ಅತ್ತೆಯನ್ನು ಕೊಂದು ಮೂಟೆ ಕಟ್ಟಿದ ಸೊಸೆ: ಪೊದೆಯಲ್ಲಿ ಶವ ಎಸೆಯುವಾಗ ಸಿಕ್ಕಿಬಿದ್ದಳು ಕಿರಾತಕಿ

ಸೊಸೆ ತನ್ನ ಅತ್ತೆಯ ಕತ್ತು ಹಿಸುಕಿ ಕೊಂದಿದ್ದಾಳೆ. ಬಳಿಕ ಮೃತದೇಹವನ್ನು ಹೊರಹಾಕುವಾಗ ಸಿಸಿಟಿವಿಯಲ್ಲಿ ಸೊಸೆಯ ದುಷ್ಕೃತ್ಯ ಸೆರೆಯಾಗಿದೆ.

ಪುಣೆ(ಮಹಾರಾಷ್ಟ್ರ): ಕೌಟುಂಬಿಕ ಕಲಹ ಹಿನ್ನೆಲೆ ಸೊಸೆಯೇ ತನ್ನ ಅತ್ತೆಯ ಕತ್ತು ಹಿಸುಕಿ ಕೊಂದಿರುವ ಘಟನೆ ಪುಣೆ ಜಿಲ್ಲೆಯ ತಲೆಗಾಂವ್ ಪ್ರದೇಶದಲ್ಲಿ ನಡೆದಿದೆ.

ಬೇಬಿ ಗೌತಮ್ ಶಿಂಧೆ (50) ಕೊಲೆಯಾದ ಮಹಿಳೆ, ಆರೋಪಿ ಪೂಜಾ ಮಿಲಿಂದ್​ ಶಿಂಧೆ ಮತ್ತು ಈಕೆಯ ಮಗ ಮಿಲಿಂದ್ ಶಿಂಧೆ ಎಂಬುವರನ್ನು ಪೊಲೀಸರು ಬಂಧಿಸಿದ್ದಾರೆ. ಅತ್ತೆಯ ಶವವನ್ನು ಪೊದೆಯಲ್ಲಿ ಎಸೆಯುವಾಗ ಸಿಸಿಟಿವಿಯಲ್ಲಿ ಇವರ ದುಸ್ಕೃತ್ಯ ಸೆರೆಯಾಗಿದೆ.

ಪೊಲೀಸರ ಪ್ರಕಾರ, ತಲೆಗಾಂವ್ ಪ್ರದೇಶದಲ್ಲಿ ವಾಸಿಸುತ್ತಿದ್ದ ಅತ್ತೆ- ಸೊಸೆ ನಡುವೆ ಆಗಾಗ್ಗೆ ಸಣ್ಣಪುಟ್ಟ ವಾಗ್ವಾದ ನಡೆಯುತ್ತಿದ್ದವಂತೆ. ಇದರ ಸೇಡು ಇಟ್ಟುಕೊಂಡಿದ್ದ ಸೊಸೆಯು ಅತ್ತೆಯನ್ನು ಕುಪ್ಪಸದಿಂದ ಕತ್ತು ಬಿಗಿದು ಕೊಂದಿದ್ದಾಳೆ.

ದೇಹವನ್ನು ಚೀಲದಲ್ಲಿ ತುಂಬಿ, ನಂತರ ಶವವನ್ನು ಟೆರೇಸ್‌ನಲ್ಲಿ ಇರಿಸಿದ್ದಾರೆ. ಇದಾದ ಬಳಿಕ ಸಾಕ್ಷ್ಯ ನಾಶಕ್ಕೆ ತಾಯಿ-ಮಗ ಶವವನ್ನು ಪೊದೆಯಲ್ಲಿ ಮುಚ್ಚಿಟ್ಟಿದ್ದಾರೆ.

ಶವ ಎಸೆಯುವುದು ಸಿಸಿಟಿವಿಯಲ್ಲಿ ದಾಖಲಾಗಿದ್ದರಿಂದ ಘಟನೆ ಬೆಳಕಿಗೆ ಬಂದಿದೆ. ಮೃತದೇಹ ಎಸೆದ ನಂತರ ಆರೋಪಿಯ ಮಗ ಮಿಲಿಂದ್ ಶಿಂಧೆ ಟೆರೇಸ್​ನಲ್ಲಿ ಹಾಗೂ ಮನೆಯಲ್ಲಿ ಅಂಟಿಕೊಂಡಿದ್ದ ರಕ್ತವನ್ನು ತೊಳೆದು ಸ್ವಚ್ಛಗೊಳಿಸಿದ್ದಾನೆ ಎಂದು ತಿಳಿದುಬಂದಿದೆ.