ಗ್ಲೋಬಲ್​ ಹೇಲ್ತ್​ ಕೇರ್ ಐ ಡ್ರಾಪ್​ ಬಳಕೆಯಿಂದ ಅಮೆರಿಕದಲ್ಲಿ ಸಾವು ವರದಿ; ತಮಿಳುನಾಡಿನ ಉತ್ಪಾದನಾ ಘಟಕದಲ್ಲಿ ತನಿಖೆ ಆರಂಭ

ತಮಿಳುನಾಡಿನ ಗ್ಲೋಬಲ್​ ಹೆಲ್ತ್​ ಕೇರ್​ ಕಂಪನಿ ಕಣ್ಣಿನ ಔಷಧ ಬಳಕೆಯಿಂದ ಅಮೆರಿಕದಲ್ಲಿ ಸುಮಾರು 50ಕ್ಕೂ ಹೆಚ್ಚು ಮಂದಿ ಹಾನಿಗೊಂಡಿದ್ದು, ಸಾವನ್ನಪ್ಪಿರುವ ಕುರಿತು ವರದಿಯಾಗಿದೆ.

ಚೆನ್ನೈ: ಭಾರತದಲ್ಲಿ ತಯಾರಾಗುತ್ತಿರುವ ಕಣ್ಣಿನ ಔಷಧ ಬಳಕೆಯಿಂದಾಗಿ ಅಮೆರಿಕದಲ್ಲಿ ಸುಮಾರು 50 ಮಂದಿಯಲ್ಲಿ ಅನಾರೋಗ್ಯ ಕಂಡು ಬಂದಿದ್ದು, ಈ ಔಷಧ ಬಳಕೆ ಮಾಡದಂತೆ ಸೂಚನೆ ನೀಡಿದೆ. ಸದ್ಯ ವಿವಾದ ಕೇಂದ್ರ ಬಿಂದುವಾಗಿರುವ ಈ ಔಷಧದ ಉತ್ಪಾದನಾ ಘಟಕಕ್ಕೆ ನಿನ್ನೆ ಕೇಂದ್ರ ಔಷಧ ಗುಣಮಟ್ಟ ನಿಯಂತ್ರಣ ಸಂಸ್ಥೆ (ಸೆಂಟ್ರಲ್​ ಡ್ರಗ್ಸ್​ ಸ್ಟಾಂಡರ್ಡ್​ ಕಂಟ್ರಲ್​ ಅರ್ಗನೈಸೇಶನ್) ತಂಡ ಭೇಟಿ ನೀಡಿದ್ದು ತನಿಖೆಗೆ​ ಮುಂದಾಗಿದೆ. ತಮಿಳುನಾಡಿನ ಚೆಂಗಲಪಟ್ಟು ಜಿಲ್ಲೆಯ ತಿರುಪೊರುರ್​ ಸಮೀಪದ ಆಲ್ತುರ್​ನಲ್ಲಿ ಗ್ಲೋಬಲ್​ ಹೇಲ್ತ್​ ಕೇರ್​ ಕಂಪನಿ ಉತ್ಪಾದಿಸುತ್ತಿರುವ ಕಣ್ಣಿನ ಔಷಧ​ (ಐ ಡ್ರಾಪ್​) ಬಳಕೆಯಿಂದ ಅಮೆರಿಕದಲ್ಲಿ ಜನರು ಸಾವನ್ನಪ್ಪಿದ್ದು, ಇದೀಗ ಈ ಔಷಧ ವಿವಾದದ ಕೇಂದ್ರ ಬಿಂದುವಾಗಿದೆ.

ಗ್ಲೋಬಲ್​ ಹೇಲ್ತ್​ಕೇರ್​ ಕಂಪನಿಯ ಔಷಧ ಉತ್ಪಾದನಾ ಕೇಂದ್ರ ಆಲ್ತುರ್​ನಲ್ಲಿ ನಡೆಯುತ್ತಿದೆ. ಇಲ್ಲಿ ಉತ್ಪಾದನೆಯಾಗುತ್ತಿದೆ. ಈ ಔಷಧಗಳನ್ನು ಎರಡು ಅಮೆರಿಕ ಕಂಪನಿಗಳು ಯುನೈಟೆಡ್​ ಸ್ಟೇಟ್ಸ್​ನಾದ್ಯಂತ ವಿತರಣೆ ಮಾಡುತ್ತಿದೆ. ಈ ಔಷಧಗಳ ಬಳಕೆಯಿಂದ ಅನೇಕರು ತೊಂದರೆಗೆ ಒಳಗಾಗುತ್ತಿದ್ದಾರೆ ಎಂಬ ವರದಿಯಾಗಿದೆ.

