ಮುಂಬೈ: ತಮ್ಮ ಐದೂವರೆ ತಿಂಗಳಿನ ಮಗುವನ್ನು ಉಳಿಸಿಕೊಳ್ಳಲು ಗುಜರಾತ್ ಮೂಲದ ದಂಪತಿ ಸುಮಾರು 16 ಕೋಟಿ ರೂಪಾಯಿ ಸಂಗ್ರಹಿಸಿ, ಕೊನೆಗೂ ಕರುಳಿನ ಕುಡಿಯನ್ನು ಉಳಿಸಿಕೊಳ್ಳಲು ಯಶಸ್ವಿಯಾಗಿದ್ದಾರೆ.
ಹೌದು, ಮುಂಬೈನ ಮಾಹಿಮ್ನಲ್ಲಿರುವ ಪಿಡಿ ಹಿಂದುಜಾ ಆಸ್ಪತ್ರೆಯಲ್ಲಿ ಧೈರ್ಯರಾಜ್ ಎಂಬ ಐದೂವರೆ ತಿಂಗಳಿನ ಗಂಡು ಮಗುವಿಗೆ ಚಿಕಿತ್ಸೆ ನೀಡಲಾಗುತ್ತಿದೆ. ಈ ಮಗು ಎಸ್ಎಂಎ- ಸ್ಪೈನಲ್ ಮಸ್ಕಲಾರ್ ಆಟ್ರೋಫಿ ಎಂಬ ಅತ್ಯಪರೂಪದ ಕಾಯಿಲೆಯಿಂದ ನರಳುತ್ತಿತ್ತು.
ಮಗುವನ್ನು ಕಾಯಿಲೆಯಿಂದ ಪಾರು ಮಾಡಲು ಮತ್ತು ಜೀವ ಉಳಿಸಲು ಝೊಲ್ಗೆನ್ಸ್ಮಾ ಎಂಬ ಚುಚ್ಚುಮದ್ದಿನ ಅವಶ್ಯಕತೆ ಇದ್ದು, ಇದರ ಬೆಲೆ ಬರೋಬ್ಬರಿ 16 ಕೋಟಿ ರೂಪಾಯಿ ಆಗಿದೆ.
ಕ್ರೌಡ್ ಫಂಡಿಂಗ್ ನೆರವಿಗೆ ಬಂತು..!
ಅಷ್ಟು ಹಣ ಹೊಂದಿಸಲು ಸಾಧ್ಯವಿಲ್ಲದ ದಂಪತಿ ಕ್ರೌಡ್ಫಂಡಿಂಗ್ ಮೊರೆಹೊಗಿದ್ದಾರೆ. ಸಾಮಾಜಿಕ ಜಾಲತಾಣಗಳಲ್ಲೂ ಕೂಡಾ ಬೇಡಿಕೆ ತಮ್ಮ ಅಳಲನ್ನು ತೋಡಿಕೊಂಡಿದ್ದಾರೆ. ಸುಮಾರು 71 ದಿನಗಳಲ್ಲಿ 2,64,660 ಮಂದಿಯಿಂದ 16 ಕೋಟಿ ರೂಪಾಯಿ ಸಂಗ್ರಹಿಸಿದ್ದಾರೆ.
ಮಗುವಿಗೆ ನೀಡಬೇಕಾದ ಚುಚ್ಚು ಮದ್ದು ಝೊಲ್ಗೆನ್ಸ್ಮಾ ಭಾರತದಲ್ಲಿ ಸಿಗುವುದಿಲ್ಲ. ಆದ್ದರಿಂದಾಗಿ ಅದನ್ನು ಅಮೆರಿಕದಿಂದ ತರಿಸಿಕೊಳ್ಳಲಾಗಿದ್ದು, ಬುಧವಾರ ಬೆಳಗ್ಗೆ 11 ಗಂಟೆಗೆ ಧೈರ್ಯರಾಜ್ಗೆ ನೀಡಲಾಗಿದೆ. ಈಗ ಬಾಲಕ ಆರೋಗ್ಯ ಸ್ಥಿತಿ ಸ್ಥಿರವಾಗಿದೆ ಎಂದು ವೈದ್ಯರಾದ ನೀಲು ದೇಸಾಯಿ ತಿಳಿಸಿದ್ದಾರೆ.
ಏನಿದು ಸ್ಪೈನಲ್ ಮಸ್ಕಲಾರ್ ಆಟ್ರೋಫಿ..?
ಇದು ಮಾನವನ ನರಮಂಡಲದ ಮೇಲೆ ಪ್ರಭಾವ ಬೀರುವ ಒಂದು ವಂಶಪಾರಂಪರ್ಯವಾಗಿ ಬರುವ ಸಾಧ್ಯತೆಯುಳ್ಳ ರೋಗ. ಈ ರೋಗ ಕಾಣಿಸಿಕೊಂಡರೆ ಸ್ನಾಯುಗಳು ಮತ್ತು ನರಮಂಡಲ (ಮುಖ್ಯವಾಗಿ ಮೆದುಳು) ಸರಿಯಾಗಿ ಕಾರ್ಯನಿರ್ವಹಿಸಲು ಸಾಧ್ಯವಾಗುವುದಿಲ್ಲ.
ಇದನ್ನೂ ಓದಿ: ಆಕ್ಸಿಜನ್ ಸಾಗಣೆ ವೇಳೆ ಸೋರಿಕೆ.. ವ್ಯರ್ಥವಾಯ್ತು ನೂರಾರು ಟನ್ 'ಪ್ರಾಣವಾಯು'
ಈ ರೋಗ ಆವರಿಸಿದವರಿಗೆ ಕಡೆಯ ಪಕ್ಷ ಕುಳಿತುಕೊಳ್ಳಲು, ತಲೆಯನ್ನು ಎತ್ತಲು, ನೀರು ಕುಡಿಯಲು ಮತ್ತು ಉಸಿರಾಡಲೂ ಕೂಡಾ ಸಾಕಷ್ಟು ಕಷ್ಟ ಪಡಬೇಕಾಗುತ್ತದೆ.
ಇದೇ ಕಾರಣದಿಂದಾಗಿ ಮಗುವಿಗೆ ವೆಂಟಿಲೇಟರ್ನಲ್ಲಿ ಚಿಕಿತ್ಸೆ ನೀಡಬೇಕಾಗಿದ್ದು, ಸಾಕಷ್ಟು ಹಣವೂ ಖರ್ಚು ಮಾಡಬೇಕಾಗಿತ್ತು. ಈಗ ಝೊಲ್ಗೆನ್ಸ್ಮಾ ಇಂಜೆಕ್ಷನ್ ನೀಡಿರುವುದರಿಂದಾಗಿ ಮಗು ಪ್ರಾಣಾಪಾಯದಿಂದ ಪಾರಾಗಿದೆ.
