ಬಿಹಾರದಲ್ಲಿ ಗುಂಡು ಹಾರಿಸಿ, ಜೆಡಿಯು ಮುಖಂಡನ ಹತ್ಯೆ

ಬಿಹಾರದಲ್ಲಿ ಜೆಡಿಯು ಮುಖಂಡ ದೀಪಕ್ ಕುಮಾರ್ ಮೆಹ್ತಾ ಅವರನ್ನು ಗುಂಡು ಹಾರಿಸಿ, ದುಷ್ಕರ್ಮಿಗಳು ಕೊಂದಿದ್ದು, ಸ್ಥಳೀಯರು ಪ್ರತಿಭಟನೆ ನಡೆಸಿದ್ದಾರೆ.

ಪಾಟ್ನಾ(ಬಿಹಾರ): ಅಪರಿಚಿತ ವ್ಯಕ್ತಿಗಳು ಜೆಡಿಯು ಮುಖಂಡನನ್ನು ಗುಂಡಿಕ್ಕಿ ಹತ್ಯೆ ಮಾಡಿರುವ ಘಟನೆ ಪಾಟ್ನಾದ ದನಾಪುರ ಪ್ರದೇಶದಲ್ಲಿ ಸೋಮವಾರ ನಡೆದಿದೆ. ಪೊಲೀಸರ ಪ್ರಕಾರ ಜೆಡಿಯು ಮುಖಂಡ ದೀಪಕ್ ಕುಮಾರ್ ಮೆಹ್ತಾ ಭೋಜನ ಮುಗಿಸಿ ತನ್ನ ನಿವಾಸದ ಆವರಣದಲ್ಲಿ ನಡೆದುಕೊಂಡು ಹೋಗುತ್ತಿದ್ದಾಗ ದಾಳಿಕೋರರು ಗುಂಡುಹಾರಿಸಿದ್ದಾರೆ. ದೀಪಕ್ ಕುಮಾರ್ ಮೆಹ್ತಾ ಅವರು ದಾನಾಪುರ ನಗರ ಪರಿಷತ್​ನ ಉಪಾಧ್ಯಕ್ಷರಾಗಿದ್ದು, ಅವರ ಎದೆಗೆ ಒಂದು ಗುಂಡು, ಮತ್ತೊಂದು ಗುಂಡು ತಲೆಗೆ ತಗುಲಿದೆ.

ಮೊದಲಿಗೆ ದೀಪಕ್ ಕುಮಾರ್ ಮೆಹ್ತಾ ಅವರನ್ನು ಸ್ಥಳೀಯ ಆಸ್ಪತ್ರೆಗೆ ದಾಖಲಿಸಲಾಗಿದ್ದು, ಈಗಾಗಲೇ ಮೃತಪಟ್ಟಿರುವುದಾಗಿ ವೈದ್ಯರು ಘೋಷಿಸಿದ್ದಾರೆ. ಮಾಹಿತಿ ತಿಳಿಯುತ್ತಿದ್ದಂತೆ ಸ್ಥಳೀಯರು ಗಲಾಟೆ ಸೃಷ್ಟಿಸಿ ನಸ್ರಿಗಂಜ್ ಪೊಲೀಸ್ ಠಾಣೆಯನ್ನು ಧ್ವಂಸಗೊಳಿಸಿದ್ದಾರೆ. ನಂತರ ಡಣಾಪುರ - ಗಾಂಧಿ ಮೈದಾನ ಮುಖ್ಯರಸ್ತೆ ತಡೆದಿದ್ದಾರೆ. ನಂತರ ಪೊಲೀಸರು ಜನರನ್ನು ಚದುರಿಸಿದ್ದು, ಹೆಚ್ಚಿನ ಸಂಖ್ಯೆಯಲ್ಲಿ ಪೊಲೀಸ್ ಪಡೆಗಳನ್ನು ನಿಯೋಜಿಸಲಾಗಿದೆ. ದೀಪಕ್​ ಕುಮಾರ್ ಹತ್ಯೆಗೆ ಕಾರಣ ತಿಳಿದು ಬಂದಿಲ್ಲ.

ದೀಪಕ್ ಮೆಹ್ತಾ 2020ರ ವಿಧಾನಸಭಾ ಚುನಾವಣೆಯಲ್ಲಿ ದಾನಪುರದಿಂದ ಆರ್‌ಎಲ್‌ಎಸ್‌ಪಿ ಪಕ್ಷದ ಟಿಕೆಟ್‌ನಲ್ಲಿ ಸ್ಪರ್ಧಿಸಿದ್ದರು. ನಂತರ ಆರ್​ಎಲ್​ಎಸ್​ಪಿ ಪಕ್ಷವು ಜೆಡಿಯುನೊಂದಿಗೆ ವಿಲೀನಗೊಂಡಿತು. ಪ್ರಸ್ತುತ ಪೊಲೀಸರು ಎಲ್ಲ ಆಯಾಮಗಳಿಂದಲೂ ಪ್ರಕರಣದ ತನಿಖೆ ಆರಂಭಿಸಿದ್ದಾರೆ. ಜಮೀನು ಸಂಬಂಧಿತ ವಿವಾದ, ಚುನಾವಣಾ ಪೈಪೋಟಿ ಅಥವಾ ಇನ್ನಾವುದೇ ಕಾರಣದಿಂದ ಹತ್ಯೆ ನಡೆದಿದೆಯೇ ಎಂಬ ಬಗ್ಗೆ ತನಿಖೆ ನಡೆಸಲಾಗುತ್ತಿದ್ದು, ಸಿಸಿಟಿವಿ ಕ್ಯಾಮೆರಾದ ದೃಶ್ಯಾವಳಿಗಳನ್ನು ಪರಿಶೀಲಿಸಲಾಗುತ್ತಿದೆ.

ಇದನ್ನೂ ಓದಿ: ಬೆಂಗಳೂರು ಟ್ರಾನ್ಸ್​ಫಾರ್ಮರ್​​ ಸ್ಫೋಟ ಪ್ರಕರಣ: ಇಬ್ಬರು ಬೆಸ್ಕಾಂ ಇಂಜಿನಿಯರ್ಸ್​​ ಬಂಧನ