ಇಂದೋರ್(ಮಧ್ಯಪ್ರದೇಶ): ಕಾಲೇಜುಗಳಲ್ಲಿ ಸೀನಿಯರ್ಗಳು ಜೂನಿಯರ್ ವಿದ್ಯಾರ್ಥಿಗಳನ್ನು ರ್ಯಾಗಿಂಗ್ ಮಾಡುವುದು ಸಹಜ. ಆದರೆ, ಅದು ಅತಿರೇಕವಾದಾಗ ಪ್ರಾಣಾಪಾಯಗಳು ಸಂಭವಿಸಿವೆ. ಇದೇ ರೀತಿ ಮಧ್ಯಪ್ರದೇಶದ ಇಂದೋರ್ನ ಎಂಜಿಎಂ ವೈದ್ಯಕೀಯ ಕಾಲೇಜಿನಲ್ಲಿ ರ‍್ಯಾಗಿಂಗ್ನಿಂದಾಗಿ ವಿದ್ಯಾರ್ಥಿನಿಯರು ತೀವ್ರ ಬೇಸತ್ತಿದ್ದರು. ಇದನ್ನು ಮಟ್ಟಹಾಕಲು ಪೊಲೀಸರು ಮಾಡಿದ ಐಡಿಯಾ ದೇಶದ ಗಮನ ಸೆಳೆದಿದೆ.
ಕಾಲೇಜಿನಲ್ಲಿ ವಿಪರೀತವಾಗಿ ರ್ಯಾಗಿಂಗ್ ನಡೆಯುತ್ತಿತ್ತು. ಇದರ ಹಿಂದೆ ಯಾರ ಕೈವಾಡವಿದೆ ಎಂಬುದು ನಿಗೂಢವಾಗಿತ್ತು. ಪ್ರಕರಣ ದಾಖಲಿಸಿಕೊಂಡ ಪೊಲೀಸರು ಇದರ ಪತ್ತೆಗೆ ತಾವೇ ಅಖಾಡಕ್ಕಿಳಿದಿದ್ದಾರೆ. ಪೊಲೀಸ್ ಕಾನ್ಸ್ಟೇಬಲ್ ಶಾಲಿನಿ ಚೌಹಾಣ್ ಅವರನ್ನು ವಿದ್ಯಾರ್ಥಿನಿಯ ರೂಪದಲ್ಲಿ ಕಾಲೇಜಿಗೆ ನಿತ್ಯ ಕಳುಹಿಸಿದ್ದಾರೆ.
ಶಾಲಿನಿ ಅವರು, ದಿನವೂ ಕಾಲೇಜಿಗೆ ತೆರಳಿ ಹಿರಿಯ ಮತ್ತು ಕಿರಿಯ ವಿದ್ಯಾರ್ಥಿನಿಗಳ ಜೊತೆಗೆ ಮಾತುಕತೆ ನಡೆಸಿ ರ್ಯಾಗಿಂಗ್ ಮಾಡುವವರನ್ನು ಗುರುತಿಸಿದ್ದಾರೆ. ಬಳಿಕ 11 ಮಂದಿಯನ್ನು ಬಂಧಿಸಲಾಗಿದೆ. ಕಾಲೇಜಿನಲ್ಲಿ ನಡೆಯುತ್ತಿದ್ದ ಹೈಪ್ರೊಫೈಲ್ ರ್ಯಾಗಿಂಗ್ ಅನ್ನು ಪೊಲೀಸರು ತಂತ್ರ ರೂಪಿಸಿ ತಡೆದಿದ್ದಾರೆ.
ವಿದ್ಯಾರ್ಥಿನಿಯಾಗಿ ಕಾಲೇಜಿಗೆ ತೆರಳಿ ರಹಸ್ಯ ಕಾರ್ಯಾಚರಣೆ ನಡೆಸಿದ ಶಾಲಿನಿ ಅವರು ಈಚೆಗಷ್ಟೇ ಪೊಲೀಸ್ ಹುದ್ದೆಗೆ ಸೇರಿಕೊಂಡಿದ್ದರು. ಅವರ ತಂದೆಯ ಅಕಾಲಿಕ ಮರಣದಿಂದಾಗಿ ಶಾಲಿನಿಗೆ ಅನುಕಂಪದ ಆಧಾರದ ಈ ಹುದ್ದೆ ನೀಡಲಾಗಿತ್ತು. ಕೆಲಸ ಆರಂಭಿಸಿದ ಕೆಲವೇ ದಿನಗಳಲ್ಲಿ ಶಾಲಿನಿ ಅವರು ರಹಸ್ಯ ಕಾರ್ಯಾಚರಣೆಯಲ್ಲಿ ತೊಡಗಿಸಿಕೊಂಡು ಯಶಸ್ವಿಯಾಗಿದ್ದಾರೆ.
ಮೊದಲು ನನ್ನ ಮನಸ್ಸು ರಹಸ್ಯ ಕಾರ್ಯಾಚರಣೆಗೆ ಒಪ್ಪಿಕೊಳ್ಳಲಿಲ್ಲ. ಈ ಹುದ್ದೆ ನನಗೆ ಹೊಸತು. ಬಳಿಕ ಪೊಲೀಸ್ ಹುದ್ದೆ ಅಂದ ಮೇಲೆ ಇವೆಲ್ಲಾ ಇದ್ದದ್ದೇ ಎಂದು ತಿಳಿದು, ಕಾರ್ಯಾಚರಣೆಗೆ ಮುಂದಾದೆ ಎಂದು ಶಾಲಿನಿ ಅವರು ಹೇಳಿದರು.
