟರಮಣ ಎಂಬುವರ ಮನೆಯಲ್ಲಿ ನಾಗರ ಹಾವು ಕಾಣಿಸಿದೆ. ಬಳಿಕ ಮತ್ತಿಬ್ಬರ ಮನೆಯಲ್ಲಿ ನುಗ್ಗಿದ ನಾಗ ತಪ್ಪಿಸಿಕೊಳ್ಳಲು ಯತ್ನಿಸುತ್ತಿತ್ತು. ವಿಷಯ ತಿಳಿದ ಕಾರ್ಪೊರೇಟರ್ ಜಿತೇಂದ್ರ ಹಾವು ಹಿಡಿಯುವವರಿಗೆ ಕರೆ ಮಾಡಿ ಮಾಹಿತಿ ಮುಟ್ಟಿಸಿದ್ದರು.
ಕೂಡಲೇ ಸ್ಪಂದಿಸಿದ ಶಬಾನಾ ಸ್ಥಳಕ್ಕೆ ದೌಡಾಯಿಸಿದರು. ಬಳಿಕ ಆ ಮನೆಯ ಲೈಟ್ಗಳನ್ನು ಬಂದ್ ಮಾಡಿದರು. ಕಗ್ಗತ್ತಲಿನಲ್ಲಿ ಹಾವಿನ ಶಬ್ದವನ್ನು ಆಲಿಸಿದರು. ಬಳಿಕ ಕ್ಷಣಾರ್ಧದಲ್ಲೇ ಹಾವು ಹಿಡಿದರು. ಈ ಹಾವನ್ನು ಪ್ಲಾಸ್ಟಿಕ್ ಬಾಟಲಿಯೊಳಗೆ ಹಾಕಿ, ಭಯಪಡುವ ಅವಶ್ಯಕತೆಯಿಲ್ಲ ಎಂದು ಅಲ್ಲಿನ ಜನಕ್ಕೆ ತಿಳಿಸಿದರು.
ಹಾವು ಹಿಡಿದು ಬಾಟಲಿಯೊಳಗೆ ಹಾಕಿದ ಮೇಲೆ ಜನ ನಿಟ್ಟುಸಿರು ಬಿಟ್ಟರು. ಇಲ್ಲಿಯವರೆಗೆ ಹಾವುಗಳನ್ನು ಹಿಡಿಯುವುದು ಪುರುಷರೇ ಎಂದುಕೊಂಡಿದ್ದ ಈ ಊರಿನ ಮಂದಿ ಶಬಾನಾ ಅವರ ಧೈರ್ಯ ಕಂಡು ಬೆರಗಾದರು. ಸುಲಭವಾಗಿ, ಧೈರ್ಯವಾಗಿ ಹಾವು ಹಿಡಿಯುವುದನ್ನು ಕಂಡ ಜನ ಶಬಾನಾ ಕಾರ್ಯಕ್ಕೆ ಮೆಚ್ಚುಗೆ ವ್ಯಕ್ತಪಡಿಸಿದರು.
