ಆತ್ಮಚರಿತ್ರೆಯ ಪ್ರಕಟಣೆ ಹಿಂಪಡೆಯಲು ಇಸ್ರೋ ಅಧ್ಯಕ್ಷ ಸೋಮನಾಥ್ ನಿರ್ಧಾರ

ತಮ್ಮ 'ನಿಲಾವು ಕುಡಿಚ್ಚ ಸಿಂಹಂಗಳ್' ಆತ್ಮಚರಿತ್ರೆಯ ಪ್ರಕಟಣೆಯನ್ನು ಹಿಂಪಡೆಯಲು ನಿರ್ಧರಿಸಿರುವುದಾಗಿ ಇಸ್ರೋ ಅಧ್ಯಕ್ಷ ಸೋಮನಾಥ್ ತಿಳಿಸಿದ್ದಾರೆ.

ತಿರುವನಂತಪುರಂ (ಕೇರಳ): ತಮ್ಮ ಆತ್ಮಚರಿತ್ರೆಯ ಪುಸಕ್ತದ ಪ್ರಕಟಣೆಯಿಂದ ಹಿಂದೆ ಸರಿಯುತ್ತಿರುವುದಾಗಿ ಇಸ್ರೋ ಅಧ್ಯಕ್ಷ ಎಸ್.ಸೋಮನಾಥ್ ಶನಿವಾರ ಹೇಳಿದ್ದಾರೆ. ತಮ್ಮ 'ನಿಲಾವು ಕುಡಿಚ್ಚ ಸಿಂಹಂಗಳ್' ಆತ್ಮಚರಿತ್ರೆಯಲ್ಲಿ ಇಸ್ರೋ ಮಾಜಿ ಅಧ್ಯಕ್ಷ ಕೆ.ಶಿವನ್ ಬಗ್ಗೆ ಕೆಲವು ವಿಮರ್ಶಾತ್ಮಕ ಟೀಕೆಗಳು ಮಾಡಲಾಗಿದೆ ಎಂಬುವುದು ವಿವಾದಕ್ಕೆ ಕಾರಣವಾಗಿದೆ. ಇದರ ಬೆನ್ನಲ್ಲೆ ಪುಸ್ತಕದ ಪ್ರಕಟಣೆಯನ್ನು ಹಿಂಪಡೆಯಲು ನಿರ್ಧರಿಸಿರುವುದಾಗಿ ಸೋಮನಾಥ್ ಖಚಿತಪಡಿಸಿದ್ದಾರೆ.

ಸೋಮನಾಥ್ ಅವರು ತಮ್ಮ 15 ಅಧ್ಯಾಯಗಳ ಪುಸ್ತಕದಲ್ಲಿ ಇಸ್ರೋದ ಒಳ ರಾಜಕೀಯವನ್ನು ಬಹಿರಂಗಪಡಿಸಿದ್ದಾರೆ. ಹಿರಿಯ ವಿಜ್ಞಾನಿಗಳ ನಡುವಿನ ಪೈಪೋಟಿ ಮತ್ತು ಭಿನ್ನಾಭಿಪ್ರಾಯದ ಬಗ್ಗೆ ಉಲ್ಲೇಖಿಸಿದ್ದಾರೆ. ಅಧ್ಯಾಯವೊಂದರಲ್ಲಿ ಪ್ರತಿಷ್ಠಿತ ಜಿಎಸ್​ಎಲ್​ವಿ ಮಿಷನ್​ಅನ್ನು ಹಾಳುಮಾಡಲು ವಿಜ್ಞಾನಿಗಳ ಕೆಲವು ವಿಭಾಗಗಳು ಯೋಜಿಸಿದ್ದವು ಎಂದು ಬಹಿರಂಗಪಡಿಸಿದ್ದರು.

ಇಸ್ರೋದ ಮಾಜಿ ಅಧ್ಯಕ್ಷ ಕೆ.ಶಿವನ್ ಅವರು ತಮ್ಮನ್ನು ಇಸ್ರೋ ಅಧ್ಯಕ್ಷ ಸ್ಥಾನದಿಂದ ದೂರ ಇಡಲು ಪ್ರಯತ್ನಿಸಿದ್ದರು. ಎ.ಎಸ್. ಕಿರಣ್ ಕುಮಾರ್ ಅವರ ನಿವೃತ್ತಿಯ ನಂತರ ತಾವು ಮತ್ತು ಕೆ.ಶಿವನ್ ಇಸ್ರೋದ ಉನ್ನತ ಹುದ್ದೆಗೆ ಮುಂಚೂಣಿಯಲ್ಲಿದ್ದೆವು ಎಂದೂ ಬರೆದಿದ್ದರು.

