ನವದೆಹಲಿ: ಇಲ್ಲಿಯ ಶಾಲೆಯೊಂದರ ವಿದ್ಯಾರ್ಥಿಯೊಬ್ಬ ಗಣಿತ ಪರೀಕ್ಷೆಯಲ್ಲಿ ಕೇಳಲಾದ ಎಲ್ಲ ಪ್ರಶ್ನೆಗಳಿಗೆ 'ಥಾಲಾ' ಎಂದು ಉತ್ತರಿಸಿದ್ದಕ್ಕಾಗಿ ಶಾಲೆಯಿಂದ ಆತನನ್ನು ಅಮಾನತು ಮಾಡಲಾಗಿದೆ.
ಕೆಲ ದಿನಗಳ ಹಿಂದೆ ವಿದ್ಯಾರ್ಥಿ ಗಜೋಧರ್ ಗಣಿತ ಪರೀಕ್ಷೆಗೆ ಹಾಜರಾಗಿದ್ದ. ಈ ವೇಳೆ ಎಲ್ಲ ಪ್ರಶ್ನೆಗಳಿಗೆ ತನ್ನ ಉತ್ತರ ಪತ್ರಿಕೆಯಲ್ಲಿ 'ಥಾಲಾ' ಎಂದು ಬರೆದಿದ್ದ. ತನ್ನ "ಐಡಲ್" ಭಾರತ ಕ್ರಿಕೆಟ್ ತಂಡದ ಮಾಜಿ ನಾಯಕ ಮಹೇಂದ್ರ ಸಿಂಗ್ ಧೋನಿಗೆ ಗೌರವ ಸಲ್ಲಿಸಲು ಉತ್ತರ ಪತ್ರಿಕೆಯಲ್ಲಿ ಹೀಗೆ ಬರೆದಿರುವುದಾಗಿ ವಿದ್ಯಾರ್ಥಿ ಹೇಳಿರುವುದಾಗಿ ಶಾಲೆಯ ಮೂಲಗಳು ತಿಳಿಸಿವೆ.
ಶಾಲೆಯ ಅಧಿಕಾರಿಯೊಬ್ಬರು ಈ ಘಟನೆಗೆ ಸಂಬಂಧಿಸಿದಂತೆ ಪ್ರತಿಕ್ರಿಯಿಸಿ, ಯಾವುದೇ ಶ್ರೇಷ್ಠ ವ್ಯಕ್ತಿಯ ಅಭಿಮಾನಿಯಾಗುವುದರಲ್ಲಿ ಯಾವುದೇ ತಪ್ಪಿಲ್ಲ. ಆದರೆ, "ಗಜೋಧರ್ ತನ್ನ ಪರೀಕ್ಷೆಯನ್ನು ಗಂಭೀರವಾಗಿ ತೆಗೆದುಕೊಳ್ಳದೇ ಈ ರೀತಿ ಮಾಡಿದ್ದು, ಕೆಟ್ಟ ನಡವಳಿಕೆಯಾಗುತ್ತದೆ. ಅಲ್ಲದೇ ಈ ಪರೀಕ್ಷೆಯಲ್ಲಿ ಆತ ಅನುತ್ತೀರ್ಣನಾಗಿದ್ದಾನೆ. ಹೀಗಾಗಿ ಆ ವಿದ್ಯಾರ್ಥಿಯನ್ನು ಸದ್ಯ ಅಮಾನತು ಮಾಡಲಾಗಿದೆ ಎಂದು ಮಾಹಿತಿ ನೀಡಿದ್ದಾರೆ.
ಏನಿದು ಥಾಲಾ?: ಥಾಲಾ ಎಂಬುದು ತಮಿಳು ಪದವಾಗಿದ್ದು, ಇದರ ಅರ್ಥ 'ನಾಯಕ' ಎಂದಾಗುತ್ತದೆ. ಇದನ್ನು ತಮಿಳಿಗರು ತಮ್ಮ ನೆಚ್ಚಿನ ಅಥವಾ ಗೌರವಿಸುವ ವ್ಯಕ್ತಿಗೆ ಕರೆಯುತ್ತಾರೆ. ಇಂಡಿಯನ್ ಪ್ರೀಮಿಯರ್ ಲೀಗ್‌ನಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ನ ಪರ ಆಡುವ ಧೋನಿ ಶ್ರೇಷ್ಠ ಆಟಗಾರ ಮತ್ತು ನಾಯಕನಾಗಿರುವ ಕಾರಣ ಈ ಹೆಸರನ್ನು ಪಡೆದಿದ್ದಾರೆ.
