ಗ್ಯಾಂಗ್​ವಾರ್​ನಲ್ಲಿ ಗುಂಡೇಟಿಗೆ ಐವರು ರೌಡಿಗಳು ಖತಂ..

ರೌಡಿಸಂ ಮಾಡುತ್ತಿದ್ದ ಎರಡು ಗ್ಯಾಂಗ್​ಗಳ ಮಧ್ಯೆ ಶುಕ್ರವಾರ ರಾತ್ರಿ ನಡೆದ ಗುಂಡಿನ ಕಾಳಗದಲ್ಲಿ ಐವರು ಬಲಿಯಾದ ಘಟನೆ ನಡೆದಿದೆ.

ಪಾಟ್ನಾ(ಬಿಹಾರ): ಎರಡು ಕುಖ್ಯಾತ ಗ್ಯಾಂಗ್​ಗಳ ಮಧ್ಯೆ ನಡೆದ ಗುಂಡಿನ ಕಾಳಗದಲ್ಲಿ ಐವರು ಸಾವನ್ನಪ್ಪಿದ ಘಟನೆ ಬಿಹಾರದಲ್ಲಿ ವರದಿಯಾಗಿದೆ. ಓರ್ವನ ಮೃತದೇಹ ಪತ್ತೆಯಾಗಿದ್ದು, ಇನ್ನುಳಿದವರ ಪತ್ತೆಗೆ ಪೊಲೀಸರು ಹುಡುಕಾಟ ನಡೆಸಿದ್ದಾರೆ.

ಕತಿಹಾರ್​ ಜಿಲ್ಲೆಯಲ್ಲಿ ಪಿಕು ಯಾದವ್​ ಮತ್ತು ಮೋಹನ್​ ಠಾಕೂರ್​ ಎಂಬಿಬ್ಬರು ರೌಡಿ ಗ್ಯಾಂಗ್​ಸ್ಟರ್​ಗಳ ಮಧ್ಯೆ ಕಿತ್ತಾಟ ನಡೆಯುತ್ತಿತ್ತು. ತಾವಿರುವ ಪ್ರದೇಶದ ಮೇಲೆ ಅಧಿಪತ್ಯ ಸಾಧಿಸಲು ಉಭಯ ತಂಡದವರು ಆಗಾಗ ಹೊಡೆದಾಡುತ್ತಿದ್ದರು. ಶುಕ್ರವಾರ ಕೂಡ ಗ್ಯಾಂಗ್​ಗಳ ಮಧ್ಯೆ ವಾಗ್ವಾದ ನಡೆದಿದೆ.

ಈ ವೇಳೆ ಪಿಕು ಯಾದವ್ ಗುಂಪಿನ 40 ಜನರು, 10 ಮಂದಿಯಿದ್ದ ಮೋಹನ್​ ಠಾಕೂರ್​ ಗ್ಯಾಂಗ್​ ಮೇಲೆ ಎರಗಿದ್ದಾರೆ. ಏಕಾಏಕಿ ಗುಂಡಿನ ದಾಳಿ ನಡೆಸಿದಾಗ ತಪ್ಪಿಸಿಕೊಂಡರೂ, ಮೋಹನ್​ ಗ್ಯಾಂಗ್​ನ ಐವರು ಗುಂಡೇಟಿಗೆ ಬಲಿಯಾಗಿದ್ದಾರೆ. ಘರ್ಷಣೆಯ ಬಳಿಕ ಓರ್ವನ ಮೃತದೇಹವನ್ನು ಪೊಲೀಸರು ಪತ್ತೆ ಮಾಡಿದ್ದಾರೆ. ಉಳಿದವರ ಮೃತದೇಹಗಳು ಇನ್ನೂ ಸಿಕ್ಕಿಲ್ಲ ಎಂದು ತಿಳಿದುಬಂದಿದೆ.

ಓದಿ: ನರ್ಸಿಂಗ್ ವಿದ್ಯಾರ್ಥಿನಿ ಅಪಹರಿಸಿ ಅತ್ಯಾಚಾರ: ಅಂತ್ಯಸಂಸ್ಕಾರಕ್ಕೆ ಬಂದಿದ್ದ ಕಾಮುಕರ ಕೃತ್ಯ