ಚೆನ್ನೈ:ತಂಜಾವೂರು ಮೂಲದ ವೈದ್ಯ ಸೆಂಬಿಯನ್ (35) ದೆಹಲಿಯ ಖಾಸಗಿ ಆಸ್ಪತ್ರೆಯಲ್ಲಿ ಉತ್ತಮವಾಗಿ ಕಾರ್ಯ ನಿರ್ವಹಿಸುತ್ತಿದ್ದರು. 2013ರಲ್ಲಿ ರಷ್ಯಾದಲ್ಲಿ ಎಂಡಿ ಮೆಡಿಕಲ್ ಕೋರ್ಸ್ ಮುಗಿಸಿದ ಬಳಿಕ ತಮ್ಮ ವೈದ್ಯ ಪದವಿಗೆ ದಾಖಲಾಗಿ ತಮಿಳುನಾಡು ಮೆಡಿಕಲ್ ಕೌನ್ಸಿಲ್ ಮುಂದೆ ಹೋದರು. ಇಲ್ಲಿ ತಮ್ಮ ಹೆಸರನ್ನು ದಾಖಲಿಸಿದ ಬಳಿಕ, ಭಾರತೀಯ ವೈದ್ಯಕೀಯ ಮಂಡಳಿಯಲ್ಲಿ ದಾಖಲಾತಿ ಪಡೆದರು. ನಂತರ ಗುಜರಾತ್ ಕೆಲಸ ನಿರ್ವಹಿಸಿ, ಬಳಿಕ ಇದೀಗ ದೆಹಲಿಯಲ್ಲಿ ಸೇವೆ ಸಲ್ಲಿಸುತ್ತಿದ್ದಾರೆ.
ಇತ್ತೀಚೆಗಷ್ಟೆ ಮದುವೆಯಾದ ಇವರು, ತಮಿಳುನಾಡಿನಲ್ಲಿ ನೆಲೆಯೂರಬೇಕು ಎಂದು ಉದ್ದೇಶಿಸಿ, ತಮ್ಮ ಪದವಿ ಪ್ರಮಾಣ ಪತ್ರವನ್ನು ಮೆಡಿಕಲ್ ಕೌನ್ಸಿಲ್ ವೆಬ್ಸೈಟ್ನಲ್ಲಿ ದಾಖಲಿಸಲು ಮುಂದಾಗಿದ್ದಾರೆ. ಆದರೆ, ಅನೇಕ ಪ್ರಯತ್ನಗಳ ನಂತರವೂ ಈ ದಾಖಲಾತಿ ಸಾಧ್ಯವಾಗಿಲ್ಲ. ಈ ಹಿನ್ನೆಲೆ ಅರುಂಬಕ್ಕಂನಲ್ಲಿರುವ ತಮಿಳುನಾಡು ಮೆಡಿಕಲ್ ಕೌನ್ಸಿಲ್ಗೆ ಭೇಟಿ ನೀಡಿ ವಿಚಾರಿಸಿದ್ದಾರೆ. ಈ ವೇಳೆ ಪರಿಶೀಲನೆ ನಡೆಸಿದಾಗ, ಡಾ ಸೆಂಬಿಯನ್ ಅವರ ಬದಲು ವಿಭಿನ್ನ ಫೋನ್ ನಂ ಮತ್ತು ಇಮೇಲ್ ಐಡಿ ದಾಖಲಾಗಿತ್ತು. ಈ ಸಂಬಂಧ ದೂರು ಸಲ್ಲಿಸುವಂತೆ ಸಲಹೆ ನೀಡಲಾಯಿತು. ಈ ಪ್ರಕರಣವನ್ನು ಅಣ್ಣನಗರ ಸೈಬರ್ ಕ್ರೈಂ ಪೊಲೀಸ್ಗೆ ವರ್ಗಾವಣೆ ಮಾಡಲಾಯಿತು.
ಈ ಪ್ರಕರಣ ದಾಖಲಿಸಿಕೊಂಡ ಪೊಲೀಸರು ಇದರ ಪತ್ತೆಗಾಗಿ ಪೊಲೀಸ್ ಇನ್ಸ್ಪೆಕ್ಟರ್ ಶಾಂತಿದೇವಿ ನೇತೃತ್ವದಲ್ಲಿ ಒಂದು ತಂಡ ರಚಿಸಿದರು. ತನಿಖೆಗೆ ಮುಂದಾದ ಪೊಲೀಸರಿಗೆ ಅಸಲಿ ವಿಷಯ ತಿಳಿದು ಶಾಕ್ ಆದರು. ಕಾರಣ ಇದೇ ಹೆಸರಿನ ವೈದ್ಯರೊಬ್ಬರು ಮೈಲಾಡುತುರೈ ಜಿಲ್ಲೆಯಲ್ಲಿ ಕಾರ್ಯ ನಿರ್ವಹಿಸುತ್ತಿದ್ದು, ಈತ ನಕಲಿ ವೈದ್ಯನಾಗಿದ್ದು, ಅಸಲಿ ವೈದ್ಯನ ಹೆಸರು, ಪದವಿಯನ್ನು ಬಳಸಿಕೊಂಡಿದ್ದಾನೆ ಎಂಬುದು ಪತ್ತೆಯಾಯಿತು.
ಏನಿದು ವಂಚನೆ: ಬೇರೆಯವರ ಹೆಸರು ಪದವಿ ಬಳಕೆ ಮಾಡಿ ವಂಚನೆ ಮಾಡುತ್ತಿದ್ದ ಆರೋಪಿಯನ್ನು ವಶಕ್ಕೆ ಪಡೆದು, ಪೊಲೀಸರು ತನಿಖೆಗೆ ಒಳಪಡಿಸಿದ್ದಾರೆ. ಮೈಲಾಡುತುರೈನ ಏರೋನಾಟಿಕಲ್ ಇಂಜಿನಿಯರ್ ಸೆಂಬಿಯನ್ (31) ನಿಜವಾದ ವೈದ್ಯನ ಪದವಿಯನ್ನು ತಮ್ಮ ಹೆಸರಿನಲ್ಲಿ ವಂಚನೆಗೆ ಬಳಸಿಕೊಂಡಿದ್ದಾರೆ. 2012 ಪುದುಕೊಟ್ಟೈನಲ್ಲಿ ಬಿಇ ಪದವಿ ಪಡೆದಿದ್ದರು. 2017ರಲ್ಲಿ ಚೆನ್ನೈಗೆ ಕೆಲಸ ಹುಡುಕಿಕೊಂಡು ಬಂದ ಈತ ಓದಿಗೆ ತಕ್ಕ ಕೆಲಸ ಸಿಗದೇ, ಖಾಸಗಿ ಕಂಪನಿಯಲ್ಲಿ ಉದ್ಯೋಗ ಆರಂಭಿಸಿದ.
