ಜಾಜ್ಪುರ(ಒಡಿಶಾ): ರಾಮಾಯಣದ ಶ್ರೀರಾಮಚಂದ್ರ ವನವಾಸದ ಸಮಯ ತನ್ನ ಮಡದಿ ಸೀತೆಯನ್ನು ಅಪಹರಿಸಿದ ರಾವಣನ ಜೊತೆಗೇ ಯುದ್ಧ ಮಾಡಿದ್ದನು. ತನ್ನ ಮಡದಿ ಮೇಲಿನ ಪ್ರೀತಿಗೆ ಶ್ರೀರಾಮಚಂದ್ರ ಹತ್ತು ತಲೆಯ ರಾವಣನನ್ನೇ ಸಂಹರಿಸಿದ್ದನು. ದ್ವಾಪರಯುಗದ ರಾಮ ಮಡದಿಗಾಗಿ ಕಾಡೆಲ್ಲಾ ಅಲೆದರೆ ಇಲ್ಲೊಬ್ಬ ಕಲಿಯುಗದ ರಾಮಚಂದ್ರ ಹೆಂಡತಿ ಮೇಲಿನ ಕೋಪಕ್ಕೆ ಅನ್ನ ತಿನ್ನುವುದನ್ನೇ ಬಿಟ್ಟಿದ್ದಾನಂತೆ.
ಮೊದಲು ಸುಖಿ ಸಂಸಾರ.. ಆಶ್ಚರ್ಯವಾದರೂ ಇದು ಸತ್ಯ ಘಟನೆ. ಒಡಿಶಾ ರಾಜ್ಯದ ಶ್ರೀರಾಮಚಂದ್ರ ಸೀತಾ ದಂಪತಿಯ ಕತೆಯಿದು. ಗಂಡ ಹೆಂಡತಿಯ ಜಗಳ ಉಂಡು ಮಲಗುವ ತನಕ ಎನ್ನುತ್ತಾರೆ. ಆದರೆ ಇಲ್ಲಿ ಗಂಡ ಹೆಂಡತಿಯ ಜಗಳದಿಂದ ಜಾಜ್ಪುರ ಜಿಲ್ಲೆಯ ಭಿಕಿಪುರ ಗ್ರಾಮದಲ್ಲಿ ವಾಸಿಸುವ ರಾಮಚಂದ್ರ ಎನ್ನುವವರು ಒಂದು ದಿನ, ಎರಡು ದಿನವಲ್ಲ ಬರೋಬ್ಬರಿ 42 ವರ್ಷಗಳಿಂದ ಅನ್ನ ತಿನ್ನುವುದನ್ನೇ ಬಿಟ್ಟಿದ್ದಾರೆ. ಈ ರಾಮಚಂದ್ರನ ಹೆಂಡತಿಯ ಹೆಸರು ಸೀತಾ. 54 ವರ್ಷಗಳ ಹಿಂದೆ ರಾಮಚಂದ್ರ ಹಾಗೂ ಸೀತಾ ಅವರು ದಾಂಪತ್ಯ ಜೀವನಕ್ಕೆ ಕಾಲಿಟ್ಟಿದ್ದರು. 12 ವರ್ಷಗಳ ಕಾಲ ಸುಖವಾಗಿ ಸಂಸಾರ ಮಾಡಿದ್ದ ರಾಮಚಂದ್ರ ಅವರು ಹೆಂಡತಿ ಜೊತೆ ಮುನಿಸಿಕೊಂಡು ತಾವಿದ್ದ ಮನೆಯಿಂದ ಸ್ವಲ್ಪ ದೂರದಲ್ಲೊಂದು ಗುಡಿಸಲು ಕಟ್ಟಿಕೊಂಡು ಅದರಲ್ಲೇ ವಾಸಿಸುತ್ತಿದ್ದಾರೆ.