ಔಷಧ ಬಳಸದಂತೆ ಸೂಚನೆ: ಇನ್ನು ಈ ಔಷಧ ಬಳಕೆ ಮಾಡಿದ ಇಬ್ಬರು ಸಾವನ್ನಪ್ಪಿದ್ದಾರೆ. ಐದು ಮಂದಿಗೆ ಕಣ್ಣಿನ ಹಾನಿಯಾಗಿದೆ. 50ಕ್ಕೂ ಅಧಿಕ ಮಂದಿ ದೈಹಿಕ ಸಮಸ್ಯೆಗಳಿಗೆ ಒಳಗಾಗಿದ್ದಾರೆ. ಈ ಕುರಿತು ಅಮೆರಿಕ ರೋಗ ನಿಯಂತ್ರಣ ಮತ್ತು ತಡೆಗಟ್ಟುವಿಕೆ ಕೇಂದ್ರ ವರದಿಯನ್ನು ಬಿಡುಗಡೆ ಮಾಡಿದೆ. ಈ ವರದಿಯಲ್ಲಿ, ಈ ಕಣ್ಣಿನ ಔಷಧ ಬಳಸಿದ ವ್ಯಕ್ತಿಗಳ ದೇಹದಲ್ಲಿ ಅನೇಕ ಬ್ಯಾಕ್ಟೀರಿಯಾಗಳು ಪತ್ತೆಯಾಗಿವೆ. ಇದು ಅನೇಕ ಗಂಭೀರ ಸಮಸ್ಯೆಗೆ ಕಾರಣವಾಗಬಹುದು. ಈ ರೀತಿಯ ಬ್ಯಾಕ್ಟೀರಿಯಾಗಳು ಅಮೆರಿಕದಲ್ಲಿ ಈ ಹಿಂದೆ ಪತ್ತೆಯಾಗಿಲ್ಲ. ಈ ಹಿನ್ನೆಲೆ ಈ ಕಣ್ಣಿನ ಔಷಧ ಬಳಕೆ ಮಾಡದಂತೆ ಅಮೆರಿಕ ಸರ್ಕಾರ ಜನರಿಗೆ ಸೂಚನೆ ನೀಡಿದೆ.

50ಕ್ಕೂ ಹೆಚ್ಚು ಮಂದಿಗೆ ಹಾನಿ ಈ ಕಣ್ಣಿನ ಔಷಧ ಬಳಕೆ ಮಾಡಿದವರಲ್ಲಿ ಸೋಂಕು, ದೃಷ್ಟಿ ಕಳೆದುಕೊಳ್ಳುವುದು ಮತ್ತು ಈ ಸೋಂಕು ರಕ್ತಕ್ಕೆ ಪ್ರವೇಶಿಸಿ ಸಾವನ್ನಪ್ಪುತ್ತಿರುವ ಬಗ್ಗೆ 50ಕ್ಕೂ ಹೆಚ್ಚು ಪ್ರಕರಣಗಳು ಕಂಡು ಬಂದಿದೆ. ಈ ಪ್ರಕರಣಗಳು ವರದಿಯಾದ ಬೆನ್ನಲ್ಲೇ ತಮಿಳುನಾಡು ಮೂಲದ ಗ್ಲೋಬಲ್​ ಹೆಲ್ತ್​ ಕೇರ್​ ಔಷಧ ಕಂಪನಿ ಅಮೆರಿಕದಿಂದ ತಮ್ಮ ಔಷಧಿಗಳನ್ನು ಸ್ವಯಂ ಹಿಂಪಡೆದಿದೆ. ಅಮೆರಿಕದ ಆಹಾರ ಮತ್ತು ಔಷಧ ಆಡಳಿತ, ದೇಶದಲ್ಲಿ ಈ ಔಷಧಗಳ ಮಾರಾಟ ಮಾಡದಂತೆ ಮತ್ತು ಬಳಸದಂತೆ ಜನರಿಗೆ ತಿಳಿಸಿದ್ದಲ್ಲದೆ, ಪ್ರಕಟಣೆ ಹೊರಡಿಸಿದೆ.

ಮಧ್ಯರಾತ್ರಿ ದಾಳಿ ನಡೆಸಿದ ತಂಡ: ಅಲ್ಲದೇ ಕೇಂದ್ರ ಮತ್ತು ರಾಜ್ಯದ ಔಷಧ ನಿಯಂತ್ರ ಇನ್ಸ್​ಪೆಕ್ಟರ್​ ಒಳಗೊಂಡ ಆರು ಜನರ ತಂಡ ನಿನ್ನೆ ಮಧ್ಯರಾತ್ರಿ ಸುಮಾರು 2 ಗಂಟೆಗೆ ಔಷಧ ಘಟಕಕ್ಕೆ ಭೇಟಿ ನೀಡಿದ್ದು, ತನಿಖೆ ನಡೆಸಿದೆ. ಈ ಕುರಿತು ಮಾತನಾಡಿರುವ ತಂಡ ಅಮೆರಿಕಕ್ಕೆ ಕಳುಹಿಸಿದ ಔಷಧದ ಸ್ಯಾಂಪಲ್​ ಪಡೆಯಲಾಗಿದ್ದು, ಇದನ್ನು ಪರೀಕ್ಷೆಗೆ ಒಳಪಡಿಸಿ, ಈ ಕುರಿತು ವಿವರವಾದ ವರದಿಯನ್ನು ಸರ್ಕಾರಕ್ಕೆ ನೀಡಲಾಗುವುದು ಎಂದು ತಿಳಿಸಿದೆ.

ಇದನ್ನೂ ಓದಿ: ಸತತ ಮೂರನೇ ಬಾರಿ ವಿಶ್ವದ ಅತ್ಯಂತ ಜನಪ್ರಿಯ ನಾಯಕರಾಗಿ ಹೊರಹೊಮ್ಮಿದ ಪ್ರಧಾನಿ ಮೋದಿ