ನವದೆಹಲಿ: ದೆಹಲಿಯಲ್ಲಿನ ಹೋಟೆಲ್ವೊಂದರಲ್ಲಿ ಸಿದ್ಧಗೊಳ್ಳುವ ಮಸಾಲೆದೋಸೆವೊಂದನ್ನ 40 ನಿಮಿಷಗಳಲ್ಲಿ ತಿಂದು ಮುಗಿಸುವ ವ್ಯಕ್ತಿಗೆ ಬರೋಬ್ಬರಿ 71 ಸಾವಿರ ರೂಪಾಯಿ ಬಹುಮಾನವಾಗಿ ನೀಡಲಾಗುತ್ತದೆ. ರಾಷ್ಟ್ರ ರಾಜಧಾನಿಯ ಉತ್ತಮ್ ನಗರದ ಸ್ವಾಮಿ ಶಕ್ತಿ ಸಾಗರ್ ಹೋಟೆಲ್ ಇಂತಹದೊಂದು ಆಫರ್ ಮುಂದಿಟ್ಟಿದೆ.
ಮಸಾಲೆದೋಸೆ ಪ್ರಿಯರಿಗೋಸ್ಕರ ಈ ಚಾಲೆಂಜ್ ನೀಡಲಾಗಿದ್ದು, 10 ಅಡಿ ಉದ್ದದ ಮಸಾಲೆ ದೋಸೆ 40 ನಿಮಿಷಗಳಲ್ಲಿ ತಿಂದು ಮುಗಿಸುವ ವ್ಯಕ್ತಿಗೆ ಇಷ್ಟೊಂದು ಹಣ ಸಿಗಲಿದೆ ಎಂದು ಹೋಟೆಲ್ ಮಾಲೀಕರು ತಿಳಿಸಿದ್ದಾರೆ.
ಈ ದೋಸೆಯ ಬೆಲೆ 1,500 ರೂ. ಆಗಿದ್ದು, ಓರ್ವ ವ್ಯಕ್ತಿ ಮಾತ್ರ 40 ನಿಮಿಷದಲ್ಲಿ ಸಂಪೂರ್ಣವಾಗಿ ತಿಂದು ಮುಗಿಸಬೇಕು ಎಂದು ಹೋಟೆಲ್ ಮಾಲೀಕ ಶೇಖರ್ ಕುಮಾರ್ ತಿಳಿಸಿದ್ದಾರೆ. ಈಗಾಗಲೇ ಸುಮಾರು 25-26 ಗ್ರಾಹಕರು ಈ ಚಾಲೆಂಜ್ನಲ್ಲಿ ಭಾಗಿಯಾಗಿದ್ದು, ಯಾರೊಬ್ಬರೂ ಕೂಡ ಇಲ್ಲಿಯವರೆಗೆ ಗೆಲುವು ಸಾಧಿಸಿಲ್ಲ ಎಂದು ಮಾಹಿತಿ ನೀಡಿದ್ದಾರೆ.
ಹೋಟೆಲ್ ಆರಂಭವಾದಾಗ ನಾವು ಸಣ್ಣ ಸಣ್ಣ ದೋಸೆ ತಯಾರಿಸುದ್ದೆವು. ನಂತರ 7-8 ಅಡಿ ಉದ್ದದ ಮಸಾಲೆ ದೋಸೆ ಮಾಡಲು ಆರಂಭಿಸಿದ್ದು, ಇದೀಗ 10 ಅಡಿ ಉದ್ದದ ಮಸಾಲೆ ದೋಸೆ ತಯಾರಿಸುವ ಮೂಲಕ ಈ ವಿಭಿನ್ನ ಚಾಲೆಂಜ್ ಆರಂಭಿಸಿದ್ದೇವೆ. ಈ ಹೊಸ ಚಾಲೆಂಜ್ ಶುರುವಾರ ಬಳಿಕ ನಮ್ಮ ಹೋಟೆಲ್ಗೆ ಪ್ರತಿದಿನ ಅನೇಕ ಗ್ರಾಹಕರು ಭೇಟಿ ನೀಡ್ತಿದ್ದು, ಚಾಲೆಂಜ್ನಲ್ಲಿ ಭಾಗಿಯಾಗುತ್ತಿದ್ದಾರೆ. ಒಂದು ವೇಳೆ ಈ ಚಾಲೆಂಜ್ನಲ್ಲಿ ಅವರು ಫೇಲ್ ಆದರೆ, ತಮ್ಮ ಸ್ನೇಹಿತರೊಂದಿಗೆ ಅಥವಾ ಕುಟುಂಬದೊಂದಿಗೆ ಸೇರಿಕೊಂಡು ಮಸಾಲೆ ದೋಸೆ ಸವಿಯಬಹುದು ಎಂದು ತಿಳಿಸಿದ್ದಾರೆ.
ಚಾಲೆಂಜ್ನಲ್ಲಿ ಭಾಗಿಯಾದ ಗ್ರಾಹಕ ಸುರೇಂದ್ರ ಗುಪ್ತಾ ಮಾತನಾಡಿ, ನಾನು ಈ ಹೋಟೆಲ್ಗೆ ಕಳೆದ 10-12 ವರ್ಷಗಳಿಂದ ಬರುತ್ತಿದ್ದೇವೆ. ಮಸಾಲೆ ದೋಸೆ ತಿನ್ನುವ ಸ್ಪರ್ಧೆಯಲ್ಲಿ ನಾನು ಭಾಗಿಯಾಗಿ ಸೋತಿದ್ದೇನೆ. ಹೀಗಾಗಿ ಕುಟುಂಬದ ಎಲ್ಲ ಸದಸ್ಯರೊಂದಿಗೆ ಸೇರಿ ಉಳಿದ ದೋಸೆ ಸೇವಿಸಿರುವುದಾಗಿ ಹೇಳಿಕೊಂಡಿದ್ದಾರೆ.
ಜಾಹೀರಾತು: ನಿಮ್ಮ ಸೂಕ್ತ ಸಂಗಾತಿ ಹುಡುಕುತ್ತಿರುವಿರಾ? ಕನ್ನಡ ಮ್ಯಾಟ್ರಿಮೋನಿಯಲ್ಲಿ ನೋಂದಣಿ ಉಚಿತ