ಧೋನಿ ಕಾಣಲು 1,436 ಕಿ.ಮೀ ನಡೆದು ಬಂದ ಅಭಿಮಾನಿ: ಈ ಹಿಂದೆ ಎಮ್ ಎಸ್ ಧೋನಿ ಅವರ ಅಭಿಮಾನಿಯೊಬ್ಬ ಅವರನ್ನು ಕಾಣಲು ಬರೋಬ್ಬರಿ 1,436 ಕಿ.ಮೀ. ದೂರವನ್ನು ನಡೆದುಕೊಂಡೇ ಕ್ರಮಿಸಿ ರಾಂಚಿಗೆ ತೆರಳಿದ್ದ. ಇದನ್ನು ಕಂಡು ಸ್ವತಃ ಧೋನಿಯೇ ನಿಬ್ಬೆರಗಾಗಿದ್ದರು.
ಹರಿಯಾಣದ ನಿವಾಸಿ ಅಜಯ್ ಗಿಲ್ ಎಂಬುವವರು ಮಹೇಂದ್ರ ಸಿಂಗ್ ಧೋನಿಯ ಕಟ್ಟಾಭಿಮಾನಿ. ಧೋನಿ ಅವರನ್ನು ನೋಡಲೇಬೇಕು ಎಂಬ ಕಾರಣಕ್ಕಾಗಿ ಹರಿಯಾಣದಿಂದ ರಾಂಚಿಗೆ ನಡೆದುಕೊಂಡೇ ಹೋಗಿದ್ದರು. ಫಾರ್ಮ್ಹೌಸ್ಗೆ ಬಂದ ಅಭಿಮಾನಿಯನ್ನು ಧೋನಿ ಆತ್ಮೀಯವಾಗಿ ಬರಮಾಡಿಕೊಂಡು ಪ್ರೀತಿಯಿಂದ ಆಲಂಗಿಸಿಕೊಂಡಿದ್ದರು. ಅಲ್ಲದೇ, ಅಭಿಮಾನಿ ಗಿಲ್ ಜೊತೆ ಫೋಟೋಗೆ ಫೋಸ್ ನೀಡಿದ್ದರು.
ಅಜಯ್ ಗಿಲ್ ಹರಿಯಾಣಕ್ಕೆ ವಾಪಸ್ ಆಗಲು ಧೋನಿಯೇ ವಿಮಾನದ ಟಿಕೆಟ್ ಬುಕ್ ಮಾಡಿಸಿಕೊಟ್ಟಿದ್ದರು. ಅಲ್ಲದೇ, ದಿನದ ಮಟ್ಟಿಗೆ ಉಳಿದುಕೊಳ್ಳಲು ತನ್ನ ಫಾರ್ಮ್ಹೌಸ್‌ನಲ್ಲೇ ವ್ಯವಸ್ಥೆ ಮಾಡಿಕೊಟ್ಟಿದ್ದರು.
ಧೋನಿ ಟ್ಯಾಟೂ: ಕೊಪ್ಪಳದ ಅಭಿಮಾನಿಯೊಬ್ಬ ಧೋನಿ ಅವರ ಹುಟ್ಟು ಹಬ್ಬದಂದು ಟ್ಯಾಟೂ ಹಾಕಿಸಿಕೊಂಡು ತಮ್ಮ ಅಭಿಮಾನ ವ್ಯಕ್ತಪಡಿಸಿದ್ದರು. ಮಾರುತಿ ಎಂಬ ಯುವಕ ತನ್ನ ದೇಹದ ಮೇಲೆ ಮಹೇಂದ್ರಸಿಂಗ್ ಧೋನಿ ಟ್ಯಾಟೂ ಹಾಕಿಸಿಕೊಂಡಿದ್ದ.
ಇದನ್ನೂ ಓದಿ: ನನ್ನಿಂದ ನಡೆಯಲು ಸಾಧ್ಯವಾಗುವಷ್ಟು ಕಾಲ ಐಪಿಎಲ್ ಆಡುತ್ತೇನೆ: ಮ್ಯಾಕ್ಸ್‌ವೆಲ್ ಪ್ರತಿಜ್ಞೆ