ರಾಮಚಂದ್ರ ಅವರಿಗೆ ಈ 76ರ ವೃದ್ಧಾಪ್ಯ. 54 ವರ್ಷಗಳ ಹಿಂದೆ ರಾಮಚಂದ್ರ ಅವರು ಕೂಲಿ ಕೆಲಸ ಮಾಡುತ್ತಿದ್ದರು. ಮಡದಿ ಸೀತಾ ಅವರು ಜೀವನಕ್ಕಾಗಿ ಒಣ ಮೀನು ಮಾರಾಟ ಮಾಡುತ್ತಿದ್ದರು. 22ನೇ ವಯಸ್ಸಿಗೆ ಮದುವೆಯಾಗಿದ್ದ ರಾಮಚಂದ್ರ ಅವರದ್ದು ಪತ್ನಿ, ಐವರು ಪುತ್ರಿಯರು ಹಾಗೂ ಇಬ್ಬರು ಪುತ್ರರನ್ನು ಒಳಗೊಂಡ ಸುಖಿ ಸಂಸಾರವಾಗಿತ್ತು. ಇಬ್ಬರ ದುಡಿಮೆಯಲ್ಲಿ ಅವರ ಸಂಸಾರ ಸಾಗುತ್ತಿತ್ತು. ಎಂದಿನಂತೆ ಒಂದು ದಿನ ರಾಮಚಂದ್ರ ಅವರು ಕೆಲಸಕ್ಕೆಂದು ಹೊರಗಡೆ ಹೋಗಿದ್ದರು. ಪ್ರತಿದಿನದಂತೆಯೇ ಆ ದಿನವೂ ಹೆಂಡತಿ ಸೀತಾ ಜೊತೆ ತಾನು ಕೆಲಸದಿಂದ ಹಿಂತಿರುಗಿ ಬರುವಾಗ ಅಡುಗೆ ತಯಾರಿಸಿಡಲು ಹೇಳಿದ್ದರು.
ತಾಳ್ಮೆ ಕಳೆದುಕೊಂಡಿದ್ದ ರಾಮಚಂದ್ರ.. ದುರದೃಷ್ಟಕ್ಕೆ ಆ ದಿನ ಸೀತಾ ಅವರು ಜ್ವರದಿಂದ ಬಳಲುತ್ತಿದ್ದ ಕಾರಣ ಗಂಡ ಕೆಲಸದಿಂದ ಹಿಂತಿರುಗೋ ಹೊತ್ತಿಗೆ ಅಡುಗೆ ಮಾಡಿಡಲು ಸಾಧ್ಯವಾಗಿರಲಿಲ್ಲ. ಮನೆಗೆ ಹಿಂತಿರುಗಿದ ರಾಮಚಂದ್ರ ಅವರು ಮಡದಿ ಜೊತೆ ಮನೆಯಲ್ಲಿ ಅಡುಗೆ ಸಿದ್ಧವಾಗಿಲ್ಲದೇ ಇರುವುದನ್ನು ಕಂಡು ಕೋಪಗೊಂಡಿದ್ದರು. ತಮ್ಮ ತಾಳ್ಮೆ ಕಳೆದುಕೊಂಡು ಪತ್ನಿ ಜೊತೆ ಜಗಳವಾಡಿದ್ದರು. ಆ ದಿನ ಕೋಪದಲ್ಲಿ ಹೆಂಡತಿಯಿಂದ ಒಂದು ಅಕ್ಕಿ ಕಾಳು ಕೂಡ ತೆಗೆದುಕೊಳ್ಳುವುದಿಲ್ಲ ಎಂದು ಶಪಥ ಮಾಡಿದ್ದರಂತೆ.
ಗುಡಿಸಲಿನಲ್ಲಿ ಜೀವನ.. ಆ ಶಪಥದಂತೆ ರಾಮಚಂದ್ರ ಅವರು ಇಂದಿನವರೆಗೂ ಅನ್ನ ತಿನ್ನದೆ, ಬರೀ ಬೆಳಗ್ಗಿನ ಹೊತ್ತು ಚಹಾ ಕುಡಿದು, ಉಳಿದ ಹೊತ್ತು ಅವಲಕ್ಕಿಯನ್ನೇ ತಮ್ಮ ಆಹಾರವಾಗಿಸಿಕೊಂಡಿದ್ದಾರೆ. ಈ ತಾತ ಕೋಪದಲ್ಲಿ ಅನ್ನ ಬಿಟ್ಟಿರುವುದು ಮಾತ್ರವಲ್ಲ, ಅದೇ ದಿನ ಮನೆ ತೊರೆದು, ಮನೆಯಿಂದ ಅಣತಿ ದೂರದಲ್ಲಿ ಗುಡಿಸಲು ಕಟ್ಟಿಕೊಂಡು ಅದರೊಳಗೆ ಜೀವನ ಸಾಗಿಸುತ್ತಿದ್ದಾರೆ. 42 ವರ್ಷಗಳಾದರೂ ಇಂದಿಗೂ ಅದೇ ಗುಡಿಸಲಿನಲ್ಲಿ ತಾವು ಮಾಡಿದ ಶಪಥಕ್ಕೆ ಬದ್ಧರಾಗಿ ಜೀವಿಸುತ್ತಿದ್ದಾರೆ. ಅವರ ಪತ್ನಿ ಮಾತ್ರ ಪುತ್ರರು, ಸೊಸೆಯಂದಿರು ಮತ್ತು ಮೊಮ್ಮಕ್ಕಳೊಂದಿಗೆ ಅದೇ ಮನೆಯಲ್ಲಿ ವಾಸಿಸುತ್ತಿದ್ದಾರೆ.
