ಆಂಧ್ರಪ್ರದೇಶ: ಯುವರತ್ನ ಪುನೀತ್ ರಾಜ್‌ಕುಮಾರ್ ಸಾವು ಅಭಿಮಾನಿಗಳ ಪ್ರೀತಿಯಿಂದ ಮರೆಯಾಗಲು ಸಾಧ್ಯವಾಗಿಲ್ಲ. ಶ್ರೀಶೈಲಕ್ಕೆ ಪಾದಯಾತ್ರೆ ಹೊರಟಿರುವ ಗುಂಪೊಂದು ಅಪ್ಪು ಫೋಟೋ ಹಿಡಿದು ಘೋಷಣೆ ಕೂಗುತ್ತಾ, ನೆಚ್ಚಿನ ನಟನಿಗೆ ಸದ್ಗತಿ ಸಿಗಲಿ ಎಂದು ದೇವರಲ್ಲಿ ಪ್ರಾರ್ಥಿಸಿದ್ದಾರೆ.
ರಾಯಚೂರು ಜಿಲ್ಲೆಯ ಸಿಂಧನೂರು ತಾಲೂಕಿನ ಪಾಗಡದಿನ್ನಿ ಗ್ರಾಮದ 13 ಯುವಕರು ಪುನೀತ್ ರಾಜ್‌ಕುಮಾರ್ ಫೋಟೋ ಹಿಡಿದುಕೊಂಡು ಶ್ರೀಶೈಲಕ್ಕೆ ಪಾದಯಾತ್ರೆ ಮಾಡುತ್ತಿದ್ದಾರೆ. ಈ ಗುಂಪು ಆಂಧ್ರಪ್ರದೇಶದ ಕೊಡುಮೂರು ನಗರದಲ್ಲಿ ಹಾದು ಹೋಗುತ್ತಿರುವಾಗ ಮಾಧ್ಯಮಗಳ ಕಣ್ಣಿಗೆ ಬಿದ್ದಿದೆ.
ಈ ವೇಳೆ ಮಾಧ್ಯಮಗಳ ಜೊತೆ ಮಾತನಾಡಿದ ಪಾದಯಾತ್ರಿಗಳು, ನಾವು ನಟ ಪುನೀತ್ ರಾಜ್‌ಕುಮಾರ್ ಅವರ ಅಪ್ಪಟ ಅಭಿಮಾನಿಗಳು. ಅಪ್ಪು ಅವರ ಆತ್ಮಕ್ಕೆ ಶಾಂತಿ ಸಿಗಬೇಕು ಎಂದು ಶ್ರೀಶೈಲಕ್ಕೆ ಪಾದಯಾತ್ರೆ ಮಾಡುತ್ತಿದ್ದೇವೆ. 4 ದಿನಗಳಿಂದ ಈ ಯಾತ್ರೆ ಮುಂದುವರಿದಿದೆ. ಶ್ರೀಶೈಲಕ್ಕೆ ತಲುಪಿದ ಬಳಿಕ ಅಪ್ಪು ಹೆಸರಲ್ಲಿ ಪೂಜೆ ಸಲ್ಲಿಸಲಾಗುವುದು ಎಂದು ತಿಳಿಸಿದ್ದಾರೆ.
ರಾಯಚೂರು ಜಿಲ್ಲೆಯ ಈ ಪಾದಯಾತ್ರಿಗಳ ಗುಂಪು ಈವರೆಗೂ 200 ಕಿಮೀ ನಡೆದುಕೊಂಡು ಬಂದಿದ್ದಾರೆ.
ಇದನ್ನೂ ಓದಿ: ಹಿಜಾಬ್ ತೀರ್ಪು ವಿರೋಧಿಸಿ ಪರೀಕ್ಷೆ ಬಹಿಷ್ಕಾರ: ಮರು ಪರೀಕ್ಷೆ ಸಾಧ್ಯವಿಲ್ಲ- ಶಿಕ್ಷಣ ಸಚಿವ ಬಿ.ಸಿ.ನಾಗೇಶ್‌
