ಗಡಿಯಲ್ಲಿ ಚೀನಾದಿಂದ ಕ್ಷಿಪಣಿ ನಿಯೋಜನೆ: ಎದುರಿಸೋಕೆ ಸಿದ್ಧ ಎಂದ ವಾಯುಸೇನೆ ಮುಖ್ಯಸ್ಥ

ಉಭಯ ದೇಶಗಳ ಸಂಬಂಧ ಸುಧಾರಣೆಗೆ ಮಾತುಕತೆಗಳು ನಡೆಯುತ್ತಿರುವ ಬೆನ್ನಲ್ಲೇ ಚೀನಾ ಲಡಾಖ್​ ಗಡಿಯಲ್ಲಿ ಅಪಾರ ಪ್ರಮಾಣ ಕ್ಷಿಪಣಿ ಹಾಗೂ ರಾಡಾರ್​ಗಳನ್ನು ನಿಯೋಜಿಸುತ್ತಿದೆ ಎಂದು ವಾಯುಪಡೆಯ ಮುಖ್ಯಸ್ಥರು ಹೇಳಿದ್ದಾರೆ.

ನವದೆಹಲಿ: ಪೂರ್ವ ಲಡಾಖ್​​ನ ಗಡಿಯಲ್ಲಿ ಚೀನಾ ಕ್ಷಿಪಣಿಗಳನ್ನು ಹಾಗೂ ರಾಡಾರ್​ಗಳನ್ನು ಹೆಚ್ಚಿನ ಪ್ರಮಾಣದಲ್ಲಿ ನಿಯೋಜಿಸುತ್ತಿದೆ ಎಂದು ಏರ್​ ಚೀಫ್​ ಮಾರ್ಷಲ್​ ಆರ್​ಕೆಎಸ್​ ಬದೌರಿಯಾ ಮಂಗಳವಾರ ಮಾಹಿತಿ ನೀಡಿದ್ದಾರೆ.

ನವದೆಹಲಿಯ ವಿವೇಕಾನಂದ ಇಂಟರ್​ನ್ಯಾಷನಲ್​ ಫೌಂಡೇಶನ್ ಆಯೋಜಿಸಿದ್ದ 'ರಾಷ್ಟ್ರದ ಭದ್ರತೆಗೆ ಸವಾಲುಗಳು ಮತ್ತು ವಾಯುಸೇನೆಯ ಶಕ್ತಿ' ಎಂಬ ವಿಷಯದ ಕುರಿತು ವೆಬ್‌ನಾರ್‌ನಲ್ಲಿ ಮಾತನಾಡಿದ ಅವರು ಚೀನಾ ಸೇನೆಗೆ ಕ್ಷಿಪಣಿಗಳು ಹಾಗೂ ರಾಡಾರ್​ಗಳನ್ನು ನೀಡುವ ಮೂಲಕ ಅವುಗಳ ಆಕ್ರಮಣಶೀಲತೆಯ ಸಾಧ್ಯತೆ ಹೆಚ್ಚಾಗುತ್ತಿದೆ ಎಂದು ಆತಂಕ ವ್ಯಕ್ತಪಡಿಸಿದ್ದಾರೆ.

ಇದನ್ನೂ ಓದಿ: 2020ರಲ್ಲಿ ಚೀನಾದಿಂದ ಭಾರತಕ್ಕೆ ಎದುರಾದ ಸವಾಲುಗಳೇನು?

ಟಿಬೆಟ್​ನಲ್ಲಿ ಭಾರತದ ಭೂಪ್ರದೇಶಕ್ಕೆ ಸಮೀಪವಾಗಿ ಚೀನಾ ತನ್ನ ವಾಯುಪಡೆಯ ಜೆ-20 ಮತ್ತು ಜೆ-10 ಫೈಟರ್​ ಜೆಟ್​​​ಗಳನ್ನು ಹಾಗೂ ರಷ್ಯಾ ಮೂಲದ ಎಸ್​ಯು-30, ಎಸ್​-400 ಅನ್ನು ನಿಯೋಜಿಸಿದೆ. ಇದಕ್ಕೆ ಪ್ರತಿಯಾಗಿ ಭಾರತವೂ ಲಡಾಖ್​ ವಲಯದಲ್ಲಿ ರಫೇಲ್ ಮತ್ತು ಮಿಗ್-29 ಸೇರಿದಂತೆ ಹಲವು ಫೈಟರ್​ ಜೆಟ್​ಗಳನ್ನು ನಿಯೋಜಿಸಿದ್ದು, ಚೀನಾದ ದುಷ್ಕೃತ್ಯಗಳನ್ನು ತಡೆಯಲು ಸಂಪೂರ್ಣವಾಗಿ ಸಿದ್ಧವಾಗಿದೆ ಎಂದಿದ್ದಾರೆ.

ಇದರ ಜೊತೆಗೆ ಜಾಗತಿಕವಾಗಿ ನೋಡುವುದಾದರೆ ಚೀನಾ-ಭಾರತದ ಸಂಘರ್ಷ ಚೀನಾಗೆ ಒಳ್ಳೆಯದಲ್ಲ ಎಂದು ಕೂಡಾ ಆರ್​ಕೆಎಸ್​ ಬದೌರಿಯಾ ಅಭಿಪ್ರಾಯಪಟ್ಟಿದ್ದಾರೆ. ಈಗ ಸದ್ಯಕ್ಕೆ ವಾಯುಪಡೆ ಪಾಕ್ ಮತ್ತು ಚೀನಾ ಎರಡರ ವಿರುದ್ಧವೂ ಅತಿಕ್ರಮಣ ತಡೆಯುವಲ್ಲಿ, ಬಹುಮುಖ್ಯವಾದ ಪಾತ್ರ ವಹಿಸುತ್ತಿದೆ.