ಮನೆಯ ಯಜಮಾನ ಕಷ್ಟಪಟ್ಟು ದುಡಿದು ಸಂಸಾರ ನೋಡಿಕೊಳ್ಳುತ್ತಾನೆ. ಆದರೆ ಆತ ಬೆವರು ಸುರಿಸಿ ದುಡಿದು ಮನೆಗೆ ಬಂದರೆ ಮನೆಯಲ್ಲಿ ಯಾರೂ ಊಟ ಕೊಡಲಿಲ್ಲ. ಒಂದು ಸಣ್ಣ ಬಟ್ಟಲಲ್ಲಿ ಅನ್ನ ಕೊಡಲು ಸಾಧ್ಯವಾಗಲಿಲ್ಲ ಎಂದರೆ ಅನ್ನ ಯಾಕೆ ತಿನ್ಬೇಕು. ಆ ದಿನವೇ ನಾನು ಅನ್ನ ತಿನ್ನುವುದಿಲ್ಲ ಎಂದು ನಿರ್ಧರಿಸಿದ್ದೆ ಎನ್ನುತ್ತಾರೆ ರಾಮಚಂದ್ರ.
ಪ್ರತಿಜ್ಞೆ ಹಿಂತೆಗೆದುಕೊಳ್ಳುವಂತೆ ಒತ್ತಾಯ.. ಹೆಂಡತಿ, ಮಕ್ಕಳು, ಗೆಳೆಯರು, ನೆರೆಹೊರೆಯವರು, ಪ್ರತಿಜ್ಞೆ ಹಿಂತೆಗೆದುಕೊಳ್ಳುವಂತೆ ಎಷ್ಟೇ ಹೇಳಿದರೂ, ಯಾರಿಂದಲೂ ರಾಮಚಂದ್ರ ಅವರ ಕೋಪವನ್ನು ತಗ್ಗಿಸಲಾಗಿಲ್ಲ. ಅಂದು ಹೆಂಡತಿ ಮೇಲೆ ಕೋಪಗೊಂಡಾಗ ಅವಳಿದ್ದ ಪರಿಸ್ಥಿತಿಯನ್ನು ತಾಳ್ಮೆಯಿಂದ ಅರ್ಥ ಮಾಡಿಕೊಂಡಿದ್ದರೆ ಅನ್ನ ಬಿಡುವ ಪ್ರಮೇಯವೇ ಬರುತ್ತಿರಲಿಲ್ಲ. ಒಡಿಶಾ ರಾಜ್ಯದ ಮನೆಗಳಲ್ಲಿ ಅನ್ನ ಪ್ರಧಾನ ಆಹಾರ. ತಮ್ಮ ಕೋಪದಿಂದಾಗಿ ಅದನ್ನೇ ತ್ಯಾಗ ಮಾಡಿದ್ದಾರೆ ರಾಮಚಂದ್ರ. ರಾಮಚಂದ್ರ ಅವರು ಯಾವಾಗ ತಮ್ಮ ಪ್ರತಿಜ್ಞೆಗೆ ಅಂತ್ಯ ಹಾಡಿ ಅನ್ನ ತಿನ್ನುತ್ತಾರೋ ಎಂದು ಮಡದಿ ಸೇರಿದಂತೆ ಮನೆಯವರೆಲ್ಲಾ ಕಾಯುತ್ತಿದ್ದಾರೆ.
ಇದನ್ನೂ ಓದಿ: ಹರ್ದೋಯಿ ಗಂಡ ಹೆಂಡಿರ ಸಂಬಂಧಕ್ಕೆ ಹುಳಿ ಹಿಂಡಿದ ನೊಣಗಳು.. ಕನ್ಯೆ ಕೊಡೋರಿಲ್ಲ, ಮದುವೆ ಮುಂಜಿ ನಡೆಸೊಂಗಿಲ್ಲ!