2018ರಲ್ಲಿ ಶಿವನ್ ಸೇವೆ ವಿಸ್ತರಣೆಯಲ್ಲಿದ್ದರು. ನನಗೂ ಸ್ವಲ್ಪ ಭರವಸೆ ಇತ್ತು. ನಮ್ಮಿಬ್ಬರನ್ನು ಅಧ್ಯಕ್ಷ ಸ್ಥಾನಕ್ಕೆ ಪರಿಗಣಿಸಲಾಗಿದ್ದರೂ ಅಂತಿಮ ನಿರ್ಧಾರ, ಕೆ. ಶಿವನ್ ಪರವಾಗಿತ್ತು. ಆದರೆ, ಇಸ್ರೋ ಅಧ್ಯಕ್ಷರಾಗಿ ಅಧಿಕಾರ ವಹಿಸಿಕೊಂಡ ನಂತರವೂ ನಾನು ಅರ್ಹತೆ ಹೊಂದಿದ್ದ ವಿಎಸ್‌ಎಸ್‌ಸಿ ನಿರ್ದೇಶಕ ಸ್ಥಾನವನ್ನು ಶಿವನ್ ಬಿಡಲು ಸಿದ್ಧರಿರಲಿಲ್ಲ. ಈ ಬಗ್ಗೆ ನೇರವಾಗಿ ಕೇಳಿದಾಗ ನುಣುಚಿಕೊಂಡರು ಎಂದು ಆರೋಪಿಸಿದ್ದರು.

ಚಂದ್ರಯಾನ 2 ಮಿಷನ್ ವಿಫಲದ ಬಗ್ಗೆ ಪ್ರಸ್ತಾಪ: ಇಸ್ರೋ ಅಧ್ಯಕ್ಷ ಸೋಮನಾಥ್ ಅವರು ತಮ್ಮ ಆತ್ಮಚರಿತ್ರೆಯಲ್ಲಿ ಚಂದ್ರಯಾನ -2 ಮಿಷನ್ ವಿಫಲದ ಬಗ್ಗೆಯೂ ಪ್ರಸ್ತಾಪ ಮಾಡಿದ್ದರು. ಅಗತ್ಯ ಪರೀಕ್ಷೆಗಳನ್ನು ನಡೆಸದೆ ತರಾತುರಿಯಲ್ಲಿ ಉಡಾವಣೆ ಮಾಡಿದ್ದರಿಂದ ಚಂದ್ರಯಾನ-2 ವಿಫಲವಾಗಿದೆ. ಇದಕ್ಕೆ ನಿಜವಾದ ಕಾರಣ ಸಾಫ್ಟ್‌ವೇರ್ ದೋಷ. ಆಗಿನ ಅಧ್ಯಕ್ಷರು ಹೇಳಿದಂತೆ ಲ್ಯಾಂಡರ್‌ನೊಂದಿಗಿನ ಸಂವಹನ ವೈಫಲ್ಯವಲ್ಲ ಎಂದು ಉಲ್ಲೇಖಿಸಿದ್ದರು.

ಇದನ್ನೂ ಓದಿ: ನನ್ನ ಆತ್ಮಚರಿತ್ರೆಯಲ್ಲಿ ಯಾರನ್ನೂ ಟಾರ್ಗೆಟ್​ ಮಾಡಿಲ್ಲ: ಇಸ್ರೋ ಅಧ್ಯಕ್ಷ ಸೋಮನಾಥ್

ಆತ್ಮಚರಿತ್ರೆಯ ವಿವಾದ ಕುರಿತಾಗಿ ಇಂದು ಪ್ರತಿಕ್ರಿಯಿಸಿದ್ದ ಸೋಮನಾಥ್, ತಮ್ಮ ದಶಕಗಳ ಸುದೀರ್ಘ ಪ್ರಯಾಣದಲ್ಲಿ ತಾವು ಎದುರಿಸಿದ ಕೆಲ ಸವಾಲುಗಳನ್ನು ಉಲ್ಲೇಖಿಸಲಾಗಿದೆ. ಆದರೆ, ಅದು ಯಾವುದೇ ನಿರ್ದಿಷ್ಟ ವ್ಯಕ್ತಿಯ ವಿರುದ್ಧ ಅಲ್ಲ ಎಂದು ಹೇಳಿದ್ದರು. ಜೊತೆಗೆ ಚಂದ್ರಯಾನ-2 ಮಿಷನ್ ವೈಫಲ್ಯದ ಘೋಷಣೆಗೆ ಸಂಬಂಧಿಸಿದಂತೆ ಸ್ಪಷ್ಟತೆಯ ಕೊರತೆಯನ್ನು ತಮ್ಮ ಪುಸ್ತಕದಲ್ಲಿ ಉಲ್ಲೇಖಿಸಲಾಗಿದೆ ಎಂಬುವುದನ್ನು ಅವರು ಒಪ್ಪಿಕೊಂಡಿದ್ದರು.

ವಾಸ್ತವವಾಗಿ ಏನಾಯಿತು ಎಂಬುದನ್ನು ಹೇಳುವುದು ಉತ್ತಮ ಅಭ್ಯಾಸ ಎಂದು ನಾನು ನಂಬುತ್ತೇನೆ. ಇದು ಸಂಸ್ಥೆಯಲ್ಲಿ ಪಾರದರ್ಶಕತೆಯನ್ನು ಹೆಚ್ಚಿಸುತ್ತದೆ. ಹಾಗಾಗಿ ನಾನು ಆ ನಿರ್ದಿಷ್ಟ ಘಟನೆಯನ್ನು ಪುಸ್ತಕದಲ್ಲಿ ಉಲ್ಲೇಖಿಸಿದ್ದೇನೆ. ಇದರಲ್ಲಿ ಯಾರನ್ನೂ ಟೀಕಿಸಿಲ್ಲ ಎಂದು ತಿಳಿಸಿದ್ದರು.