ಪನ್ನಾ(ಮಧ್ಯಪ್ರದೇಶದ): ವಜ್ರದ ಗಣಿಗಳನ್ನು ಹೊಂದಿರುವ ಮಧ್ಯಪ್ರದೇಶದ ಪನ್ನಾದಲ್ಲಿ ಐವರು ಗುತ್ತಿಗೆದಾರರಿಗೆ ಜಾಕ್ಪಾಟ್ ಹೊಡೆದಿದೆ. ಒಂದೇ ದಿನದಲ್ಲಿ ಐವರಿಗೆ ಪ್ರತ್ಯೇಕ ಗಣಿಗಳಲ್ಲಿ 5 ವಜ್ರಗಳು ಸಿಕ್ಕಿವೆ. ಇವುಗಳು 18.82 ಕ್ಯಾರೆಟ್ ತೂಕ ಹೊಂದಿವೆ. ಇವುಗಳ ಮೌಲ್ಯ 50 ಲಕ್ಷ ರೂಪಾಯಿ ಅಂದಾಜು ಮಾಡಲಾಗಿದೆ.
ಈ ಬಗ್ಗೆ ವಜ್ರದ ವ್ಯಾಪಾರಿ ಅನುಪಮ್ ಸಿಂಗ್ ಮಾಹಿತಿ ನೀಡಿದ್ದು, ಮೊದಲ ವ್ಯಕ್ತಿಗೆ 6.81 ಕ್ಯಾರೆಟ್ ವಜ್ರ, ಎರಡನೆಯದು 1.77 ಕ್ಯಾರೆಟ್, ಮೂರನೇಯ ವ್ಯಕ್ತಿಗೆ 2.28 ಕ್ಯಾರೆಟ್, 4ನೇ ವ್ಯಕ್ತಿಗೆ 3.64 ಕ್ಯಾರೆಟ್ ಮತ್ತು ಕೊನೆಯಾತನಿಗೆ ಅತಿ ಹೆಚ್ಚು ತೂಕದ 4.32 ಕ್ಯಾರೆಟ್ ವಜ್ರ ಸಿಕ್ಕಿದೆ. ಇವರು ಪ್ರತ್ಯೇಕವಾಗಿ ಗಣಿಗಳನ್ನು ನಡೆಸುತ್ತಿದ್ದಾರೆ. ಒಂದೇ ದಿನದಲ್ಲಿ ಐದು ವಜ್ರದ ಹರಳುಗಳು ಸಿಕ್ಕಿವೆ. ಕಳೆದೊಂದು ವಾರದಲ್ಲಿ 8 ವಜ್ರ ಪತ್ತೆಯಾಗಿವೆ ಎಂದು ತಿಳಿಸಿದರು.
ಸಿಕ್ಕ ವಜ್ರಗಳನ್ನು ಕಚೇರಿಯಲ್ಲಿ ಠೇವಣಿ ಇಡಲಾಗಿದೆ. ಪನ್ನಾ ಜಿಲ್ಲೆಯ ಗಣಿಗಳಿಂದ ತೆಗೆಯಲಾದ ಒಟ್ಟು 125 ವಜ್ರಗಳನ್ನು ಅಕ್ಟೋಬರ್ 18 ರಂದು ಕಲೆಕ್ಟರೇಟ್ ಕಟ್ಟಡದಲ್ಲಿ ಬೃಹತ್ ಹರಾಜು ಪ್ರಕ್ರಿಯೆಯಲ್ಲಿ ಇಡಲಾಗುತ್ತದೆ ಎಂದು ತಿಳಿಸಿದರು.
ಓದಿ: ಗುದನಾಳದೊಳಗಿಟ್ಟುಕೊಂಡು ಅಕ್ರಮ ಚಿನ್ನ ಸಾಗಣೆ.. ಮಂಗಳೂರು ಏರ್ಪೋರ್ಟ್ನಲ್ಲಿ 1.7 ಕೆಜಿ ಬಂಗಾರ ವಶ
