ಸಹರಾನ್ಪುರ: ಉತ್ತರಪ್ರದೇಶದ ಸಹರಾನ್ಪುರ ಜಿಲ್ಲಾ ಕಾರಾಗೃಹದ 23 ಕೈದಿಗಳಿಗೆ ಮಾರಣಾಂತಿಕ ಹೆಚ್ಐವಿ ಸೋಂಕು ತಗುಲಿದೆ. ಇದನ್ನು ಆರೋಗ್ಯ ಇಲಾಖೆಯೇ ದೃಢಪಡಿಸಿದ್ದು, ಜೈಲು ಅಧಿಕಾರಿಗಳನ್ನು ಕಂಗೆಡಿಸಿದೆ. ಸೋಂಕಿನ ಮೂಲದ ಬಗ್ಗೆ ಪತ್ತೆ ಮಾಡಲು ಆದೇಶಿಸಲಾಗಿದ್ದು, ಈ ಬಗ್ಗೆ ರಾಜ್ಯ ಸರ್ಕಾರಕ್ಕೂ ಮಾಹಿತಿ ರವಾನಿಸಲಾಗಿದೆ.
ಜೂನ್ 15 ರಂದು ಸಹರಾನ್ಪುರ ಜಿಲ್ಲಾ ಕಾರಾಗೃಹದಲ್ಲಿ ಒಂದು ವಾರ ಆರೋಗ್ಯ ಶಿಬಿರ ಆಯೋಜಿಸಲಾಗಿತ್ತು. ಈ ವೇಳೆ, ನಡೆಸಿದ ತಪಾಸಣೆಯಲ್ಲಿ ಕೈದಿಗಳಿಗೆ ಏಡ್ಸ್ ಇರುವುದು ಗೊತ್ತಾಗಿದೆ. ಸೋಂಕಿತ ಕೈದಿಗಳಿಗೆ ಅಗತ್ಯ ಚಿಕಿತ್ಸೆ ನೀಡುವುದರ ಜೊತೆಗೆ, ಕಾರಾಗೃಹದಲ್ಲಿರುವ 2200 ಕೈದಿಗಳ ರಕ್ತದ ಮಾದರಿಯನ್ನು ಸಂಗ್ರಹಿಸಲಾಗಿದೆ.
23 ಖೈದಿಗಳಿಗೆ ಹೆಚ್ಐವಿ ಪಾಸಿಟಿವ್ ಕಂಡು ಬಂದಿದ್ದರಲ್ಲಿ ಹೆಚ್ಚಿನ ಖೈದಿಗಳು ಬೆಹತ್, ಗಂಗೋಹ್, ನಕುದ್ ಮತ್ತು ದಿಯೋಬಂದ್‌ನಿಂದ ಬಂದವರಾಗಿದ್ದು, ಆರೋಗ್ಯ ಇಲಾಖೆ ಈಗ ಅವರ ಹಿನ್ನೆಲೆಯನ್ನು ಸಂಗ್ರಹಿಸುತ್ತಿದೆ. ಈ ಕೈದಿಗಳ ಚಿಕಿತ್ಸೆಗಾಗಿ ಜೈಲು ಆಡಳಿತವು ಎಆರ್‌ಟಿ ಕೇಂದ್ರಕ್ಕೆ ಪತ್ರವನ್ನೂ ಬರೆದಿದೆ.
ಸೋಂಕಿನ ಹಿನ್ನೆಲೆ ಪತ್ತೆ: "ಎಚ್‌ಐವಿ ಪಾಸಿಟಿವ್ ಬಂದ 23 ಕೈದಿಗಳ ಪೈಕಿ 6 ಮಂದಿ ಹೊಸಬರಾಗಿದ್ದಾರೆ. ಉಳಿದವರು ಹಳೆಯ ಕೈದಿಗಳು. ಅವರಲ್ಲಿ ಹೆಚ್ಚಿನವರು ಡ್ರಗ್ ಪ್ರಕರಣದಲ್ಲಿ ಬಂಧಿತರಾಗಿದ್ದಾರೆ. ಸೋಂಕು ತಗುಲಿದ ಬಗ್ಗೆ ಪತ್ತೆ ಕಾರ್ಯ ನಡೆಸಲಾಗುತ್ತಿದೆ" ಎಂದು ಜೈಲು ಅಧೀಕ್ಷಕಿ ಅನಿತಾ ದುಬೆ ತಿಳಿಸಿದ್ದಾರೆ.
“ಕಳೆದ 5 ತಿಂಗಳಲ್ಲಿ 2 ಬಾರಿ ಜೈಲಿನಲ್ಲಿ ಆರೋಗ್ಯ ಶಿಬಿರಗಳನ್ನು ಆಯೋಜಿಸಲಾಗಿದೆ. ಕಳೆದ ಬಾರಿ ಕೆಲವು ಕೈದಿಗಳಿಗೆ ಕ್ಷಯರೋಗ(ಟಿ.ಬಿ) ಇರುವುದು ಪತ್ತೆಯಾದ ಕಾರಣ ಅವರ ಹೆಚ್ಐವಿ ಪರೀಕ್ಷೆಯನ್ನೂ ಮಾಡಿಸಲಾಗಿತ್ತು. ಈ ವೇಳೆ, ಹೆಚ್ಐವಿ ಪಾಸಿಟಿವ್ ಕಂಡು ಬಂದಿದೆ. ಈ ಬಗ್ಗೆ ತೀವ್ರ ನಿಗಾ ವಹಿಸಲಾಗಿದ್ದು, ಸರ್ಕಾರಕ್ಕೆ ಮಾಹಿತಿ ನೀಡಲಾಗಿದೆ ಎಂದು ಹೇಳಿದರು.
ಓದಿ: Viral Video: ಟೋಲ್ ಸಿಬ್ಬಂದಿಗೆ ಕಪಾಳಮೋಕ್ಷ ಮಾಡಿದ ದಿ ಗ್ರೇಟ್ ಖಲಿ!?
